Yaakuuba 3 - Bible Fulfulde Bénin New Testament

Waawugo ɗenŋal mum

¹ Banniraaɓe am, to ɗuuɓɓe mooɗon darta laataago janŋinooɓe. Gam oon anni menen janŋinooɓe, men kiitete e sariya ɓuruka naawugo.

² En fu een boofa e laabi ɗuuɗɗi. To woodi mo woofataa e haala mum, kanko laatii neɗɗo kebbuɗo, baawuɗo jogaago ɓannu mum fu.

³ Een gatta lagame e kunnuɗe pucci gam ɗi ɗowtanoo en; hande nun jaarirten ɓalli majji to jiɗuɗen fu.

⁴ Daaree laanaaji diyam: No ɗi mawniri e no keni mawɗi soggirta ɗi fu, e leggel pettel ɓoyloowo yaarirta ɗi to yiɗi fu.

⁵ Ɗenŋal bo hande nun laatii. Ŋal laati nun jokkulel pettel der ɓannu, amma eŋal juroro kujje mawɗe. Daaree! No binŋa mawniri fu, pittel yiite waawan ko sunnyi ɗe ɗe fu.

⁶ Ɗenŋal bo laati nun hande yiite, eŋal lomii der ɓannu, eŋal hawriti boneeji fu, eŋal soɓina ɓannu fu. E yiite jahannama ŋal huɓɓiraa eŋal sunnya gonki meeɗen fu.

⁷ Himɓe e waawi weeɓingo mareefuuji fu, pooli e ladoojum, faa e ko woni der diyam fu.

⁸ Amma ɗenŋal, goɗɗo waawataa ko weeɓini ɗum. Ɗenŋal e halli, ŋal jooɗataako joonne maggal, eŋal hebbi tooke bonɗe, barooje.

⁹ Kanŋal jettirten Joomiraawo laatiiɗo *Baaba meeɗen; kanŋal bo jaa'ortoɗen himɓe ɓe Alla tagi hande nandi muuɗum.

¹⁰ Yettoore e yaa'oore fu der hunnuko wooto kon wurtotoo. Banniraaɓe am, nun bane haani ɗum laatoo.

¹¹ E gooŋa, diyam belɗam e diyam kaaɗuɗam waawan ko ɓuli e ɓulirde woore na?

¹² Banniraaɓe: Ibbi waawan ko rimi ɓoye na? Mangohi waawan ko rimi ibbe na? Nunnun bo, ɓulirde haaɗune ɓulintaa diyam belɗam.

Hakkillo ƴiwuŋo to Alla

¹³ Mo hakkillo e faamu na'on caka mooɗon na? Joomum hollita ɗum e yaadu geetol, der waɗugo gaɗu geetu e yakkinaare e hakkillo.

¹⁴ Amma to kaajal e nawniraagu cattuŋu na'on der ɓerɗe mooɗon, to on mawnitee, oon pewana gooŋa.

¹⁵ Iri hakkillo ŋoo ɗon waray diga to Alla. E duuniyaaru ɗo ŋo ƴiwi, diga miilooji neɗɗo e to *Seyɗan ŋo ƴiwi.

¹⁶ Gam to nawniraagu e kaajal woni, ɗon laawontirgo e kalluɗum fu tawetee.

¹⁷ Amma aran hakkillo ƴiwuŋo to Alla e laaɓi, ɓaawo mum ŋoo wadda jam, ŋoo heewi ɗiggere, e enɗam, ŋo riman golle booɗɗe. Gooduɗo hakkillo iri ŋon seennontirtaa himɓe. Munaafitaare walaa e makko.

¹⁸ Yiɗuɓe jam e aawa jam, to ɓe jahi fu foonnitaare ɓe ruggata.