Matiye 4 - Bible Fulfulde Bénin New Testament

Seyɗan jarbake Yeesu

¹ Ɓaawo majjum, *Ruuhu Ceniiɗo yaari Yeesu der haro gam *Ibiliisa jarboo mo.

² O suumii nyaloomaaje lasoy ɗiɗi e jemmaaje lasoy ɗiɗi. Den, rafo waɗi mo.

³ Ɗon Jarbotooɗo on ɓattii mo, wi'i: «To a laati nun *Ɓiɗɗo Alla, batu kaaƴe ɗee ɗo waylitoo peen.»

⁴ Yeesu toontii mo, wi'i: «E winnaa: ‟Neɗɗo wuurirtaa e peen tan, amma e haala burtiika diga hunnuko Alla fu .”»

⁵ *Ibiliisa yaari mo wanŋarde seniine, ɓili mo dow suudu Alla to ɓuri towugo.

⁶ Den o wi'i mo: «To a laati nun *Ɓiɗɗo Alla, fittu koɗaa ley, gam e winnaa der dewtere, Alla batan malaykaaɓe mum ɓe taɓɓee e juuɗe maɓɓe gam to koyɗe maa fergoo kaaƴe .»

⁷ Yeesu toontii mo, wi'i: «Dewtere wi'i kade: ‟Taa jarba Alla Joomiraawo maa”.»

⁸ *Ibiliisa yaari mo kade dow waanne towune puy. O holli mo laamaareeji duuniyaaru fu e tedduŋal majji.

⁹ Den o wi'i mo: «Mi hokkete huune ɗum fu, to a jiccake cujidanɗaa am.»

¹⁰ Yeesu toontii mo, wi'i: «Dillu diga ɗon, an *Ibiliisa, gam e winnii der dewtere: ‟Sujidan Alla Joomiraawo maaɗa, kanko tan teddintaa!”»

¹¹ Den Ibiliisa acci mo, go malaykaaɓe ɓattii e jagganoo mo.

Yeesu waajake der leydi Galili

¹² No Yeesu nani Yuhaana gaɗoowo *batisi nanŋaama, wattaa der kasu, o witti leydi *Galili.

¹³ O eggi Nasaratu, o jooɗoy Kafarnahum, takkol fonŋo maayo Galili, hakkune jeyde leydi Jabulon e Neftali.

¹⁴ Hande non haala ka annabi *Esaaya batunoo hebbiri, o wi'i:

¹⁵ ‟Leydi Jabulon e leydi Neftali, jooɗiini takkol maayo, fonŋo Urdun, Galili, an laatiini jooɗorde himɓe ɓe lenyi janani.

¹⁶ Himɓe tawaaɓe der niwre, yi'ii jayŋol manŋol. Jooɗiiɓe e leydi maayde, niɓɓuni, jayŋol yaynanii ɗum .”

¹⁷ Diga wakkati majjum, Yeesu fuɗɗi waajaago e wi'a: «Tuubee, gam *Laamaare Alla ɓattike.»

Aahiiɓe Yeesu arandeeɓe

¹⁸ No Yeesu woosotoo takkol fonŋo maayo *Galili, o yi'i suuɓotooɓe liƴƴi ɗiɗo, Simon, noddeteeɗo Piyer, e minyum Andere, e faɗɗa taaruuji mum der maayo.

¹⁹ Yeesu wi'i ɓe: «Tokkee am, mi waɗan on suuɓotooɓe himɓe.»

²⁰ Ɗon maa ɗon ɓe acci taaruuji maɓɓe, ɓe tokki mo.

²¹ O yahi yeeso, o yi'i rindaaɓe ɗiɗo der laana, Yaakuuba e minyum Yuhaana, ɓiɓɓe Jebede. Kamɓe e baaba maɓɓe, ɓee moƴƴina taaruuji maɓɓe. O noddi ɓe.

²² Ɗon maa ɗon, ɓe acci laana ŋan e baaba maɓɓe, ɓe tokki mo.

Yeesu e waajoo, e nyawta himɓe

²³ Yeesu woositii leydi *Galili fu. Oo janŋina der cuuɗi *baajorɗi, oo waajoo *linjiila dow *Laamaare Alla, oo nyawta himɓe ɓe nyawuuji feere feere, e toorotooɓe.

²⁴ Habaru makko sankitii der leydi Siriya fu. Ɓee gaddana mo nyawɓe nyawuuji feere feere, hande ɓe ginnaaji toorata, e yanooɓe paɗɗe, e moofiɗinɓe, o nyawti ɓe.

²⁵ Jama'aare ɗuunne e tokki mo. Ɓe ƴiway maa diga leydi Galili, e ɓaadeere Genniije Sappo, e *Urusaliima, e Yahudiya, e fonŋo maayo Urdun.