1 कुरीन्थियो 13 - बारेली पावरी

मोंग मोटो छे

¹ ओगर मे माणसो पुठी सोरग दूतोन बुली बुलो एने मोंग नी कोरो, ती ठन-ठन वाजणे वावो पीतवो, एने झनझन वाजणे वावी झांज छे.

² एने ओगर मे भविष्यवाणी कोर सोको, एने आखा भेद एने आखा भातीन ग्यान काजे सोमजो एने मेसेक या तोक भुरसू छे कि बोयळा काजे छेटू कोर दिस, बाकीन मोंग नी कोरे, ती मे कायबी नी होय.

³ ओगर मे मारो आखो धोन गोरीबो काजे खावाळ दिस, नीती मारो डील आगठो धोपाळनेन कोरता आपदिस, एने मोंग नी कोरो, ती मेसेक काहीबी फायदु नी होय.

⁴ मोंग धीर धोरतली छे एने गिनाखी छे; एने मोंग हेवाय नी कोरतेली; मोंग आपनी खुदोन बोढाई नी कोरतेली, एने फुगतली नी, ची गैर शिस्त नी रोयतली,

⁵ ची नियम नी तूळतली, नी खुदोन भोलाई नी कोरतेली, झूलवायतली नी, भुंडो नी मानतली.

⁶ अधोरमोन कामोसी खुश नी होयतेली, बाकीन खोरलासी खुश होयतेली.

⁷ ची आखा वाते सोहोतली, आखा वातोन पारोख कोरतेली, आखा वातोन भुरसू कोरतेली, आखा वातोन धीर धोरतली.

⁸ मोंग कोबी टोवतली नी; भविष्यवाणी होसे ती सोर जासे; भाषा होसे ती सोर जासे; ग्यान होसे ती खोतम होय जासे;.

⁹ काहाकि आमरो ग्यान आदरीतो छे; एने आमरी भविष्यवाणी आदरीती छे;

¹⁰ बाकीन जेतार आखो पुरो यो आवसे, ती आदरीतो जो छे चो खोतम होय जासे.

¹¹ जेतार मे नानलु पुऱ्यु होतु, ती मे नानला पुऱ्यान तोसु बुलतू होतु, एने नानला तोसो मोन होतो एने पुऱ्यान तोसी सोमोज होती; बाकीन जेतार सोमोजदार होय गोयू ती नानला पुऱ्यान तोसी वाते छुळ देदू.

¹² हिमी आपनु आरसामा झिंजवायलो देखायतलो; बाकीन तिनी टेमे आमने सामने देखसे; इने टेमे मारो ग्यान आदलो छे, बाकीन तिनी टेमे ओसो पुरी रितीसी उवखती जोसू मे उवखाय गोयलु छे.

¹³ बाकीन हिमी भुरसू, आस, मोंग यो तीनु टेकनेवावी छे, पुन इनामा गोथी आखान मोटी मोंग छे.