Marku 12 - Bible Fulfulde Bénin New Testament

Ballool dow remooɓe innabooje

¹ Ɓaawo mum Yeesu fuɗɗi baddugo e maɓɓe e ballaaji, o wi'i: «Neɗɗo gom nun aawi gesa *innabooje mum, o fiiltini ka kowaagol, o wasi gayka ɓiɗɗirka innabooje, o mahi suudu towkol, deenirkol. Ɓaawo mun, o reenini ka woɓɓe, o waɗi jahaaŋal.

² No ɓorugo ɓiɓɓe leɗɗe yottii, o lili golloowo makko to remooɓe, o jaɓanaa mo geɗal makko der ɓiɓɓe innabooje ɗen.

³ Amma gollooɓe ɓen nanŋi lilaaɗo on, ɓe piyi mo, o witti juuɗe baanji.

⁴ Jom gesa on lili golloowo mum goɗɗo to maɓɓe, ɓe piyi mo kanko bo, ɓe eli dow hoore, ɓe jenni mo jennooje bonɗe.

⁵ O lilitii kade golloowo makko tataɓo to maɓɓe, ɓe bari oo ɗon. Nunnun ɓe gaɗani woɓɓe ɗuuɓɓe: Ɓe piyi woɓɓe, ɓe bari woɓɓe.

⁶ Jooni kan, gooto tan o hororii, ɓiyiiko jiɗaaɗo. Kanko o sakitii lilugo to maɓɓe, o wi'i: ‟Ɓe teddinan ɓiyam kan.”

⁷ Amma gollooɓe ɓen wi'ontiri hakkune mum: ‟Daa mo, kanko woni donoowo gesa ŋan, garee baren mo, donen gesa ŋan!”

⁸ Ɓe nanŋi ɓiɗɗo on, ɓe bari ɗum, ɓe daasi faa ɓaawo gesa.»

⁹ Jooni noo, noy jom gesa on waɗata? O waran, o halka gollooɓe ɓen, o yowana gesa ŋan woɓɓe juuɗe.

¹⁰ On janŋay ko winnaa der Binni Ceniini na? ‟Hayre ne mahooɓe woppi, kayre heennyi laatii jogiine maadi .

¹¹ Kanjum woni golle Joomiraawo, kayniiɗe e gite meeɗen!”

¹² Hooreeɓe *Yahuduuɓe ɓen yiɗi ɓe nanŋa Yeesu, gam ɓe paamii kamɓe nun o waɗani ballool ŋol. Amma ɓe kulii jama'aare, gam mum ɓe acci mo, ɓe dilli.

Yoɓugo ceede faada

¹³ Ɓe lili *Farisaaɓe woɓɓe, e himɓe dariiɓe ɓaawo *Eroodu to Yeesu gam ɓe nanŋira mo e haala makko.

¹⁴ Ɓe gari, ɓe bi'i mo: «Moodibbo, emen anni aa gooŋaajo. A hulataa gite goɗɗo, gam a ɓurontirtaa himɓe, aa janŋina laawol Alla e gooŋa. Batu men, e haani men joɓa laamiiɗo Roma ceede faada naa haanay? Men joɓa naa to men joɓu?»

¹⁵ Nani Yeesu e anni munaafitaare maɓɓe, o wi'i ɓe: «Ume waɗi ko oon tuunnanammi pittol? Gaddanee am ceede ɗen mi yi'a.»

¹⁶ Ɓe gaddani mo ɗe. O ƴami ɓe: «Foto moy e inne moy woni ɗo?» Ɓe bi'i mo: «Laamiiɗo Roma.»

¹⁷ O toontii ɓe, o wi'i: «Den kan, kokkee laamiiɗo Roma ko laatanii ɗum, kokkon Alla bo ko laatanii ɗum.» Haynaare makko waɗi ɓe sanne.

Ƴanɗe dow pintol maayɓe

¹⁸ Woɓɓe der *Sadukiiɓe wi'ooɓe pintol walaa, wari to Yeesu, ɓe ƴami mo, ɓe bi'i:

¹⁹ «Moodibbo, Muusa umurii to goɗɗo maayii rimay ɓiɗɗo, minyiiko naatta debbo on gam heɓana maayɗo on ɓeyŋu.

²⁰ Ɗum waɗiino e woɓɓe rindaaɓe jeeɗiɗo. Arano ɓaŋi debbo, maayi, ɓe dinday ɓiɗɗo.

²¹ Ɗiɗaɓo naatti debbo on, kanun bo maayi ɓe dinday ɓiɗɗo. Tataɓo bo waɗi hande nun.

²² Nun ɓe fu jeeɗiɗo ɓe dinday mo. Ɓaawo maɓɓe ɓe fu, debbo on bo maayi.

²³ Den, nyalaane pintol, to ɓe fu ɓe pintii, moy e maɓɓe o laatoyto debbo muuɗum? Gam ɓe fu jeeɗiɗo ɓe koowiino mo!»

²⁴ Yeesu toontii ɓe, wi'i: «Hey, on majjii! On paamay Dewte, on paamay baawɗe Alla bo.

²⁵ Gam to maayunooɓe fintii, worɓe e rewɓe ɓaŋontirtaa, ɓe laatoto hande malaykaaɓe wonɓe dow kammu.

²⁶ Dow pintol maayɓe, on janŋay e Dewtere dow haala nyoomere jaɓoore yiite, no Alla baddiri e Muusa wi'i: ‟Min woni Alla Iburahiima, Alla Isiyaaku, Alla Yaakuubu na ?”

²⁷ Alla laati nun Alla wuuruɓe, Alla maayɓe bane. On majjii sanne.»

Umuroore ɓurune manŋu

²⁸ *Moodibbo tawreeta gom nani no Yeesu toontorii *Sadukiiɓe dow jeddi maɓɓe, o ɓattii Yeesu o ƴami ɗum: «Umuroore ney ɓuri manŋu?»

²⁹ Yeesu toontii mo wi'i: «Umuroore ɓurune manŋu nani: ‟Kettinee, ɓiɓɓe Isira'iila, Alla Joomiraawo meeɗen tan woni Joomiraawo.

³⁰ Yiɗu Alla Joomiraawo maa e ɓerne maa fu e yonki maa fu e hakkillo maa fu, e semme maa fu .”

³¹ Ɗiɗawre mayre nani, kayre woni: ‟Jiɗaa banniraawo maa hande no jiɗirɗaa hoore maa.” Walaa fu umuroore ɓurne ɗee ɗon manŋu .»

³² Moodibbo tawreeta on wi'i: «Moodibbo! Haala maa e wooɗi, a batii gooŋa no bi'uɗaa Alla tan woni Joomiraawo, kade bo Alla goɗɗo walaa to hinaa kanko.

³³ Yiɗugo Alla e ɓerne fu e hakkillo fu e semme fu, e yiɗugo banniraawo hande hoore mum, kanjum ɓuri sadakaaji buuɗeteeɗi e kiiseteeɗi fu !»

³⁴ No Yeesu yi'i o bati e hakkillo, o wi'i mo: «A woɗɗidaa *Laamaare Alla.» Ɓaawo majjum goɗɗo suusay ko ƴami mo ƴanɗe.

Almasiihu, Ɓiɗɗo moy nun?

³⁵ Yeesu etti haala e janŋina der suudu Alla, o wi'i: «Noy *moodiɓɓe tawreeta wi'irta haanu nun *Almasiihu laatoo ɓii Dawda?

³⁶ Gam Dawda e hoore mum wi'ii e *Ruuhu Ceniiɗo: ‟Joomiraawo batii Joomam wi'i: Jooɗa nyaamo am faa mi waɗa jaaɓaa wanyuɓe maa .”»

³⁷ To Dawda e hoore mum noddii mo Joomiraawo: Den, noy Almasiihu laatortoo ɓiyiiko? Jama'aare ɗuunne hettinake haala Yeesu e belɗum ɓerne.

Hakkilango moodiɓɓe tawreeta

³⁸ Der janŋinki makko, o wi'i ɓe: «Kakkilanee ko'e mooɗon e *moodiɓɓe tawreeta yiɗuɓe woositaago e gulunfaaje mawɗe, ɓee jiɗi sanneego der luuɓe,

³⁹ ɓee jawɗanoo joonɗe ɓurɗe teddugo der baajorɗe e der nokkuuje to juulɗe waɗetee.

⁴⁰ Ɓee teeta ko gowniiɓe woodi, kade bo ɓee juutina du'aaje maɓɓe gam himɓe yi'a ɓe. Kamɓe, kiita naawka ɓurata jippanaago.»

Sadaka debbo gowniijo

⁴¹ Yeesu e jooɗii takkol pakorowal to ceede wattetee der suudu Alla, oo daara no jama'aare wattirta ceede der pakorowal ŋal. Jom ceedeeɓe ɗuuɓɓe wattii ceede ɗuuɗɗe e maggal.

⁴² Ɗon debbo gowniijo gom wari, watti suuhon ɗiɗon.

⁴³ Yeesu noddi aahiiɓe mum, wi'i ɓe: «Mii bata on e gooŋa: Debbo talakaajo on wattii der pakorowal ɓuri horiiɓe fu,

⁴⁴ kamɓe, ɓe gattii ɗe bukaata mum ɓe goodaa, amma debbo talakaajo on, wattii ko o woodi o wuurira fu.»