Marku 16 - Bible Fulfulde Bénin New Testament

Yeesu fintii

¹ *Nyalaane siwteteene yawti, go Mariyama mo Magadala e Mariyama inna Yaakuuba e Salome, soodi nebbam luuttoojam, waddi gam mooma ɓannu Yeesu.

² Nyaanne alal, rewɓe ɓen wari to yenaane diga subaka kecco de naaŋe fuɗi.

³ Ɓe darii ɓee bi'ontiranno: «Moy tallitanta en hayre nen e dammugal saabeere?»

⁴ Amma no ɓe ɓanti gite, ɓe ji'i hayre nen tallitaama, baa no ne mawniri fu.

⁵ Wakkati ɓe naati e saabeere nen, ɓe ji'i gojankeejo e jooɗii takkol nyaamo, e ɓornii gineeji daneeji, ɓe kuli puy.

⁶ O wi'i ɓe: «To on kulee! Yeesu mo Nasaratu tigganooɗo mo daartoton on finti. O walaa ɗo. Nokkuure to o fukkinanoo nani.

⁷ Jooni kan, jahee, bi'ee aahiiɓe makko e, Piyer o ardoto on *Galili, ton ji'oton mo, hande no o wi'unoo on.»

⁸ Rewɓe ɓen wurti e saabeere, ɓe doggi ɓee diwna sabbu kulol. Ɓe batay goɗɗo gokka gam kulol. [

Yeesu hollitii hoore mum Mariyama mo Magadala

⁹ Ɓaawo no Yeesu finti, nyaanne alal subaka, Mariyama mo Magadala, mo o wurtini ginnaaji jeeɗiɗi e mum, o arti o holliti hoore makko.

¹⁰ O yahi o batoy wondunooɓe e Yeesu, tawi ɓee cunaa, ɓee bulla.

¹¹ No ɓe nani o fintii, Mariyama bo yi'ii mo, ɓe goonɗinay.] [

Yeesu hollitii hoore mum Aahiiɓe ɗiɗo

¹² Ɓaawo majjum, o hollitanake aahiiɓe makko ɗiɗo e ɓannu gonŋol no ɓe nanŋi laawol ɓee jaha siire gom.

¹³ Kamɓe bo ɓe batoy horiiɓe, amma ɓe goonɗinay.] [

Yeesu hollitanake Aahiiɓe mum sappo e go'o

¹⁴ Ɓaawo mum o hollitanake aahiiɓe sappo e go'o, to ɓe nyaamata, o wooltani ɓe sabbu dullere goonɗinki maɓɓe e yoorugo ɓerɗe maɓɓe, gam ɓe jaɓay ka yi'uɓe mo seedii ɓaawo no o finti.

¹⁵ O wi'i ɓe: «Jahee der duuniyaaru fu, baajoɗon tagaaɗo fu *linjiila.

¹⁶ Goonɗinɗo ko waɗi *batisi fu hisan, mo goonɗinay fu, Alla hiitoto ɗum.

¹⁷ Goonɗinɓe waɗan kaayeefiiji ɗii ɗo: Ɓe diiwan ginnaaji e inne am, ɓe batan ɗelle kese,

¹⁸ ɓe nanŋan bolle e juuɗe maɓɓe, baa to ɓe jarii tooke, goɗɗum waɗataa ɓe, ɓe jowanan nyawɓe juuɗe, ɓe joofoo.»] [

Yeesu eencii to Alla

¹⁹ Ɓaawo no Yeesu Joomiraawo baddi e maɓɓe, o eencinaa dow kammu, o jooɗii nyaamo Alla.

²⁰ Amma aahiiɓe makko dillii e waajoo *linjiila toy fu. Joomiraawo e wondi e maɓɓe, o tabbitiniri waaju maɓɓe e hokkugo ɓe waɗugo kaayeefiiji ɗi baawɗe.]