Marku 14 - Bible Fulfulde Bénin New Testament

Dabare nanŋol Yeesu

¹ Balɗe ɗiɗi horii go juulɗe *Paska e juulɗe peen ko *ƴuufinaaka yottoo. *Hooreeɓe limaamiiɓe e *moodiɓɓe tawreeta e daarta no ɓe nanŋirta Yeesu e dabare.

² Amma ɓe bi'i: «To en gaɗu ɗum wakkati juulɗe, gam to himɓe ummin fitina»

Yeesu moomaama wardi

³ No Yeesu wonnoo Baytaniya, wuro Simon ceccefo. O jooɗii oo nyaama, ɗon debbo gom naati, e jogii faanu gaɗiraaŋol hayre *albaatiri kebbuŋol wardi laaɓuɗam, ɗam *naardi, luuttoojam, ɗam ceede ɗuuɗɗe. Debbo on pusi daane faanu ŋol, waanji wardi ɗam dow hoore Yeesu.

⁴ Woɓɓe ɓerni e wi'ontira hakkune mum: «Gam ume o biisi wardi ɗam hande ni?

⁵ Ɗam waaweteno ko sippaa ko ɓuri ceede cardi keme tati, ceede ɗen hokkee talakaaɓe!» Ɓe darii ɓee booltana debbo on.

⁶ Amma Yeesu wi'i ɓe: «Accee mo! Ume o waɗi ko oon booltana mo? Ko o waɗani am e wooɗi.

⁷ Gam talakaaɓe e wondi e mooɗon baadey fu, de jiɗuɗon fu on baawan ko waɗani ɓe moƴƴere, min kan, mi wondataa e mooɗon baadey fu.

⁸ O waɗii ko o waawi. O waanji am wardi go mi uwee.

⁹ Mii bata on e gooŋa: to *linjiila waajetee e duuniyaaru nuu fu, ko debbo on waɗi batante, o siwtorte bo.»

Yahuuda e daarta laabi no jammortoo Yeesu

¹⁰ Yahuuda Iskariyot, gooto der aahiiɓe sappo e ɗiɗo, yahi to *hooreeɓe limaamiiɓe gam o watta Yeesu der juuɗe maɓɓe.

¹¹ No ɓe nani ka, ɓerɗe maɓɓe welii sanne, ɓe kaɓɓani mo alkawru ɓe kokkan mo ceede. Diga wakkati majjum oo daarta wakkati pottuki de o jammotoo Yeesu.

Hiraane Paska

¹² Nyalaane arandeere der juulɗe peen ko *ƴuufinaaka, der ne ɓe boowunoo hiisugo jawgiiji *Paska, aahiiɓe Yeesu ƴami mo, wi'i: «Toy jiɗuɗaa men jaha men ciryanee hiraane juulɗe Paska?»

¹³ Den o lili aahiiɓe makko ɗiɗo, o wi'i ɓe: «Jahee siire nee to, on pottan ton e gorko dooniiɗo faanu diyam, tokkee mo.

¹⁴ Wuro ŋo o naati fu, bi'on jom wuro ŋon: ‟Moodibbo wi'ii toy suudu to o nyaamata hiraane juulɗe Paska e aahiiɓe makko?”

¹⁵ O hollan on suudu dowrowol manŋol, moƴƴinaaŋol faa wooɗi, ton ciryotoɗon hiraane nen.»

¹⁶ Aahiiɓe ɓen yahi, naati siire nen, ɓe tawi huune ɗum fu hande no Yeesu wi'i ɓe, ton ɓe ciryii hiraane *Paska.

¹⁷ No hiirii, Yeesu waridi e sappo e ɗiɗo.

¹⁸ No ɓe jooɗii ɓee nyaama, Yeesu wi'i: «Mii bata on e gooŋa: Gooto mooɗon nyaamidoowo e am jammoto am .»

¹⁹ Ɗum laatanii aahiiɓe ɓen biisere ɓerne, ɓe darii ɓee ƴama mo gooto gooto, moy fu e wi'a: «Hinaa min bane?»

²⁰ O toontii ɓe, o wi'i: «Der onon sappo e ɗiɗo ɓen, gooto mon, tummidoowo junŋo mum e am der nyaarude nun.

²¹ E gooŋa *Ɓii neɗɗo maayan hande no winnaa der dewte, amma bone woodani jammotooɗo Ɓii neɗɗo! To o rimaakano ɗum ɓurananno mo wooɗugo!»

Kirtaari ceniini

²² No ɓe nyaamata, Yeesu etti peen, yetti Alla, ŋappiti ŋa, hokki ɓe, wi'i: «Jaɓee, kanjum woni ɓannu am.»

²³ Ɓaawo majjum, o etti jarirgel *innabojam, o yetti Alla, o hokki ɓe, ɓe fu ɓe jari.

²⁴ Den o wi'i ɓe: «Kanjum woni ƴiiƴam am, ƴiiƴam kaɓɓoojam alkawal kesal, deƴƴitintooɗam gam himɓe ɗuuɓɓe.

²⁵ Mii bata on e gooŋa: mi yarataa innabojam kade faa nyalaane de jaranmi ɗam kesam der *Laamaare Alla.»

²⁶ Ɓaawo ɓe jimi jabuuraaji ɓe keenyi, ɓe burtii, ɓe jahi waanne Jaytuuje.

²⁷ Yeesu wi'i ɓe: «On fu on accan am, gam e winnaa e Dewtere: ‟Mi fiyan duroowo, mi wara mo, den baali sankitoo.”»

²⁸ Amma Yeesu wi'i: «To mi fintii, mi artan on *Galili.»

²⁹ Piyer wi'i mo: «Baa to ɓe fu ɓe accii maa, min kan mi accataa maa.»

³⁰ Yeesu wi'i mo: «Mii batee e gooŋa: jemmaare hanne, go jakaraari jogga de ɗiɗi a wi'an de tati a annaa am.»

³¹ Piyer bati, tabbitini, wi'i: «Baa to doole nun mi maayida e maa, abada mi wi'ataa mi annaa maa.» Aahiiɓe ɓen fu wi'i hande nun.

Du'aare Yeesu der Gesemane

³² Ɓe jottii nokkuure wi'eteene Gesemane, o wi'i aahiiɓe makko: «Jooɗee ɗo, faa mi waɗaa du'aare.»

³³ O yaadi e Piyer e Yaakuuba e Yuhaana, o fuɗɗi maatugo kulol, o jiɓii.

³⁴ O wi'i ɓe: «Biisere ɓerne sattanii am faa e yiɗi warugo am. Gonee ɗo, to on ɗaane.»

³⁵ O yahi yeeso seɗɗa, o yani o hippii e leydi, o du'ii gam wakkatiire toora kaa woɗɗodoo mo, to waɗoto.

³⁶ O wi'i: «Yaa Abba, *baaba! Huune fu waɗoto e maa, woɗɗinanam jarirgel toora ka, amma to ɗum laatoo hande no jiɗirmi min, sey no an jiɗirɗaa.»

³⁷ O wittoy, o tawi ɓe ɓee ɗaani. O wi'i Piyer: «Simon, a ɗaani nun na? A waaway ko hiiri baa janni goori?

³⁸ To on ɗaane, du'ee gam to jarbeeji tawa on. Ɓerne neɗɗo e yiɗi ɗowtaago, amma ɓannu e tampi.»

³⁹ O witti kade, o du'i e boliiɗe goote ɗen.

⁴⁰ O wittoy, o tawi ɓe ɗaanitake, gam ɗoyŋol e jogii ɓe. Ɓe keɓay ka ɓe toontotoo mo.

⁴¹ O wittoy de tatawre, o wi'i ɓe: «On ɗaanoyto ciwtoɗon? Heƴii nun! Wakkati warii! *Ɓii neɗɗo wattete e juuɗe hakkeeɓe.

⁴² Ummee jawten! Nani jammotooɗo am e wara.»

Nanŋoore Yeesu

⁴³ Yeesu heennyay batugo, ko Yahuuda, gooto der aahiiɓe makko sappo e ɗiɗo yottii e himɓe ɗuuɓɓe jogiiɓe kaafaaje e cabbi. *Hooreeɓe limaamiiɓe, e *moodiɓɓe tawreeta e *dottiiɓe nun lili ɓe.

⁴⁴ Jammotooɗo mo on tintiniino ɓe maane, wi'i: «Neɗɗo mo cannumi fu, kanko woni joomum. Nanŋee mo, kawjoɗon mo jaaron.»

⁴⁵ Yahuuda yottii, ɓattii mo, wi'i: «Moodibbo!» Sanni mo no wooɗi,

⁴⁶ ɓe nanŋi mo ɓe jogii.

⁴⁷ Gooto der dariiɓe ɗon solti kaafaahi mum, jabbi maccuɗo hooreejo limaamiiɓe, setti nowru.

⁴⁸ Yeesu wi'i ɓe: «Min garuɗon nanŋugo e kaafaaje e cabbi hande pasotooɗo na?

⁴⁹ Mii wondi e mooɗon nyalaane fu der suudu Alla mii janŋina, on nanŋay am. Amma ɗum waɗii gam ko winnaa e dewte hebba.»

⁵⁰ Den aahiiɓe fu doggi acci mo.

⁵¹ Gojankeejo gom e waanino wudere e tokki Yeesu, ɓe nanŋi mo,

⁵² o yoofiti wudere, o doggi funtu.

Yeesu yaaraama yeeso *Dawrooɓe

⁵³ Ɓe jaari Yeesu to *hooreejo limaamiiɓe, go hooreeɓe limaamiiɓe e *dottiiɓe, e *moodiɓɓe tawreeta fu hawritii.

⁵⁴ Piyer e tokkini mo ɓaawo, faa o naati der fageere wuro hooreejo limaamiiɓe. O jooɗodii e soogeeji, oo aytinoo yiite.

⁵⁵ Hooreeɓe limaamiiɓe e *dawrooɓe fu e daarta seedotooɓe gacce makko gam o waree, amma ɓe keɓay.

⁵⁶ Ɗuuɓɓe e seedo fewre dow makko, anni haala maɓɓe nanŋontiray.

⁵⁷ Woɓɓe seedi fewre dow makko, wi'i:

⁵⁸ «Men nanii o wi'i o pusan suudu Alla mahiraakol e juuɗe, den der balɗe tati, o mahitoo kesol ŋol mahiraaka e juuɗe.»

⁵⁹ Amma baa dow kaa ɗon, ɓe nannantiray.

⁶⁰ Hooreejo limaamiiɓe ummii darii hakkune jama'aare, ƴami Yeesu wi'i: «A toontataako gokka na? A nanay ka ɓe ceedotoo dow maa na?»

⁶¹ Amma oo jeeɗi, o toontaaki gokka. Hooreejo limaamiiɓe on ƴamitii mo kade, wi'i: «An woni *Almasiihu *Ɓiɗɗo Alla Barkiɗinaaɗo na?»

⁶² Yeesu toontii mo, wi'i: «Ee, min woni kanko. On ji'an bo *Ɓii neɗɗo e jooɗii nyaamo Jom baawɗe, on ji'an mo oo wara diga dow kammu der duule .»

⁶³ Den hooreejo limaamiiɓe serkiti toggoore mum, wi'i: «En kaajaaka seedeeɓe woɓɓe kade.

⁶⁴ On nanii kalluka ka o toontii. Ume ji'uɗon?» Ɓe fu ɓe bi'i, oo haani wareego.

⁶⁵ Woɓɓe maɓɓe fuɗɗi tuutugo mo joode, ɓe koomi yeeso makko, ɓee piya mo, ɓee bi'a: «Tinta, moy fiyu ma?» Go soogeeji e fiya mo meeƴe.

Piyer yeddii, wi'i o annaa Yeesu

⁶⁶ Wakkati Piyer woni der fageere wuro, korɗo *hooreejo limaamiiɓe yottii.

⁶⁷ No o yi'i Piyer e aytinii, o tiggi mo gite, o wi'i: «An bo, aa wondunoo e Yeesu mo Nasaratu.»

⁶⁸ Amma Piyer yeddi mo, wi'i: «Mi annaa, mi faamay bo ka batataa.» Ɓaawo majjum, Piyer yahi far dammugal wuro. Den jakaraari joggi.

⁶⁹ No korɗo on yi'i mo, bati dariiɓe ɗon kade, wi'i: «Oo ɗo laati nun gooto maɓɓe!»

⁷⁰ Piyer yeddi kade. Ɗon maa ɗon darinooɓe ɗon wi'i Piyer: «Seko fu walaa, a laati nun gooto maɓɓe, gam a Galilinkeejo nun.»

⁷¹ Amma Piyer fuɗɗi hunaago wi'i: «Alla hiito am to mi fewii. Mi annaa gorko mo batanton haala mum on sam!»

⁷² Den jakaraari joggi de ɗiɗawre, Piyer siwtori ko Yeesu wi'unoo ɗum: «Go jakaraari jogga laabi ɗiɗi, a wi'an de tati a annaa am.» O darii oo wulla.