Marku 5 - Bible Fulfulde Bénin New Testament

Yeesu nyawtii mo ginnool

¹ Ɓe jottii fonŋo maayo, ley leydi Gerasankeeɓe.

² No Yeesu wurtii laana, ɗon maa ɗon gooduɗo ginnool wurtii der caabeeje, fotti e makko.

³ Der caabeeje ɗen nun o wonnoo, goɗɗo waawataa ko haɓɓi mo, baa e callalluwol.

⁴ De ɗuuɗɗum o tonŋano e callaluuji, amma o taƴi ɗi, o helti leɗɗe ɗe o gadoranoo. Walaa baawɗo ko haggi mo e semme.

⁵ Wakkati fu, jemma e nyalooma, der caabeeje e baalle nun o woni, oo huuɓa oo ƴaritoo e kaaƴe.

⁶ No o hollirii Yeesu, o doggoy, o sujidani ɗum,

⁷ o halɓi e semme, o wi'i: «Yeesu, *Ɓiɗɗo Alla mo dow, ume jiɗuɗaa waɗugo am? Mi eelee gam Alla, taa tooram!»

⁸ O batii ka gam Yeesu wi'ii: «An ginnool bonkol, wurta e makko.»

⁹ Yeesu ƴami mo, wi'i: «Noy bi'eteɗaa?» O toontii, o wi'i: «Min wi'etee ‟ujuneeje”, gam emen ɗuuɗi.»

¹⁰ O eeli Yeesu o eeliti to riiwu ginnaaji ɗin e leydi nin.

¹¹ Foti wakkati mum, darne afaaji mawne gom e durannoo takkol waanne.

¹² Ginnaaji ɗin eeli Yeesu acca ɗi naata der afaaji ɗin.

¹³ O nootanii ɗi. Ginnaaji ɗin wurti, naati e afaaji ɗin. Darne nen fu dirtii diga takkol waanne, ɗi jantoy der maayo, ɗi joolii. Ɗi gaɗii hande kanji ujune ɗiɗi.

¹⁴ Den durooɓe doggi batoy der siire e gureeje mum. Himɓe wurtoy daarugo ko waɗi.

¹⁵ No ɓe gari to Yeesu, ɓe ji'i ginnaajiijo on e jooɗii e ɓornii gineeji, hakkillo mum e fukkii, go kulol nanŋi ɓe.

¹⁶ Tawaaɓe ɗon ko ɗum waɗii, fillanii ɓe ko tawi ginnaajiijo on e afaaji ɗin.

¹⁷ Ɓe eeli Yeesu wurtoo e leydi maɓɓe.

¹⁸ No o naatata laana diyam, ginnaajiijo on eeli mo gam tokka mo.

¹⁹ Amma Yeesu nootanaaki mo, wi'i mo: «Hootu wuro maa to getti maa, bataa ɓe ko Joomiraawo waɗan maa e no o yurmori maa.»

²⁰ O yahi oo bata der leydi bi'eteeni genniije sappo ko Yeesu waɗani mo. Ɓe fu ɓe kayɗinii.

Yeesu nyawtii suka Jayrus e debbo meemuɗo gineeji makko.

²¹ No Yeesu naati laana witti fonŋo maayo, jama'aare ɗuunne wari e howii ɗum kade fonŋo ɗon.

²² Ɗon hooreejo suudu waajorde bi'eteeɗo Jayrus wari, yi'i mo, jiccii yeeso makko,

²³ eeli mo, eelitii, wi'i: «Ɓiyam debbo yanɗaa, faanake maayugo. War yowu mo junŋo maa, gam o yanɗita, o wuura!»

²⁴ Yeesu yawtidi e makko, jama'aare ɗuunne tokki mo faa ɓee ɓilla mo.

²⁵ Debbo mo lefol mum ilata diga duuɓi sappo e ɗiɗi e wonnoo caka maɓɓe.

²⁶ O toorake sanne der juuɗe nyawtooɓe ɗuuɓɓe faa jawdi makko heennyi, amma ɗum hoynay, sey ko ɓeydii.

²⁷ Den o nanani habaru Yeesu e batee, o naati caka jama'aare.

²⁸ Gam o miili der ɓerne makko o wi'i: «To mi meemii baa toggoore makko tan, mi yoofoto.» O ƴiwi ɓawɓawre, o meemi toggoore Yeesu.

²⁹ Ɗon maa ɗon ƴiiƴam haggii ilugo e makko, o maati o yoofake.

³⁰ E wakkati on, Yeesu maati der mum no semme gom wurtake e mum, o yeeƴitii hakkune jama'aare, o wi'i: «Moy meemi toggoore am?»

³¹ Aahiiɓe makko wi'i mo: «A yi'ii no jama'aare ɓillir maa, go aa ƴama: ‟Moy meemu maa?”»

³² Amma o darii oo daarta meemuɗo mo.

³³ Go debbo on e diwna sabbu kulol gam oo anni ko o waɗi, o wari o jiccii yeeso makko o bati mo gooŋa laaɓuka.

³⁴ Yeesu wi'i mo: «Ɓiyam debbo, goonɗinki maa nyawtii maa. Hootu jam! A yoofake e nyaw maa!»

³⁵ Yeesu heennyay batugo, ko woɓɓe ƴiwuɓe wuro Jayrus, hooreejo waajorde wari, wi'i mo: «Ɓiya maayi, gam ume go aa ɓilla moodibbo kade?»

³⁶ Amma Yeesu waɗay ka haala maɓɓe, wi'i Jayrus: «Taa hulu, goonɗin tan!»

³⁷ O accay goɗɗo yaada e makko to hinaa Piyer e Yaakuuba e Yuhaana, miiraawo Yaakuuba.

³⁸ Ɓe jottii wuro hooreejo waajorde, go Yeesu tawi ɗon himɓe e fiya buubuuraaji e Simoo e wulla, e semme.

³⁹ No o naati, o wi'i ɓe: «Ume waɗi ko oon bulla, oon kalɓa? Suka on maayay, o ɗaani nun.»

⁴⁰ Ɓe jali mo jaleeɗe yawaaare. Den o wurtini ɓe ɓe fu, o naatidi e baaba suka on e inna mum e aahiiɓe tato ɓen suudu to suka on fukkii.

⁴¹ O nanŋi junŋo makko, o wi'i: «Talita kuumi!» Ɗum wi'ay maa ɗon: «Suka debbo emi wi'ee: Umma!»

⁴² Ɗon maa ɗon suka on ummii e yaha. Duuɓi makko waɗii sappo e ɗiɗi. Himɓe ɓen haaynaare nanŋi ɗum sanne.

⁴³ Yeesu waggini ɓe to ɓe annin ka goɗɗo. O wi'i ɓe kokka suka on nyaamdu.