2 तीमथी 2 - बारेली पावरी

वारलु खिलाडी

¹ इनान कोरता हे मारा पुऱ्या तू इनाक दयासी जे येसु मसिहमा छे ताकत वावू होय जा.

² एने जे वाते तू लोकेत गोवाय सामने मारेंचा गोथू सोमवतलु छे, तीनुक विश्वासी मोनसी काजे सोप दे; जे दिसरा काजे बी सिकाळनेन लायक छे.

³ येसु मसिहन वारला सैनिक सारखु मारे पुठी दुख झेल.

⁴ जेतार काहनलु योद्धा लोळायमा जातलु ती तिनान कोरता कि आपनी भोरती कोरणे वावा काजे खुश कोरे खुदो काजे संसारोन कामोमा नी फोसाळतू,

⁵ उखाडामा लोळायने वावू अगर रिती अनसारे नी लोळाये ती मुकुट नी जोळे.

⁶ खेतो वावू मेहनोत कोरतेलू, फोवन वाटू पेहेले जीनाक जोळनो जुवे.

⁷ जो मे कोयनो बाज रोयू एने प्रभू तुसेक आखान वातोन समज आपे.

⁸ येसु मसिह काजे फोम कोर, जू दाऊदन पिढीमा गोथू होयू एने मोरलामा गोथू जीव उठ्यू एने चू मारा वारली खोबरोन अनसारे.

⁹ जिनान कोरता मे भुंडला कामो सारखु दुख झेल रोयू या तोक कि बंदी वानी छे बाकीन परमेश्वरोन वारली खोबर बंदीवान नी होय.

¹⁰ इनान वोजेसी मे नेवाळला माणसोन कोरता आखो काय सोब देदलु छे, कि चे बी इना छुटकारू काजे मसिह येसुमा छे, ओमोर महिमा पुठी जोळे.

¹¹ जी वात वारली छे, कि अगर आमु तेरे पुठी मोर गोयला छे, ती तेरे पुठी जीवसू.

¹² अगर आमु धीरोज धोरीन रोयता रोयजू ती तेरे साथे राज बी कोरसु अगर आमु तेरु इनकार कोरतेलू ती चू भी आमु इनकार कोरतू चू भी आमु इनकार कोरसे.

¹³ अगर आमु बिन भुरस्या ते बी चू भुरसान लायक बोनलू रोयतलू काहाकि चू खुदोन नकार नी कोर सोकतलु.

वारलु कारागीर

¹⁴ इनी वातोन फोम तीनुक आप एने प्रभून सामने जोताळ दे कि बुली पोर जोखळी नी कोरजू जीनासी काहीन फायदु नी होयतलु बाकीन सोमवने वावा विसरी जातला.

¹⁵ खुदो काजे परमेश्वरोक स्वीकार कोरनेन लायक एने ओसा कामे कोरने वावू ठेरावनेन कोशिश कोरतेला जू लोजित नी होये एने जुवे खोरला वचन काजे वारला रितीसी काममा लावतलु.

¹⁶ बाकीन भुंडली वात सी वाचीन रोय काहाकि ओसा माणसे एने बी नी भोक्ती कोरणे वावामा बोढता जासे.

¹⁷ एने तिंदरे वचन सोळला घावो सारखो फैलतो जासे हुमीनुयस एने फिलेतुस तिंदरे मायला छे.

¹⁸ जो यो कोयीन कि जीव उठनो होय गोयलो छे खोरलासी भोटकी गोयला छे, एने कोतरा विस्वास्या काजे उलटा पुलटा कोर देतला छे.

¹⁹ ते बी परमेश्वरोन पाकु पायु बोनतलु रोयतलु एने तीना पोर छापू लागलु रोयतलु “प्रभू आपनु काजे उवखतलु एने जो कुदू प्रभून नाव लेतलु चू अधोरमोन सी वाचीन रोये.”

²⁰ मोटला घोरमा नी निसतो सोनो चांदी पुन लाकळान एने धुवान ठाहरा भी रोयतला, काहना-काहना कामोन, एने काहना-काहना बिना कामोन कोरता.

²¹ ओगर कुदु आपना खुदो काजे इनुसी चुखो कोरसे, ती चू आदरोन ठाहरु एने चुखलो ठेहरसे एने मालकोन कामे आवसे एने हर एक वारला कामोन कोरता तीयार होयसे.

²² जुवानीन भुंडलो विचारसी ढास, एने जो चुखला मोनोसी प्रभून नाव लेतला तिंदरे साते धर्म एने भुरसू, एने मोंग एने मेव भेसकायनेन पिछा कोर.

²³ बाकीन बिन ओकल्यान ओकोल ओलोग से, काहाकि तुसेक मालूम छे कि इनापोरसी झोगळा पोयदा होयतला छे.

²⁴ प्रभून सेवक झगळा कोरने वावू नी होयनो जुवे बाकीन चू आखा साते नम्रता एने शिक्षामा हुशार एने सोहोन कोरणे वावू होयनो जुवे.

²⁵ चू खिलाप काजे नम्रतासी सोमजाडने, काय मालूम परमेश्वर तिंदरा मोन फिरावनेन मोन आपे कि चे बी खोरला काजे उवखे.

²⁶ एने तिंदरे लारे तेरी मोर्जी पुरी कोरनेन कोरता खुद पोर आवीन भुतडान फांदमा गोथा छुट जाय.