Marku 6 - Bible Fulfulde Bénin New Testament

Yeesu salaama der Nasaratu.

¹ Yeesu ummii diga nokkuure nen e aahiiɓe mum, nanŋi laawol, hooti genni mum.

² *Nyalaane siwteteene yottii, o fuɗɗi janŋingo der waajorde. Nanuɓe janŋinol makko fu haaynaare nanŋi ɗum, darii e wi'a: «Diga toy o heɓi ɗum ɗo? Noy o heɓiri hakkillo iri ŋo ɗo? Noy o waawiri ko waɗi kaayeefiiji ɗii?

³ E gooŋa kanko bane woni ceɓoowo leɗɗe, ɓii Mariyama on na? Hinaa kanko woni mawniraawo Yaakuuba e Yoses e Yahuuda e Simon na? Enen e sakikiraaɓe makko bane jooɗodii ɗo na?» Gam ɗum ɗon fu waɗi ko ɓe jaɓay goonɗingo mo.

⁴ Yeesu wi'i ɓe: «Annabiijo teddintaake der leydi mum e caka himɓe wuro mum.»

⁵ O waaway ko waɗi ɗon kayniiɗum gom, to hinaa nyawɓe seɗɗa ɓe o nyawti no o yowi ɓe juuɗe.

⁶ Haynaare waɗi mo sabbu dullere goonɗinki maɓɓe. Ɓaawo mum, Yeesu e woosito der genniije piiltitiiɗi ton, oo janŋina.

Yeesu lilii aahiiɓe sappo e ɗiɗo

⁷ O noddi aahiiɓe makko sappo e ɗiɗo, o lili ɓe ɗiɗɗiɗo. O hokki ɓe baawɗe dow ginnaaji,

⁸ o wi'i ɓe, to ɓee jaha, to ɓe jaaru goɗɗum, to hinaa sawru, to ɓe jaaru nyaamdu, naa bo bogooji, naa bo ceede der jiibaaji maɓɓe.

⁹ O wi'i, ɓe paɗoo, amma to ɓe ɓornoo toggooje ɗiɗi.

¹⁰ O wi'i ɓe kade: «Wuro ŋo jippiɗon e mum fu, jooɗee ɗon faa de jawtuɗon.

¹¹ To on jottake nokkuure gom, ko himɓe jaɓɓaaki on, ɓe kettinanaaki on, jawtee, piɗɗon collaaje koyɗe mooɗon gam ɗum annina ɓe gacce ko ɓe gaɗi.»

¹² Ɓe jahi, ɓe baajii himɓe ɓe acca hakkeeji maɓɓe ɓe tuuba,

¹³ ɓe diiwi ginnaaji ɗuuɗɗi, ɓe moomi nyawɓe ɗuuɓɓe nebbam, ɓe nyawti ɓe.

No Yuhaana gaɗoowo batisi wariraa

¹⁴ *Eroodu, laamiiɗo, nani haala Yeesu e batee, gam inne Yeesu walaa fu to yahay. Woɓɓe e wi'a Yuhaana gaɗoowo *batisi nun finti, kan waɗi oo woodi baawɗe waɗugo haaynaareeji.

¹⁵ Woɓɓe e wi'a Eliya nun, woɓɓe bo e wi'a annabiijo gom nun hande annabiiɓe arandeeɓe.

¹⁶ No Eroodu nani ka, wi'i: «Yuhaana mo cettunoomi hoore mum on finti!»

¹⁷ E gooŋa Eroodu wi'iino Yuhaana nanŋee, haɓɓee, maɓɓee der kasu. Gam Erodiya, debbo mawniiko bi'eteeɗo Filippu mo o teetunoo.

¹⁸ Gam Yuhaana wi'iino mo: «Laawol hokkay maa teetaa debbo mawna.»

¹⁹ Go Erodiya wanyi Yuhaana, yiɗi o waree, amma o heɓay laawol,

²⁰ Eroodu e hula Yuhaana, gam oo anni gorko on poonnitiiɗo nun, laaɓuɗo, kan waɗi oo reeni mo. Oo yiɗa nanugo haala makko, amma de o nani ka fu, sey hakkillo makko wemmoo.

²¹ Amma e non, Erodiya heɓi laawol no nyalaane juulɗe dingol *Eroodu yottii. Eroodu noddini mawɓe tawaaɓe ley mum e hooreeɓe soogeeji, e dawranooɓe leydi *Galili fu nyaanɗe.

²² Ɓii Erodiya debbo naati e fija. Ɗum weli Eroodu e noddinaaɓe mum fu. O wi'i suka debbo on: «Eelam ko jiɗuɗaa fu, mi hokkete ɗum.»

²³ O hunanii mo, o wi'i o hokkan mo huune fu ko o eeli, baa to feccere laamu makko nun.

²⁴ Suka debbo on wurti, ƴami inna mum, wi'i: «Ume nun haani mi eela?» Inniiko toontii mo, wi'i: «Hoore Yuhaana gaɗoowo *batisi!»

²⁵ Ɗon maa ɗon suka debbo on witti to laamiiɗo, bati mo wi'i: «Mii yiɗi kokkaa am jooni hoore Yuhaana gaɗoowo batisi der heeɗo!»

²⁶ Ɓerne laamiiɗo on biisii sanne, amma o yiɗay ko salanii mo, gam o hunake yeeso noddinaaɓe makko.

²⁷ Ɗon maa ɗon o lili soogeeru makko yaha waddaa hoore Yuhaana. Soogeeru nun yahi, naati der kasu, setti hoore Yuhaana,

²⁸ watti ne der heeɗo, wari hokki suka debbo on. Suka debbo on bo hokki ne inna mum.

²⁹ No aahiiɓe Yuhaana nani ɗum, wari etti ɓannu makko uwoy.

Yeesu nyaannii himɓe ujune joyo.

³⁰ Lilaaɓe ɓen warti, ɓe kawriti to Yeesu ɓe pillanii mo ko ɓe gaɗi, e ko ɓe janŋini fu.

³¹ Himɓe warooɓe to maɓɓe e hootooɓe ɗuuɗi faa Yeesu e aahiiɓe mum heɓay wakkati ɓe nyaama. Gam majjum o wi'i ɓe: «En jahee nokkuure deƴƴune, gam keɓen ciwtoɗen.»

³² Ɓe jahi ɓe naatoy laana diyam, kamɓe tan feere maɓɓe, ɓe jawti far ladde.

³³ Amma ɗuuɓɓe yi'ii ɓee jawta, anniti ɓe, ummii diga genniije fu e dogga e koyɗe e tokkini ɓe, arti ɓe yottaago to ɓe poonnii.

³⁴ No o wurti e laana kan, o yi'i jama'aare ɗuunne, o yurmaa ɓe, gam ɓee nandi hande baali ɗi galaa duroowo. O darii oo janŋina ɓe kujje ɗuuɗɗe.

³⁵ No kiikiiɗe faanii, aahiiɓe makko ɓattii mo, wi'i: «Hiirii, kade bo nokkuure to gonɗen ɗo, ladde nun.

³⁶ Accu himɓe ɓen sankitoo der debeeje e ci'e piiltitiiɗe gam ɓe cooda ko ɓe nyaamata.»

³⁷ Yeesu toontii ɓe, o wi'i: «Onon e ko'e mooɗon, kokkee ɓe, ɓe nyaama!» Ɓe bi'i: «Aa yiɗi men etta ceede *cardi keme ɗiɗi men coodanaa ɓe peen ɓe nyaama na?»

³⁸ O wi'i ɓe: «Peen noy gooduɗon? Jahee daaruwe!» No ɓe jahi ɓe daaroy, ɓe bi'i mo: «Peen joyo e liƴƴi ɗiɗi men goodi.»

³⁹ O wi'i ɓe jooɗina jama'aare ukke ukke dow fuɗo hecco.

⁴⁰ Ɓe jooɗii ɓe gaɗi ukke ukke, woɓɓe hewre, woɓɓe lasooji ɗiɗi e sappo.

⁴¹ O etti peen joyo e liƴƴi ɗiɗi ɗin, o tiggitii dow kammu, o yetti Alla. O ŋappiti peen kon, o hokki aahiiɓe ɓe jeɗa himɓe. Hande nun o waɗi e liƴƴi ɗiɗi ɗin bo.

⁴² Ɓe fu ɓe nyaami faa ɓe kaari.

⁴³ Peen koriiko e liƴƴi koriiɗi hawritaa, hebbi killaaje sappo e ɗiɗi.

⁴⁴ Himɓe nyaamuɓe peen kon waɗii worɓe ujune joyo.

Yeesu yahii dow diyam.

⁴⁵ Ɓaawo mum Yeesu yawɗini aahiiɓe mum ɓe naata laana diyam, gam ɓe ardoo mo ŋabboygo fonŋo maayo far Baytisayda, wakkati mum kanko e hoore makko oo waynoo jama'aare.

⁴⁶ No o waynodii ɓe, o yawtiri far to waanne gam o du'o.

⁴⁷ Tawi jemma waɗi, laana kan e woni caka maayo, go Yeesu tan e woni fonŋo.

⁴⁸ O yi'i aahiiɓe makko e duurida e laana diyam gam hennu kol ɓe pottata. No ɓadii weetugo, o wari to maɓɓe oo yaha e koyɗe dow diyam, faa o yiɗi settaago ɓe.

⁴⁹ No ɓe ji'i mo oo yaha dow diyam, ɓe miili ginnool nun, ɓe darii ɓee kalɓa.

⁵⁰ Gam no ɓe ji'i mo, ɓe fu ɓe kuli, ɗon maa ɗon Yeesu baddi ɓe wi'i: «Pukkinee hakkilooji mooɗon! Min nun, to on kulee!»

⁵¹ O naati laana kan, o tawi ɓe, ko hennu kol darii. Ɓe jiɓii sanne.

⁵² Ɓe paamayno kaayeefiwol ŋol Yeesu waɗi e peen, gam ko'e maɓɓe e yoori.

Yeesu nyawtii nyawɓe der leydi Genesaret

⁵³ Ɓe joli maayo ɓe jotti leydi Genesaret, ɓe darni laana maɓɓe ɗon.

⁵⁴ Ɓe burtii e laana, kan nun himɓe anniti mo,

⁵⁵ To ɓe nanii o na'on nokkuure kaja, himɓe e ummoo toy fu e leydi nin e wadda nyawɓe mum to makko dow daage.

⁵⁶ To Yeesu yahi fu, diga e ci'e pamare faa e genniije mawɗe e gureeje, himɓe e waddana mo nyawɓe mum der jaayri wuro, ɓee eela mo o acca ɓe meema baa kommulol toggoore makko, nunnun bo, meemuɓe ŋol fu e yoofoo.