Marku 7 - Bible Fulfulde Bénin New Testament

Yeesu jaɓay tawaaŋal kaakiraaɓe dow lootugo juuɗe

¹ *Farisaaɓe woɓɓe der *moodiɓɓe tawreeta, ƴiwoyɓe *Urusaliima hawritii to Yeesu.

² Ɓe ji'i woɓɓe caka aahiiɓe makko e nyaamira juuɗe coɓuɗe, ɗe lootaaka.

³ Gam *Farisaaɓe e *Yahuduuɓe horiiɓe fu nyaamataa, lootay juuɗe mum no haaniri, tawaaŋal kaakiraaɓe maɓɓe ɓe tokki.

⁴ To ɓe gartii luumo, ɓe nyaamataa to ɓe lootaaki. Ɓee goodi tawaaɗum goɗɗum ɗuuɗɗum ko ɓe tokki, hande jom layɓugo jarirkon, e payanɗe, e keeɗe janni boɗeeri.

⁵ Go *Farisaaɓe e *moodiɓɓe tawreeta ƴami Yeesu, wi'i: «Ume waɗi go aahiiɓe maa tokkay tawaaŋal kaakiraaɓe meeɗen, ɓee nyaamira juuɗe coɓuɗe?»

⁶ O toontii ɓe, o wi'i: «Onon munaafitiiɓe. Annabi Esaaya woofay no o winnuno annabaaku dow mooɗon o wi'i: Alla wi'i: ‟Lenyol ŋol ɗo e hunnuko tan nun teddinirtammi, amma ɓerɗe maɓɓe e woɗɗodii am.

⁷ Baanji ɓe cujidirantammi, ɓee janŋina haalaaji himɓe.”»

⁸ Yeesu wi'i ɓe kade: «On joofii umurooje Alla, oon tokki tawaaŋal himɓe.

⁹ Ehee! Oon baawi calaaɗe umurooje Alla gam jooɗinon tawaaŋal mooɗon!

¹⁰ Gam Muusa wi'ii: ‟Teddin baaba maa e inna maa.” O wi'i kade: ‟Jennuɗo baaba mum, naa bo inna mum, o hiitee kiita wareego.”

¹¹ Amma onon kan, oon bi'a: ‟To neɗɗo wi'ii baaba mum naa bo inna mum: Ko haanuno wallirgo maa laatake Korbaan, ɗum wi'ay maa sadaka Alla,”

¹² on accataa kade o walla baabiiko naa bo inniiko e majjum.

¹³ Hande nun biisirɗon haala Alla e tawaaŋal mooɗon. Kade bo oon gaɗa kujje ɗuuɗɗe nanduɗe hande nun.»

Ko soɓinta neɗɗo.

¹⁴ Ɓaawo majjum, Yeesu nodditii jama'aare, wi'i ɓe: «Kettinanee am on fu, paamon:

¹⁵ Walaa goɗɗum ko naatata der neɗɗo soɓina mo, amma huune ko wurtoto diga der neɗɗo, kanjum soɓinta mo.

¹⁶ Gooduɗo noppi gam nana fu sey nana.»

¹⁷ No Yeesu seerti e jama'aare, o naati suudu, aahiiɓe makko ƴami mo maana ballool ŋol.

¹⁸ O wi'i ɓe: «Onon bo on paamataa na? On annaa ko ƴiwata yaasi, naata der neɗɗo, soɓintaa joomum na?

¹⁹ Gam ɗum naatay der ɓerne joomum, e reedu ɗum naati, kade bo ɗum wurtoto.» E haalaaji ɗin Yeesu seniri nyanduuji fu.

²⁰ O wi'i kade: «Ko wurtoto diga der ɓerne nun soɓinta neɗɗo.

²¹ Gam diga der ɓerne neɗɗo miilooji bonɗi ƴiwata, ɗi gatta mo waɗugo ko jaasi, e guyka, e warugo neɗɗo,

²² e jeenu, e suuno, e ganyaani, e jamma, e baadi centiniini, e nawniraagu, e nyoore, e mawnitaare, e dullere hoore.

²³ Kujje bonɗe ɗee fu der ɓerne neɗɗo ɗe ƴiwata, ɗe coɓina mo.»

Debbo Sirofininkeejo goonɗinii Yeesu

²⁴ Yeesu ummii ɗon yahi leydi Tirus. O weeri e wuro goɗɗo, o yiɗaano baa goɗɗo nanana mo, amma o waaway ko suuɗii.

²⁵ Ɗon sikan debbo gom mo ɓinŋel mum dewel woodi ginnool nani Yeesu e batanee, ɗon maa ɗon o wari, o jiccanii mo.

²⁶ Debbo on Yunaninkeejo nun, mo lenyol Sirofiniikiiɓe. O eeli Yeesu riiwa ginnool ŋol, wurtoo e ɓiyiiko.

²⁷ Amma Yeesu wi'i mo: «Accu sukaaɓe haara taw, gam ettugo nyaamdu sukaaɓe hokka dawaaɗi wooɗaa.»

²⁸ Debbo on toontii mo wi'i: «Moodibbo, dawaaɗi gonuɗi ley taaburu bo e nyaama nyaamdu sukaaɓe caamooru.»

²⁹ Yeesu wi'i mo: «Sabbu ka bi'uɗaa, hootu, ginnool ŋol wurtake e ɓiya.»

³⁰ Nunnun o hootiri, o tawi ɓiyiiko e fukkii dow leeso, ginnool ŋol wurtii e mum.

Yeesu nyawtii paho mo haala mum laaɓaa

³¹ Yeesu ummii diga leydi Tirus, tokki e Sidon e far maayo *Galili, o yahi caka leydi Genniije sappo.

³² Ɓe gaddani mo paho gom mo haala mum laaɓaa, ɓe eeli mo o yowa juuɗe dow makko.

³³ Yeesu wurtini mo caka jama'aare, watti kollel mum der noppi makko, tuuti joode, meemiri ɗe ɗenŋal makko.

³⁴ Ɓaawo majjum, o tiggitii dow, o uumi, o wi'i paho on: «Efata! Kan woni sukkita!»

³⁵ Ɗon maa ɗon, noppi gorko on sukkitii, ɗenŋal makko tonŋitii, o bati deydey no batirtee.

³⁶ Yeesu waggini himɓe to ɓe batu haala ka goɗɗo, amma hande no o wagginirta ɓe, nunnun ɓe ɓeydi batirgo ka himɓe.

³⁷ Haynaare waɗi ɓe puy, ɓee bi'a: «Golle makko fu e wooɗi. Oo waɗa pahiɗinɓe nana, muumiɗinɓe bo bata.»