Marku 4 - Bible Fulfulde Bénin New Testament

Ballool aawoowo

¹ Yeesu e janŋina kade takkol fonŋo maayo. Jama'aare ɗuunne wari e howii mo, o soltii ɓe gam ɗuuggal maɓɓe, o naati laana, o jooɗii. Laana kan e tawaa der maayo, jama'aare fu e woni fonŋo.

² Oo janŋina ɓe kujje ɗuuɗɗe e ballaaji, oo wi'a ɓe:

³ «Kettinee! Aawoowo gom nun wurti aawoygo.

⁴ De o sankata awdi makko, awdi gonni yani e laawol. Pooli wari soppi ni.

⁵ Gonni bo yani e kaaƴe to leydi ɗuuɗaa, fuɗi ɗon maa ɗon, gam leydi majjum luggaa.

⁶ Amma no naaŋe nyawli, ŋe wuli ni, ni yoori gam ni walaa ɗaɗi.

⁷ Gonni kade yani to gi'e woni. Ni fuɗidi e majje, ɗe ommi ni, ni rimay.

⁸ Gonni bo yani to leydi geeri, ni fuɗi, ni mawni, ni rimi. Gonni waɗi gite laso e sappo, gonni lasooji tati, gonni hewre.»

⁹ Ɓaawo majjum, Yeesu wi'i: «Gooduɗo noppi gam nanugo fu nana!»

Ko acci Yeesu batiri e ballaaji.

¹⁰ No Yeesu woni feere mum, tokkiiɓe mo der sappo e ɗiɗo ɓen ƴami mo maana ballool ŋol.

¹¹ O wi'i ɓe: «Onon, on kokkaama asiiri *Laamaare Alla, amma ɓe yaasi, e ballaaji nun ɗum waranta ɓe.

¹² Gam ‟baa ɓee daara, to ɓe ji'u, baa to ɓee nana to ɓe paamu, gam to ɓe tuubu, ɓe jaafee.”»

Yeesu e faantina ballool aawoowo

¹³ Den Yeesu wi'i ɓe: «On paamay ballool ŋol na? Den noy paamirton ballaaji goɗɗi?

¹⁴ Aawoowo on haala Alla nun aawata.

¹⁵ Himɓe woɓɓe e nandi e laawol to haala kan yani: Ɓe nanan ka, den ɗon maa ɗon *Seyɗan wara, ikkina haala aawaaka e maɓɓe.

¹⁶ Woɓɓe e nandi e kaaƴe to awdi yani. Ɓe nanan haala kan, ɓe jaɓa ka law e belɗum ɓerne.

¹⁷ Amma ka walaa ɗaɗi der maɓɓe, wakkati gooti tan ka wonata e maɓɓe. To ɓillaare tawii ɓe naa bo toora gam haala kan fu, ɓe bittira ɓawɓawre.

¹⁸ Woɓɓe e nandi e nokkuure gi'e to awdi nin yani, kamɓe woni nanuɓe haala kan,

¹⁹ amma miilooji duuniyaaru, e jarbeeji jawdi, e suuno heɓugo huune ɗuuɗɗum naata e maɓɓe, omma haala kan, ka laatoo dimara.

²⁰ Amma woɓɓe e nandi e awdi januni e leydi geeri, kamɓe woni nanuɓe haala kan, jaɓi ka. Ɓe diman ɓikkol: Woɓɓe laso e sappo, woɓɓe lasooji tati, woɓɓe hewre.»

Ballool fitilla

²¹ Ɓaawo majjum, Yeesu wi'i ɓe: «Moy huɓɓata fitilla yaha omma ka e killaal naa bo o sorna ka ley banni? Joomum ɓilataa ka dow to fitilla ɓillete na?

²² Walaa ko suuɗi ko wurtintaake, walaa bo siirijum ko wurtintaake.

²³ Gooduɗo noppi gam nanugo fu nana!»

²⁴ O wi'i ɓe kade: «Kakkilee e ko nanoton! Etorde etirɗon, kayre nun ettiranteɗon, on ɓeydante bo.

²⁵ Gam gooduɗo fu ɓeydante, amma mo woodaa, baa seɗɗa ko o woodi teetete.»

Ballool no awdiiri fuɗirta

²⁶ O wi'i ɓe kade: «*Laamaare Alla nandi e goɗɗo aawuɗo awdi e gesa mum,

²⁷ Oo ɗaani, naa bo oo fini jemma e nyalooma, awdi nin fuɗan, mawna, joomum annataa no ni mawnirta.

²⁸ Leydi e hoore mum fuɗinta ni, arande, ni waɗa ƴomme, den cammeeje, ɓaawo mum ni watta gite.

²⁹ To ko aawaa ɓennii, o rugga awdi makko, gam wakkati mum yottake.»

Ballool ɓinŋel mutaadihi

³⁰ Yeesu tokkii wi'ugo: «Ume nanditinirten *Laamaare Alla? E ballool ŋole paaminirten ŋu?

³¹ Laamaare Alla e nandi e ɓinŋel mutaadihi. Ɓinŋel mutaadihi ɓuri awdiiji leydi fu faanɗugo.

³² Amma to ŋel aawaama, ŋel mawnan ŋel waɗan licce mawɗe, ŋel ɓura awdiiji kara fu mawnugo, faa pooli kammu jooɗoo ley ɗoogi maggel.»

³³ E ballaaji ɗuuɗɗi hande ɗii ɗon nun Yeesu waajorii himɓe haala Alla, jaka no ɓe baawi faamugo.

³⁴ O waajoraaki goɗɗum to hinaa e ballaaji, amma de o horii kanko e aahiiɓe makko tan, oo faamina ɓe huune fu.

Yeesu deƴƴitini hennu cattukol.

³⁵ Nyalaane nen, kiikiiɗe mum, Yeesu wi'i aahiiɓe mum: «En jolee fonŋo maayo far to.»

³⁶ Ɓe acci jama'aare, ɓe jawtini mo e laana ka o woni e mum, laanaaje goɗɗe bo e tokki ɓe.

³⁷ Ɗon hennu cattukol ummii, galmaaji diyam e fiya laana kan, faa ka yiɗi hebbugo diyam.

³⁸ Yeesu e ɗaani ɓaawo laana, oo wawlii wawlaare. Ɓe pinnini mo, ɓe bi'i: «Moodibbo, en kalkii, a faalaaka na?»

³⁹ O ummii, o falmi hennu kol, o wi'i: «Jeeɗa, maayo bo, deƴƴu.» Hennu kol deƴƴi, jam mawɗo waɗi.

⁴⁰ Ɓaawo majjum, o wi'i ɓe: «Ume waɗi ko kuluɗon? Faa hanne on goonɗinay na?»

⁴¹ Ɓe kuli kulol cattuŋol ɓe bi'ontiri: «Moy nun iri gorko oo ɗo, faa hennu e maayo fu e ɗowtanoo mo?»