Marku 15 - Bible Fulfulde Bénin New Testament

Yeesu yeeso Pilaatu

¹ Subaka kecco diga law, *hooreeɓe limaamiiɓe e *dottiiɓe e *moodiɓɓe tawreeta, kamɓe e *dawrooɓe ɓen fu, ɓe dawridi. Ɓe kaɓɓi Yeesu, ɓe jaari mo ɓe kokkoy Pilaatu.

² Pilaatu ƴami mo wi'i: «An woni laamiiɗo *Yahuduuɓe na?» O toontii mo o wi'i: «Hande no bi'uɗaa.»

³ *Hooreeɓe limaamiiɓe gaccorii mo kujje ɗuuɗɗe.

⁴ Pilaatu ƴamitii mo kade wi'i: «A toontataako gokka na? A nanay ka ɓe gaccortee fu na?»

⁵ Amma Yeesu toontaaki gokka, faa ɗum haaynii Pilaatu.

Yeesu hiitaama waree

⁶ Der juulɗe fu, Pilaatu e woowi yoofitango ɓe maɓɓaaɗo gooto mo himɓe yiɗi.

⁷ Gorko bi'eteeɗo Barabbas hawtii e woɓɓe, ɓe ummini fitina ɓe bari goɗɗo. Ɓe nanŋaa ɓe maɓɓaa der kasu gam ko ɓe gaɗi.

⁸ Jama'aare yahi to Pilaatu, ƴami mo o waɗana ɓe ko o woowi waɗango ɓe.

⁹ O toontii ɓe, o wi'i: «Oon jiɗi mi yoofitana on laamiiɗo *Yahuduuɓe na?»

¹⁰ Gam oo annii hooreeɓe *limaamiiɓe waddanii mo Yeesu gam sabbu nawniraagu.

¹¹ Amma ɓe gaɗi jama'aare ƴama Pilaatu yoofitana ɓe Barabbas.

¹² Pilaatu toontii kade, wi'i ɓe: «Den ume jiɗuɗon mi waɗana mo bi'oton laamiiɗo *Yahuduuɓe?»

¹³ Ɓe boolitii e semme, ɓe bi'i: «Tiggu mo dow leggal palaaŋal!»

¹⁴ Pilaatu ƴami ɓe wi'i: «Ko boni ume o waɗi?» Ɓe ɓeydi woolo e semme ɓe bi'i: «Tiggu mo dow *leggal palaaŋal!»

¹⁵ No Pilaatu e yiɗi welingo ɓerɗe jama'aare, o yoofitani ɓe Barabbas, ɓaawo majjum o wi'i Yeesu fiyee looci, o hokki mo soogeeji tigga mo dow leggal palaaŋal.

Soogeeji jaancii Yeesu

¹⁶ Soogeeji yaari mo naannoy der fageere laamorde Pilaatu, ɓe kawriti soogeeji fu.

¹⁷ Ɓe ɓorni mo gulunfaare woɗeere, ɓe canyi gi'e, ɓe baalontiri, ɓe kuunini mo hande meetalol.

¹⁸ Ɓee canna mo, ɓee bi'a: «Alla woonnane, an laamiiɗo *Yahuduuɓe.»

¹⁹ Ɓe piyi mo kewol dow hoore, ɓe tuuti mo joode, ɓe jiccii, ɓee cujidana mo.

²⁰ Ɓaawo no ɓe jaanci mo, ɓe ɓorti gulunfaare woɗeere nen, ɓe ɓorni mo gineeji makko, ɓe pooɗi mo, ɓe jaari yaasi ɓe tiggaa dow *leggal palaaŋal.

No Yeesu tiggiraa dow leggal palaaŋal

²¹ Dow laawol ɓe potti e gorko gom bi'eteeɗo Simon, mo Sirene, baaba Aleksandire e Rufus, e warta diga nokkun. Soogeeji dooli mo o wakkoo leggal Yeesu palaaŋal.

²² Ɓe jaari Yeesu nokkuure wi'eteene Golgota. Kan woni: «Nokkuure laalagal hoore.»

²³ Ɓe gaddani mo innabojam jillontiraaɗam e *miir gam o yara, amma o jaɓay.

²⁴ Ɓe tiggi mo dow *leggal palaaŋal, ɓe ceenniri gineeji makko e fiɗugo tete, gam ɓe anna ko moy fu heɓata .

²⁵ Wakkati ɓe tiggi mo, janni jeenay subaka nun.

²⁶ Ɓe binniino dow alluwal daliila ko waɗi o tiggaa, ɓe takki: «Laamiiɗo *Yahuduuɓe»

²⁷ Ɓe tiggidi mo e fasotooɓe ɗiɗo, gooto nyaamo makko, gooto nano makko. [

²⁸ Ɗum tabbitinii ko Binni ceniini wi'i: «O lintaama hakkune halluɓe.»]

²⁹ Waruɓe Daarugo fu e dimma ko'e mum e yenna mo e wi'a: «An bi'unooɗo a pusan suudu Alla, mahitoɗaa ŋol der balɗe tati ,

³⁰ faaba hoore maa, jippa diga leggal palaaŋal ŋal!»

³¹ Hande nun, hooreeɓe *limaamiiɓe janciri mo, e *moodiɓɓe tawreeta, ɓee bi'ontira hakkune maɓɓe: «O faabake woɓɓe, amma o waaway ko faabii hoore makko!

³² Ɓee bi'a, *Almasiihu, laamiiɗo Isira'iila jippoo jooni diga *leggal palaaŋal, men ji'a den men goonɗinan mo!» Fasotooɓe ɗiɗo ɓe o tiggidaa bo e yenna mo.

Maayde Yeesu

³³ Caka nyalooma niwre waɗi e leydi nin fu, faa yotti yanne tati kiikiiɗe.

³⁴ Wakkati yanne tati kiikiiɗe, Yeesu halɓi e semme, wi'i: «Eloyi, Eloyi, lama sabaktani ?» Kan woni: «Alla am, Alla am! gam ume accuɗaa am?»

³⁵ Woɓɓe der dariiɓe ɗon no nani ɗum, wi'i: «Kettinee, oo nodda *Eliya!»

³⁶ Den goɗɗo doggi, suuwi soosuuji der jaram lammuɗam, haɓɓi e sawru, ɓattini ɗam e hunnuko Yeesu gam o ɓiccinoo, den o wi'i: «Accee daaren naa Eliya waran jippina mo!»

³⁷ Yeesu halɓi e semme, maayi.

³⁸ Den wudere suudu Alla serkitii diga dow faa ley.

³⁹ Hooreejo soogeeji dariiɗo yeeso makko yi'i no o maayiri, wi'i: «E gooŋa, oo ɗo laati nun *Ɓii Alla!»

⁴⁰ Rewɓe woɓɓe e dariino e yurnoo. Der maɓɓe: Mariyama mo Magadala, e Mariyama inna Yaakuuba pettel, e Yoses, e Salome.

⁴¹ Ɓee tokkunoo mo ɓee gollanoo mo diga o wonnoo *Galili. Rewɓe woɓɓe kade yaadunooɓe e makko faa *Urusaliima e wonnoo ɗon.

Uwol Yeesu

⁴² Nyalaane nen, nyalaane siriyanaago *nyalaane siwteteene nun.

⁴³ Kiikiiɗe mum, Yusufu mo Arimatiya wari, o laati nun mawɗo, tedduɗo caka dawriine *Yahuduuɓe, kanko bo oo heɗinoo garki *Laamaare Alla. Kan waɗi o suusi o yahi to Pilaatu, o eeli o hokkee ɓannu Yeesu.

⁴⁴ Haynaare nanŋi Pilaatu no o nani Yeesu maayi law, o noddi mawɗo soogeeji, o ƴami mo, o maayi ko?

⁴⁵ No mawɗo soogeeji bati mo Yeesu maayii, o nootanii Yusufu etta ɓannu kol.

⁴⁶ Yusufu yahi soodi wudere sannyiraane gaaraaji geeti, o jippini ɓannu Yeesu, o suddi mo ne, o yaari o fukkinoy der yenaane wasaane der hayre. Ɓaawo mum, o talliti hayre mawne, o maɓɓiri dammugal yenaane nen.

⁴⁷ Tawii Mariyama mo Magadala e Mariyama inna Yoses e darii, e daara to Yeesu uwetee.