प्रेषित 19 - बारेली पावरी

इफिसुसमा पौलुस

¹ जेतार अपुल्लोस कुरिन्थमा होतु, ती पौलुस उपोरवावा आखा प्रदेशमा जायीन इफिसमा आव्यु चा काहनास चेला काजे देखीन.

² चू कोयू, “काय तुमु भुरसू कोरनेन टेमे पवित्र आत्माक लेदा?” चे तिना काजे कोया, “आमु ते पवित्र आत्मान बारामा वात बी नी सोमव्या.”

³ पौलुस तीनु काजे कोयू, “ती पोछा तुमु कुनीन बाप्तिस्मा ली रोया?” चे कोया, “योहानोन बाप्तिस्मा.”

⁴ पौलुस कोयू, “योहान यो कोयीन मोन फिरावनेन बाप्तिस्मा आप्यू कि जू मारे बादमा आवने वावू छे, तीना पोर मतलब येसु पोर भुरसू कोरजू.”

⁵ यो सोमवीन चे प्रभू येसुन नावोमा बाप्तिस्मा लेदा.

⁶ जेतार पौलुस तिंदरे पोर हात मेक्यू, ती पवित्र आत्मा हिंदरे पोर उतऱ्यु, एने चे भाती-भातीन भाषा बुलने एने भविष्यवाणी कोरणे बाज गोया.

⁷ ये आखा लगभग बारा ओदमी होता.

⁸ चे प्रार्थना घोरोमा जायीन तिन मोहना तोक नी बिहीन बुलतू रोयू, एने परमेश्वरोन राज्यान बारामा विवाद कोरतू एने सोमजाडतू रोयु.

⁹ बाकीन जे काय माणसे काठला बोनीन तेरी नी मान्या नी तेत्यार माणसोन सामने तिनी वाट काजे बुरो कोयने बाज गोया, ती चु तीनु काजे छुळ देदु एने चेला काजे ओलोग कोर देदू, एने दाहळीन तुरनूस शाळामा वाद विवाद कोऱ्या कोरतू होतु.

¹⁰ दुय साल तोक योत होयतो रोयो, न्या तोक कि आसियान रोयने वावा काय यहुदि काय युनानी आखा प्रभून वचन सोमवी लेदा.

इफिसमा मोटला कामे

¹¹ परमेश्वर पौलुसोन हातोसी मोटला-मोटला कामे देखाळतू होतु.

¹² न्या तोक कि रुमाल एने छिंदरा तेरा डीलोसी छिमीन बिमारी वावा पोर मेकता होता, एने तिंदरी बिमारी जात रोयती होती; एने भुंडली आत्मा तिंदरेमा गोथी निकवीन जाती होती.

¹³ बाकीन काहनास यहुदि जे झाडू झाडता फिरता होता, यो कोयने बाज गोया कि इंदरेमा भुंडली आत्मा होसे, तिंदरे पोर प्रभू येसुन नाव यो कोयीन फुकने बाज गोया, “जिना येसुन प्रचार पौलुस कोरतेलू, मे तुमुक हेरीत कोसोम आपो.”

¹⁴ एने स्कीवा नावोन एक यहुदि प्रधान पुजारान सात पुऱ्या होता, जे ओसात कोरता होता.

¹⁵ बाकीन भुंडली आत्मा इनू काजे जोवाब आपी, “येसु काजे मे उवेखतलु, एने पौलुस कायबी उवेखतलु बाकीन तुमु कून छे?”

¹⁶ एने चू माणूस जीनामा भुंडली आत्मा होती तीनु पोर चोपटीन एने ताबामा लीन, तीनु पोर ओसू जोखमी कोऱ्यु कि चे उगाळला एने जोखमी होयीन तिना घोरोमा गोथा ढाश्या.

¹⁷ जी वात इफिसमा रोयने वावा आखा यहुदि एने युनानी बी जान गोया, एने तीनु आखापोर बिक भोराय गोयी; एने प्रभू येसुन नावोन बोढाई होई.

¹⁸ जे भुरसू कोरला होता तिंदरेमा गोथा जादात जोना आवीन आपना-आपना कामो काजे मान लेदा एने देखाळ्या.

¹⁹ जादू कोरणे वावामा घोणा सोवटा जोना आपना-आपना किताब एखठा कोरीन आखान ओगोव धोपाळ देदा, एने जेतार हिंदरो दाम जुळाय गोयो, ती पौलुस होजार चांदीन सिकान बोराबोर निकव्यो.

²⁰ इना रितीसी परमेश्वरोन वचन ताकत पुठी फैलतलो एने पाको होयतो गोयो.

²¹ जेतार ये वाते होय गोया ती पौलुस आत्मामा ठान्यू कि मकीदुनीया एने अखाया सी जातु जायीन यरुशलेम काजे जाम, एने कोयू, “चा जाणेन ओवतेन मेसेक रोम काजे बी देखनो जोरुरी छे.”

²² इनान कोरता आपनी सेवा कोरणे वावामा गोथू तीमथी इरास्तुस काजे मकीदुनीया मुकलीन खुद काहीन दाहळा आसियामा रोय गोयू.

इफिसमा उपद्रव

²³ इने टेमे इना वाटोन बारामा मोटलु दोंगु होयू.

²⁴ काहाकि दिमेत्रियुस नावोन एक सोनार अरतिमिस चांदीन मंदीर बोनावीन कारागीरो काजे जादा काम आप्या कोरतो होतो.

²⁵ चू हिनुक एने ओसला चीजोन कारागीरोन काजे एखठू कोरने कोयू, “हे माणसो तुमु जानतला छे कि इना कामोसी आमुक कोतरो धोन जोळतलो छे.

²⁶ तुमु देखतला एने सोमवतला छे कि निसतो इफिसमा नी, बाकीन प्राय आखा आसियामा यो कोयी कोयीन यु पौलुस जादा माणसो काजे सोमजाडयु एने बुलाळतलु बी छे, कि जी हातोन कारागीरी छे चे परमेश्वर नी होय.

²⁷ इनासी आखा निस्ता इनी वातोन बिक नी होय कि आमरा इना धोंदान प्रतिष्टा जात रोयसे, बाकीन जिकी महान देवी अरतिमिसोन मंदीर विटोव सोमजाय जासे, एने जीनाक आखो आसिया एने जोग पूजतलो छे तेरो महत्व बी जात रोयसे.”

²⁸ चे यो सोमवीन रीसमा भोराय गोया एने आयळीन-आयळीन कोयने बाज गोया, “इफिसोन अरतिमिस महान छे.”

²⁹ एने आखा नोगोरमा वात पोसरी गोयी, एने माणसे मकीदुनीयान रोहीवासी गयुस एने अरिस्तर्खुस काजे जे पौलुसोन साते वावा जान्या होता धोर लेदा, एने एक साथ नाट्यगृहमा ढास गोया.

³⁰ जेतार पौलुस माणसो साते माही जाणे कोऱ्यु ती चेला हीनाक जाणे नी देदा.

³¹ आसियान सुभेदारमा गोथा बी हेरा काहीन जुळीदार हिना काजे कोय मूकल्या एने विनता कोऱ्या कि धर्मशाळामा जायीन संकट मा झुन पोळतू.

³² चा कुदू काहीन आयळता होता एने कुदु काहीन, काहाकि सभामा मोटी गोरबोळ होय रोयी होती, एने जादा माणसे ते यो जानता बी नी होता कि आमु कालगान कोरता न्या एखठा होय रोया.

³³ तेत्यार चे सिकनदर काजे, जीनाक यहुदिया उबराखला होता, गोरदीमा गोथा ओगा बोडाया सिकनदर हातोसी इशारू कोरीन माणसो सामने जोवाब देणे हिंड्यू.

³⁴ बाकीन जेतार चे जान लेदा कि चू यहुदि छे, ती आखान आखा एक बुलोसी काहीन दुय घोंटा तोक आयळता रोया, “इफिसीयोन अरतिमिस, महान छे.”

³⁵ तेत्यार नोगोरोन मंत्री माणसो काजे हुगा कोरीन कोयु, “हे इफिसोन माणसे, कून नी जानतला कि इफिसोन नोगोर महान देवी अरतिमिसन मंदीर, एने जुसोन भूनी गोथी पोळली होती मूर्तीन राखावावी कोरन्यू छे.

³⁶ आखरी जेतार कि इनी वातोन आखिर नी होय सोकतो, ती वारू छे कि तुमु हुगा रोये एने बिना विचारोन विचार काय मा कोरु.

³⁷ काहाकि तुमु इना माणूस काजे लाव रोया यु नी मंदीरोन लुटने वावू होय एने नी आमरी देवीन बुराई कोरणे वावू होय.

³⁸ ओगर दिमेत्रियुस एने हेरा साते कारागीरो साते कुदासी वाद विवाद होय ती कोचरी उगाळली छे एने सुभेदार बी छे; चे एक दिसरा पोर गुणू लागाळे.

³⁹ बाकीन ओगर तुमु काहना ओवी वातोन बारामा काहीन पुछ्ने हिंडे, ती नियमोन सभान फेसलु कोराय जासे.

⁴⁰ काहाकि आजून दोंगान वोजेसी आमरेपोर गुणू लागाळनो बिक छे, इनान कोरता काय वोजा नि होय, एने आमु इना गोरदीन एखठा होयनेन काहना जोवाब नी दि सोकजे.”

⁴¹ यो कोयीन चू सोभा काजे मुकली देदू.