Marku 8 - Bible Fulfulde Bénin New Testament

Yeesu nyaannii himɓe ujune nayo

¹ Wakkati mum, jama'aare ɗuunne hawriti kade to Yeesu. No ɓe galaa ko ɓe nyaama, o noddi aahiiɓe makko, o wi'i ɓe:

² «Himɓe ɓee e yurminoo am, gam hanne waɗi balɗe tati ɓee gondi e am, ɓe galaa ko ɓe nyaama.

³ To mi waynake ɓe ɓe koota, ɓe nyaamay goɗɗum, rafo doƴƴan ɓe e laawol, gam woɓɓe maɓɓe ƴiwii to woɗɗi.»

⁴ Aahiiɓe makko toontii mo, wi'i: «Toy keɓoyten ko nyaanneten ɓe der ladde ɗo?»

⁵ O ƴami ɓe, o wi'i: «Peen noy gooduɗon?» Ɓe bi'i mo: «Peen jeeɗiɗo men goodi.»

⁶ Der majjum, o umuri jama'aare nen jooɗoo e leydi. O etti peen jeeɗiɗo kon, o yetti Alla, o ŋappiti ko, o hokki aahiiɓe makko ɓe ceennana jama'aare. Ko ɓe ceennani ɓe.

⁷ Ɓe goodunoo kade likkon petton seɗɗa. Yeesu barkiɗini Alla gam makkon, wi'i aahiiɓe mum seenna kon, kankon bo.

⁸ Ɓe nyaami faa ɓe kaari. Aahiiɓe hawriti ko horii, ɗum hebbi killaaje jeeɗiɗi.

⁹ Himɓe ɓen waɗii ujune nayo. Ɓaawo majjum, Yeesu waynii ɓe.

¹⁰ Ɗon maa ɗon o naatidi e aahiiɓe makko laana diyam ɓe jahi leydi Dalmanuuta.

Farisaaɓe wi'ii Yeesu holla ɓe maane kollitoore Alla e yerdii ɗum

¹¹ Ɗon *Farisaaɓe woɓɓe wari, fuɗɗi e yeddontira e Yeesu, ɓe jarbii mo ɓe bi'i: «Waɗu maane ƴiwoore diga kammu.»

¹² Yeesu uumi der der, wi'i: «Gam ume waɗi ko himɓe hanne e daarta holleego maane? Mii bata on e gooŋa: on keɓataa maane gom!»

¹³ Ɓaawo majjum, o acci ɓe, o naati laana diyam, o joli fonŋo far to.

Ƴuufinirdi Farisaaɓe

¹⁴ Aahiiɓe yeggiti ko yooɓii peen, peen goota tan ɓe kororii der laana kan.

¹⁵ Yeesu waggini ɓe, wi'i: «Kakkilee, paamanee *ƴuufinirdi *Farisaaɓe e ni *Eroodu.»

¹⁶ Aahiiɓe ɓen darii e badda e wi'a gam en galaa peen acci o wi'i ɗum.

¹⁷ Yeesu anniti ka ɓe batata, wi'i ɓe: «Ko waɗi oon batana dullere mooɗon peen? E gooŋa faa jooni on paamay? Oon wumuɓe ɓerɗe na?

¹⁸ Oon goodi gite, on ji'ataa na? Oon goodii noppi, on nanataa na? E gooŋa on ciwtoray

¹⁹ no ceennanmi himɓe ujuneeje joy peen joyo, killaaje noy kebbinɗon koriiko?» Ɓe toontii mo, ɓe bi'i: «Killaaje sappo e ɗiɗi.»

²⁰ O ƴami ɓe kade, o wi'i: «No cenanmi himɓe ujune nayo peen jeeɗiɗo, killaaje noy kebbinɗon koriiko?» Ɓe toontii mo, ɓe bi'i: «Killaaje jeeɗiɗi.»

²¹ Den, o wi'i ɓe: «Faa jooni on paamataa na?»

Yeesu wuntinii bunɗo

²² Ɓe jottii Baytisayda, Yeesu waddanaa bunɗo, ɓe eeli mo, o meema mo.

²³ O nanŋi junŋo bunɗo on, o yaari mo sera, ɓaawo majjum, o sirƴi joode e gite makko, o yowi juuɗe dow makko, o ƴami mo: «Aa yi'a goɗɗum na?»

²⁴ Bunɗo on fattini gite mum, wi'i: «Mii yi'a himɓe, hande leɗɗe jahooje.»

²⁵ Yeesu yowitii juuɗe mum e gite makko, den o nyawtii, o wunti, o yi'i huune fu deydey.

²⁶ Yeesu wi'i mo: «Hootu, amma taa wittu der siire nen.»

Piyer wi'ii Yeesu woni Almasiihu

²⁷ Ɓaawo majjum, Yeesu e aahiiɓe mum yahi ci'e ɓadiiɗe Kaysariya Filippu. Dow laawol o ƴami aahiiɓe makko o wi'i: «Moy himɓe wi'ata mii laatii?»

²⁸ Ɓe toontii mo, ɓe bi'i: «Woɓɓe e wi'a Yuhaana gaɗoowo batisi nun, woɓɓe bo e wi'a annabi *Eliya nun, woɓɓe e wi'a kade, gooto der annabiiɓe nun.»

²⁹ O ƴami ɓe, o wi'i: «Onon bo na, moy bi'oton mii laatii?» Piyer toontii mo, wi'i: «An woni *Almasiihu.»

³⁰ Yeesu waggini ɓe wi'i to ɓe batu haala ka goɗɗo.

Yeesu waɗii annabaaku maayde e pintol mum arandeere

³¹ O fuɗɗi janŋingo ɓe o wi'i: «Doole *Ɓii neɗɗo tooree tooraaji ɗuuɗɗi, *dottiiɓe e hooreeɓe *limaamiiɓe e *moodiɓɓe tawreeta woppan mo, o waree, ɓaawo balɗe tati o finta.»

³² O bati ɓe ka o laaɓini, ko Piyer yaari mo sera, fuɗɗi wooltango mo.

³³ O yeeƴitii, o daari aahiiɓe makko, o falmi Piyer, o wi'i: «Woɗɗam an *Seyɗan! Gam miilooji maa ƴiway to Alla, to himɓe ɗi ƴiwi.»

No haani Yeesu tokkiree

³⁴ Ɓaawo majjum, o noddi jama'aare e aahiiɓe makko, o wi'i ɓe: «Jiɗɗo tokkugo am fu, acca miilango hoore mum, etta palaaŋal mun, tokkanmi .»

³⁵ Gam jiɗɗo hisingo yonki mum, dullan ki, amma majjinɗo ki sabbu am e sabbu *linjiila, hisinan ki.

³⁶ To neɗɗo riibake duuniyaaru fu, go dulli yonki mum, ume ɗum nafi mo?

³⁷ Ume neɗɗo hokkata, gam sooditoroo yonki mum?

³⁸ Neɗɗo fu centuɗo am, e haala am yeeso hakkeeɓe ɓee ɗo, accuɓe Alla, min, *Ɓii neɗɗo bo, mi sentan joomum to mi wardii e malaykaaɓe seniiɓe der tedduŋal baaba am.»