3 योहान 1 - बारेली पावरी

सुभेच्छा

¹ मारा डायलान जुव गोथू, तिना मोंगावा गयुसन नावे, जेरे पोर मे खोरलो मोंग कोरतेलू.

² हे मोंगावा मारी जी विनता छे कि तू आत्मामा बोढने बाज रोयू, तोसुच तू आखा वातोमा बोढ एने वारलु आरगु रोय.

³ काहाकि जेतार भाश आवीन तारा तीना खोरलान गोवायी आप्या, जिना पोर तु छाचलीन चालतलु छे, ती मे जुदु खुश होयू.

⁴ मेसेक इना गोथो बोळीन एने कहाणली खुशी नि होय कि मी सोमवो, कि मारा पुऱ्या खोरला पोर चाल रोया.

उदारतान कोरता चोत्रावा

⁵ हे मोंगावा, जो काय तू तीना भाशोन साते कोरलु छे, जो पोरदेशी छे, तिनाक विस्वासीन रूपमा कोरतेलु छे.

⁶ ते मंडवीन ओगोव तारा मोंगोन गोवायी आपला छे कोदि तू तीनुक इना रितीसी मुकल देसू तिना रितीसी परमेश्वरोन माणसे साते वारू छे ती वारलो कोरसे.

⁷ काहाकि चे तिना नावोन कोरता निकवी रोया, एने दिसरा जात्या पुठी काय नि लेतला.

⁸ इनान कोरता ओसलान स्वागत कोरनो जुवे, जीनासी आमु भी खोरलान साते तिंदरा मोदतगार होयू.

दियुत्रिफेस एने दिमेत्रियुस

⁹ मे मंडवी काजे काहीन लिखलू होतु, बाकीन दियुत्रिफेस जू तिंदरेमा मोटू बोनने कोरतू होतु आमुक स्वीकारने कि कोरतेलू.

¹⁰ इनान कोरता जेतार मे जाईस तेत्यार तिनान कामोन जू चो कोयणे बाज रोयू, खोबर देवाळीस, कि चू आमरा बरामा भुंडला वाते बोकतला छे; एने रनपोर बी संतोष न रोयीन तुमु च भाशो काजे ग्रहण नि कोरतेला, एने तीनुक जू ग्रहण कोरणे हिंडे तीनुक मोना कोरतेलू एने मंडवीमा गोथू निकाव देतलू.

¹¹ हे मोंगावा, बुराई नि बाकीन भोलाईन कोरण्या सारका रोयू जू वारलो कोरतेलू छे, चू परमेश्वर जुव गोथू छे, बाकीन जू बुरो कोरतेलु छे, चू परमेश्वर काजे नि देख्यू.

¹² दिमेत्रियुस बारामा आखात, नि तेत्यार खोरलो चोत गोवायी आप्यू; एने आमु बी गोवायी आपतला छे, एने तू जानतलु छे कि आमरी गोवायी खोरली छे.

¹³ मेसेक तुमु काजे जुदो काय लिखनो ते होतो, बाकीन शाईसी एने कोलमसी लिखनो नि जुवतो.

¹⁴ बाकीन मेसेक आस छे कि तारसी साटू भेट कोरिस, तेत्यार आमु आमने सामने बुल्या कोरसु.

¹⁵ तुसेक शांती जोळती रोये या वावा दुस्तो तुसेक नमस्कार कोय रोया चा वावा दुस्तोन काजे नाव लीन-लीन नमस्कार कोय देजी.