Yuhaana 2 - Bible Fulfulde Bénin New Testament

Ɓangal der siire Kana

¹ Balɗe ɗiɗi ɓaawo mum, ɓangal waɗii e siire Kana, der leydi *Galili. Inna Yeesu e tawanoo ton.

² Yeesu e aahiiɓe mum bo noddinaama e jamaanu nu.

³ No *innabojam maɓɓe jacci, inna Yeesu wi'i mo: «Ɓe galaa innabojam.»

⁴ Yeesu toontii mo, wi'i: «Inna day, taa accu ka ɓillee. Wakkati am yottaaki taw.»

⁵ Den inniiko wi'i gollooɓe: «Ko o wi'i on fu, gaɗee.»

⁶ Looɗe jeego'o gaɗiraaɗe kaaƴe e tawaa ɗon. Diyam majje *Yahuduuɓe waɗiranno naŋarɗam gam laaɓingo ko'e mum, hande no diina maɓɓe bati. Looɗe ɗen, baaney mum fu e jaɓa ƴoogirɗe diyam sappo.

⁷ Yeesu wi'i ɓe: «Kebbinee payanɗe ɗen diyam.» Ɓe kebbini ɗe faa gaɓɓuɗe.

⁸ O wi'i ɓe: «Jooni kan, nyeɗee, jaaranee mawɗo ɓangal.» Ɓe nyeɗi.

⁹ No mawɗo ɓangal metti diyam baylitaaɗam innabojam ɗam, o annaa toy ɗam ƴiwi. Amma gollooɓe nokkoyɓe ɗam, e anni. O noddi jommanjo gorko,

¹⁰ o wi'i ɗum: «Himɓe fu innabojam belɗam woowi artirgo. To himɓe buusii, ko ɗam hewtay welugo sakitoree. Amma an, a resii belɗam ɗam faa jooni.»

¹¹ Non Yeesu waɗiri kaayeefi mum arandehi der siire Kana, der leydi Galili. Non o hollitiri baawɗe makko, go aahiiɓe makko goonɗini mo.

¹² Ɓaawo majjum o yahi Kafarnahum, kanko e inniiko, e miiraaɓe makko, e aahiiɓe makko. Ɓe jooɗii ton balɗe seɗɗa.

Yeesu riiwii tenkuuɓe der suudu Alla

¹³ No juulɗe *Yahuduuɓe bi'eteeɗe *Paska ɓadii, Yeesu yahi *Urusaliima.

¹⁴ Der suudu Alla, o tawi sippooɓe ga'i, e baali, e tantabaraaji, e cengotooɓe ceede, e jooɗii.

¹⁵ O etti ɓoggi o waɗi ɓoccol, o riiwi ɓe ɓe burtoo suudu Alla, kamɓe e baali, e ga'i. O sankiti ceede cengotooɓe, o hippi taaburuuji maɓɓe.

¹⁶ O wi'i sippooɓe tantabaraaji: «Burtinee ɗum, to on gaɗee suudu baaba am suudu tenkuru.»

¹⁷ Aahiiɓe makko siwtori ko winnaa e Dewte: «Yidde suudu maa e jaɓina ɓerne am.»

¹⁸ Den hooreeɓe *Yahuduuɓe wi'i mo: «Kaayeefi kiye gaɗataa ko kollaa men aa woodi laawol waɗugo nun nun.»

¹⁹ Yeesu toontii ɓe, wi'i: «Pusee suudu Alla ŋol ɗo, mi mahitinto ŋol der balɗe tati.»

²⁰ Ɓe toontii mo: «Suudu ŋol mahiraama duuɓi lasooji ɗiɗi e jeego'o, go an, bi'aa a mahitinto ŋol der balɗe tati na?»

²¹ Amma ɓannu makko nun o nandiniri suudu Alla.

²² No Yeesu finti, aahiiɓe mum siwtorii o batiino ɗum ka, go ɓe goonɗini Dewte e haala ka o batunoo.

Yeesu e anni ko woni e neɗɗo fu

²³ No Yeesu wonunoo *Urusaliima gam juulɗe *Paska, ɗuuɓɓe goonɗini inne makko gam ɓe ji'ii kaayeefi ɗi o waɗi.

²⁴ Amma Yeesu hoolaaki ɓe, gam oo anni ɓe ɓe fu.

²⁵ O bukaaka goɗɗo seedanoo mo ko woni e himɓe, gam oo anni ko woni der ɓerne neɗɗo.