Marku 13 - Bible Fulfulde Bénin New Testament

Pusol suudu Alla e keenyol duuniyaaru

¹ No Yeesu wurtii suudu Alla, aahiijo makko gooto wi'i mo: «Moodibbo, daaru no kaaƴe wooɗiri, mahiraaɗe maadi booɗuni!»

² Yeesu toontii mo, wi'i: «Hande no ji'irɗaa maadi nin wa'i ɗon fu, hayre yowataako dow wonne, ɗum fu ɗum pusete.»

Boneeji e tooraaji

³ Ɓaawo mum Yeesu yahi jooɗoy dow waanne Jaytuuje, o tiitii suudu Alla yeeso, Piyer e Yaakuuba e Yuhaana e Andere yahi to makko kamɓe tan, ƴami mo, wi'i:

⁴ «Batu men dey ɗum waɗata, e maane ney hollitinta no wakkati kujje ɗen fu faanake.»

⁵ Yeesu wi'i ɓe: «Kakkilanee ko'e mon gam to goɗɗo majjin on.

⁶ Ɗuuɓɓe wariran inne am, wi'a kamɓe woni *Almasiihu. Ɓe majjinan ɗuuɓɓe.

⁷ To on nananii konuuji e rimmo konuuji, to on kulee, gam doole ɗum laatoo, amma timmoode duniyaaru bane ɗon taw.

⁸ Lenyol ummanto lenyol gonŋol, laamu ummanto laamu gonŋu, dimmaaɗe leydi e rafooji waɗan der nokkuuje goɗɗe. Kanjum woni fuɗɗoode ŋatawre.

⁹ Kakkilanee ko'e mooɗon, gam himɓe nanŋan on yaara kiitorɗe, on piyete der baajorɗe, ɓe darnan on yeeso hooreeɓe e laamiiɓe gam sabbu am, on laatanto am seedeeɓe yeeso maɓɓe.

¹⁰ Haani lenyi fu waajee taw *linjiila.

¹¹ To ɓe nanŋii on ɓe jaarii yeeso hiitotooɓe, to on miijee ka batoton. To wakkati mum warii, on keɓan ka batuɗon. Gam onon bane batata, amma *Ruuhu Ceniiɗo.

¹² Neɗɗo hokkitiran banniraawo mum, gam o waree, baabiraaɓe bo waɗanan ɓiɓɓe mum hande nun. Ɓiɓɓe bo ummanto saareeji mum waɗa ɓe baree.

¹³ Himɓe fu wanyan on gam sabbu am. Amma munyuɗo faa timmoode, hisan.»

Huune nyidduɗum

¹⁴ Yeesu wi'i kade: «On ji'an karmuɗum nyidduɗum e darii e nokkuure to haanay ɗum daroo, sey janŋoowo dewtere nen faama.» Den kan, tawaaɓe der Yahudiya fu, sey dogga foonnanoo baalle .

¹⁵ Tawaaɗo dow suudu, to jippoo etta goɗɗum der maggol.

¹⁶ Tawaaɗo gese bo, to wittu wuro ettaa gulunfaare mum.

¹⁷ Bone laatanto gaamɓe e musinteeɓe der nyalaaɗe ɗen!

¹⁸ Eelee Alla gam to ɗum laatoo wakkati dabbune.

¹⁹ Gam der nyalaaɗe mum ɓillaare mawne waɗan, ne hande mum meeɗay ko laatii diga fuɗɗoode, de Alla tagi duuniyaaru. Iri mayre bo laatataako faa abada.

²⁰ To Joomiraawo ɓuytayno nyalaaɗe ɗen, baa goɗɗo daɗataano, amma sabbu suɓaaɓe makko, o ɓuytii ɗe.

²¹ E wakkati mum to goɗɗo wi'ii on: «*Almasiihu na'on ɗo!» Naa bo: «O na'on to!» To on goonɗinee.

²² Gam almasiihuuɓe fewrekuuɓe e annabiiɓe fewrekuuɓe waran, ɓe gaɗa kaayeefiiji e haaynaareeji, ɓe majjina baa e suɓaaɓe, to ɓe baawi.

²³ Onon kakkilee gam mi batii on ka diga ɗum waray taw.

Garki *Ɓii neɗɗo

²⁴ «Amma der nyalaaɗe ɗen, ɓaawo ɓillaare nen, naaŋe niɓɓan, lewru accan yaynugo,

²⁵ koode kammu yanan, baawɗe gonɗe dow kammu dimmoto .

²⁶ Den ɓe ji'an *Ɓii neɗɗo e wara der duule e baawɗe mawɗe, e tedduŋal .

²⁷ O lilan malaykaaɓe makko ɓe kawrita suɓaaɓe makko fu diga gooraaje leydi naay, diga haggoode duuniyaaru, faa haggoode kammu .»

²⁸ «Paamee ko ibbi ekkitinta. To licce makki e wilita e waɗa haakooji, oon anni seetto faanake.

²⁹ Hande nun, onon bo, to on ji'ii kujje ɗee e waɗa, annitee *Ɓii neɗɗo faanake warugo.

³⁰ Mii bata on e gooŋa: himɓe jaamanuuru nu jooni maayidintaa go huune ɗum ɗon fu laatoo.

³¹ Kammu e leydi heennyan, amma haala am heennyataa abada.»

Alla tan anni nyalaane darŋal

³² «Amma nyalaane e wakkati majjum, goɗɗo annaa ɗum. Baa malaykaaɓe wonɓe dow kammu annaa, baa *Ɓiɗɗo bo annaa. Walaa annuɗo ɗum sey *Baaba tan.

³³ Deenee, kakkilon, gam on annaa wakkati de ɗum warata .

³⁴ Ɗum nandi e gorko gom burtiiɗo wuro mum, waɗi jahaaŋal, accani gollooɓe mum wuro, hokki ɓe moy fu e golle mum, bati deenuɗo dammugal reena.

³⁵ To nun, deenee, gam on annaa de jom wuro wartata: kiikiiɗe nun, caka jemma nun, naa bo wakkati jakaraari joggata nun? Naa bo fajiri nun? On annaa!

³⁶ To o wartii e jahaaŋal wara o juha on, o tawa oon ɗaani!

³⁷ Ka batanmi on, himɓe fu nun batanmi ka: to on ɗaane!»