प्रेषित 20 - बारेली पावरी

मकीदुनीया, यूनान एने त्रोआसमा पौलुस

¹ जेतार दोंगु थाम गोयू ती पौलुस चेला काजे बुलावीन सोमजाड्यू, एने तिंदरेनचा गोथू जायीन मकीदुनीया भूनी चाल पोळ्यु.

² तिना आखा प्रदेशमा जायीन एने चेला काजे जादा खुश कोरीन चू यूनानमा आव्यु.

³ जेतार तीन महिना रोयीण चू चा गोथू ढोंड्या पोर सिरीया भूनी जाणे पोर होतु, ती यहुदि हेरा मारणे पोर होता, इनान कोरता चू यु फेसलू कोऱ्यु कि मकीदुनीयामा जात रोयो.

⁴ बिरीयान पुर्र्स पुऱ्यु सोपत्रूस एने थेस्सलुनीकामा गोथू अरिस्तर्खुस, एने दिरबेन गयुस, सिकुन्दुस एने तीमथीस, एने आसियान तुखीकुस एने त्रुफीमूस आसिया तोक हेरे साते गोया.

⁵ चे ओगा जायीन त्रोआसमा आमरी वाट जुवता रोया एने अखमीरोन रुटान दाहळान ओवतेन फिलिप्पीसी ढोंड्यो पोर चोळीन पाच दाहळामा त्रोआसमा हेरेनचा पुग्या, एने सात दाहळा तोक चात रोया.

⁶ एने आमु अखमीरोन रुटान दाहळान ओवतेन फिलीप्पी सी ढोंड्यो पोर चोळीन पाच दाहळामा त्रोआसमा तेरे साते पुग्या एने सात दाहळा तोक चात रोया.

यूतुखुसकाजे जीवतो कोरनो

⁷ हाप्तान पेहेले दाहळे जेतार आमु रुटू खाणेन कोरता एखठा होया, ती पौलुस जू दिसरे दाहळे जात रोयने पोर होतु, चू वाते कोऱ्यु; एने आधी रात तोक वात कोरतू रोयू.

⁸ जिना घोरोमा आमु एखठा होता, तीनामा जादा दिवा धोप रोयला होता.

⁹ एने येतूखुस नावोन एक जुवान्यू खिडकि पोर बोसलु जुदी निंदोमा डुलका लेतु होतु, एने जेतार पौलुस जुदी वार तोक वात कोर रोयू ती चू निंदोन झूलमा तिसरी मोजली पोर गोथो पोड गोयू, एने मोरलू चुट्या.

¹⁰ बाकीन पौलुस उतरीन हिनाक वेटवाय गोयू एने गोवे लागाळीन कोयू, “बिहे मा; काहाकि हेरु जीव हेरेमा छे.”

¹¹ एने उपोर जायीन रुटू तूळ्यु एने खायीन ओतरी वार तोक हिंदरे पुठी वात कोरतू रोयू कि भूव भाकवो होय गोयो ओवतेन चू जात रोयो.

¹² एने चे तिना जुवान्या काजे जीवतलु ली आया एने जादा शांती जोडी.

त्रोआसमा मिलेतूसोन यात्रा

¹³ आमु पेहेलेत जहाज पोर पुग गया एने अस्सुस काजे तिना विचारसी ओगा गोया कि चा गोथू पौलुस काजे चोळाव लेय, काहाकि चू यो इनान कोरता ठेरावलो होतो कि खुद पाय-पाये जाणे वावू होतु.

¹⁴ जेतार चू अस्सुसमा आमुक भेटायु ती आमु हिनाक चोळावीन मितुलेनेमा आया.

¹⁵ चा गोथा ढोंड्यो छुळीन आमु दिसरे दाहळे खियूसोन सामने पुग्या, एने ओगले दाहळे सामोस मा जाणे लाग्या एने दिसरे दाहळे मिलेतूसमा आव्या.

¹⁶ काहाकि पौलुस इफिसोन साते आवीन जाणेन फेसलु कोरलु होतु कि कोदि ओसो नी होयनो जुवे कि तीनाक आसियामा वार लागे; काहाकि तावनीमा होतु कि ओगर होय सोके ती चू पेन्तिकुस्तोन दाहळे यरुशलेममा रोये.

इफिसुसोन माणसोक प्रचार

¹⁷ चू मिलेतूस सी इफिसमा कोय मूकल्यु, एने मंडव्यान डाह-डाहा काजे बुलाव्यू.

¹⁸ जेतार चे हेरे साते आव्या ती, चू कोयू, “तुमु जानतला छे कि पेहेले दाहळे गोथो जेतार मे आसियामा पुग्यू, मे आखे टेमे तुमरे साते कानला रितीसी रोयू.”

¹⁹ मतलब मोटला नम्रतासी, एने आसवा वोयाळी-उगाळीन, एने तिना पोरीक्षामा जे यहुदियान मारनेन बेतोन वोजा मारे पोर आव पोळ्यो, मे प्रभून सेवा कोरतूत रोयू;.

²⁰ एने जी-जी वाते तुमरा फायदान होती, तिंदरो कोयनेसी एने माणसोन सामने एने घोर-घोर सिकाळने सी कोबी नी झीजक्यू.

²¹ नी तेत्यार यहुदिया एने युनानीन गोवायीन आपतू रोयो कि परमेश्वर भूनी मोन फिरावू एने आमरा प्रभू येसु मसिह पोर भुरसू कोरनो जुवे.

²² हिमी देखू, मे आत्मामा बांधायलु यरुशलेम काजे जाम, एने नि जानतू कि चा मार पोर काय-काय वीतसे;.

²³ निसतो यो कि पवित्र आत्मा होर नगरमा गोवायी आपी आपीन मेसेक कोये कि बंधन एने दुख तारेन कोरता तीयार छे.

²⁴ बाकीन मे मारा जीव काजे काय नी सोमज्यु कि तीनाक मोंगावू जाणो, बाकीन यो कि मे मारा दोवळना काजे एने तिनी सेवा काजे पुरी कोरो, जो मे परमेश्वरोन दयान वारली खोबर पोर गोवायी आपनेन कोरता प्रभू येसु जुव गोथू ली लेदलु छे.

²⁵ हिमी देखू, मे जाणो कि तुमु आखा जिंदरेम परमेश्वरोन राज्यान प्रचार कोरतू फिऱ्यु, मारो मूय नी देखे.

²⁶ इनान कोरता मे आजून दाहळे तुमु काजे गोवायी आपीन कोय, कि मे आखान लुयसी निरदोष छे.

²⁷ काहाकि मे परमेश्वरोन मोर्जी काजे तुमुक पुरा रितीसी कोयने नी झीजक्यू.

²⁸ इनान कोरता आपनी एने आखा टूवान तोपास कोरु जीनामा पवित्र आत्मा तुमुक पुढारी ठरावलु छे, कि तुमु परमेश्वरोन मंडव्यान राखवावी कोरे, जीनाक चू आपना लुयसी मुले लेदला छे.

²⁹ मे जानतलु छे कि मारे जाणेन ओवतेन फाडनेवावू कुल्या तुमरेमा आवसे जे टूवा काजे नि छुळे.

³⁰ तुमरेत इचमा मे बी ओसला-ओसला माणसे उठसे, जू चेला काजे आपने पोछोव हापकी लेणेन एने वाकडी-तिकडी वाते कोयसे.

³¹ इनान कोरता जागता रोयू, एने फोम कोरु कि मे तीन साल तोक रात दाहळू आसवा वोयाळी-वोयाळीन होर एक जोना काजे जोताळीन कोयनो नी छुळ्यो.

³² एने हिमी मे तुमुक परमेश्वर काजे, एने तेरा दयान वचन सोप दोम; जू तुमरी बोढती कोर सोकतलु छे एने आखा चुखलो कोरायला माणसोमा साजी कोरीन वाडी आप सोकतलु छे.

³³ मे काहना काहनासोन चांदी, सोनो नीती छिंदरा लालूच नी कोऱ्यु.

³⁴ तुमु खुद जानतला छे कि जे हाते मारी एने मारा दुस्तीदारोन गोरोज पुरो कोऱ्या.

³⁵ मे तुमुक आखो कोरीन देखाळ्यू कि इना रितीसी मेहनत कोरतो जायीन कोम ताकत वावा काजे सोमावनो एने प्रभू येसुन वचन फोम राखणेन जोरुरी छे, जो चू खुदुत कोयलु छे “लेणे सी आपनो सोयावा छे.”

³⁶ यो कोयीन चू मांडा टेक्यू एने तिंदरा आखा साते प्रार्थना कोऱ्यु.

³⁷ तेत्यार चे आखा जुदा रोड्या एने पौलुसोन गोवे मिठी मारीन हिनाक गुवा लेदा.

³⁸ चे विशेष कोरीन इनी वातोसी दुखी होता जो चू कोयलु होतु कि तुमु मारा मूय पोछु नी देख्या तेत्यार चे हिनाक जहाजनचा तोक पुगाळ्या.