1 तीमथी 1 - बारेली पावरी

सुभेच्छा

¹ पौलुसनचा गोथू जू आमरू छुटकारू आपन्यु परमेश्वर एने आमरी आसोन लारे मसिह येसुन आग्यासी मसिह येसुन प्रेषितोन छे.

² तीमथीन नावे जो भुरसामा मारो खोरलु पुऱ्यो छे, परमेश्वर बास एने आमरू प्रभू येसु मसिहनचा गोथू तुसेक अनुग्रह, एने दया एने शांती जोळती रोये.

झुटी शिक्षान कोरता चेतावनी

³ जोसू मे तुसे काजे मकीदुनीयामा जाणेन टेमे समजाडलू होतु, कि इफिसुसमा रोयीण दिसरा माणसोक आग्या आपे कि दिसरा भातीन शिक्षा नी आपे.

⁴ एने तिनी काहानीन एने ओमोरकाईन पिढीपोर मोन नि लागाळे, जेरे पुठी झोगळू होयतलु छे, एने परमेश्वरोन तिना पुरतीन अनसारे नी, जो भुरसा पोर आधारित छे, तोसोत ओवी बी कोयो.

⁵ आग्यान निचोड यो छे कि वारलो मोन एने वारलो ग्यान एने बिना कपटीन भुरसासी मोंग पोयदा होये.

⁶ इनाक छुळीन कोतरा माणसे बकवास भूनी भोटकी गोयला छे.

⁷ एने शास्त्रध्यापक ते होयनेन कोरतेला छे पुन जी वात कोयतेला एने जीनुक हिंमतसी कोयतेला छे, हिनुक सोमझतला बी नी.

⁸ पुन आमु जानतला कि जर कोदि कुदू नियम काजे वारलो रितीसी कामोमा लावे ती वारलो छे.

⁹ यो जानीन कि वचन धोरमी माणसोन कोरता नी बाकीन अधोरमी निरंकुश, भोक्ती नी कोरण्या पापी, अपवित्र एने भुंडला माणसे, आसी बासाक मारणे वावा, हत्यारा,

¹⁰ व्यभिचारी, पुरुषगामियों, माणसो काजे वेचने वावू, एने इंदरे जागे खोरलु प्रचारोन आखा खिलाप वावान कोरता ठरावली छे.

¹¹ यो कि सोयावू परमेश्वरोन महिमान हीना वारली खोबरोन अनसारे छे जो मेसेक आपलो होतो.

पौलुसोन गोवायी

¹² मे मारा प्रभू येसु मसिहन जू मेसेक ताकत आपलु छे, धन्यवाद आपो कि होयू मेसेक भुरसान लायक सोमजीन, हेरी सेवान कोरता ठेरावलु.

¹³ मे ते पेहेल बुराई कोरणे वावू एने तोकलीत आपनेवावू एने आंदारो कोरणे वावू होतु; ते बी मार पोर दया होयली, काहाकि मे अविस्वासन हालोतमा बिना सोमजे यो काम कोरलु होतु.

¹⁴ एने आपना प्रभून अनुग्रह तिना भुरसान एने मोंग साथे जू मसिह येसुमा छे, घोनो सोवटा सी होयो.

¹⁵ यी वात खोरी एने होर भातीन माननेन लायक छे कि मसिह येसु पापी माणसोन छुटकारू आपनेन कोरता जोगोमा आव्यु, जिंदरेमा मे आखान मोटलु छे.

¹⁶ पुन मार पोर इनान कोरता दया होई कि मारेन तोसलू आखान मोटू पापीमा येसु मसिह तेरी पुरी सोहोन कोरणे वावू देखाळे, कि जे माणसे हिनापोर ओमोर जीवनोन कोरता भुरसू कोरसे हिंदरेन कोरता मे एक नमुना बोनो.

¹⁷ हिमी कायमोन राजा मतलब अविनाशी, नी देखतला चे, एक मात्र परमेश्वरोन आदर एने महिमा पिढ्यान पिढ्या होयती रोये. आमेन.

तीमथीन वारीस्दार

¹⁸ हे पुऱ्या तीमथी, इना भविष्यवाणीन अनसारे जो पेहेले तारा बारामा होयली होती, मे यी आग्या आपो कि तू हेरे अनसारे वारली लोळायी काजे लोळायतू रोय,

¹⁹ एने भुरसू एने हीना वारला ग्यान काजे धोर रोय, जीनाक छेटो कोरणे कोरता भुरसान ढोंड्यो डुब गोयी.

²⁰ हिनुमा गोथू हुमीनुयस एने सिकनदर छे, जीनाक मे भुतडा काजे आप देदलु छे, कि होया परमेश्वरोन बुराई कोरनो नी सिके.