Marku 11 - Bible Fulfulde Bénin New Testament

Yeesu naatii Urusaliima

¹ No ɓe paanii *Urusaliima, takkol Baytifaaji e Baytaniya, ɓe boɗɗidaa waanne Jaytuuje, Yeesu lili aahiiɓe mum ɗiɗo,

² o wi'i ɓe: «Jahee naatee siire woniine yeeso mooɗon, to on naatii ne, on tawan ton ɓinŋel babba e haɓɓii, ŋel goɗɗo waɗɗaakino. Pittanee am ŋel, gaddon ɗo.

³ To goɗɗo ƴami on ko gaɗirton ŋel, toontoɗon mo, moodibbo amen woodi haaju maggel, o accan ŋel ŋel wara ɗo .»

⁴ No ɓe jahi, ɓe tawi ɓinŋel babba e haɓɓii yaasi takkol dammugal gom, ɓe pitti ŋel.

⁵ Woɓɓe tawaaɓe ɗon ƴami ɓe: «Ume gaɗoton ɗon go oon pitta ɓinŋel babba ŋel?»

⁶ Ɓe toontii hande no Yeesu wi'unoo ɓe, den ko ɓe accaa.

⁷ Ɓe gaddani Yeesu ɓinŋel ŋel, ɓe jowi gineeji maɓɓe dow maggel, ko o waɗɗii.

⁸ Ɗuuɓɓe weƴƴiti gineeji mum e laawol, woɓɓe salti licce leɗɗe, fukkini dow laawol.

⁹ Woɓɓe e ardii mo, woɓɓe bo e tokkini mo ɓaawo, ɓee kulgina, ɓee bi'a: «*Hosana, barke woodani garuɗo e inne Joomiraawo .

¹⁰ Barke woodani laamu maama meeɗen Dawda garoowu. Yettoore wonanoo Alla mo dow.»

¹¹ Yeesu naati *Urusaliima, o yahi suudu Alla. O daari daari huune fu, o wurtii o dilli Baytaniya kanko e sappo e ɗiɗo, tawi ɗum jenŋi.

Yeesu yaa'ake ibbi

¹² Fini mum, ɓe burtii Baytaniya, rafo waɗi Yeesu.

¹³ Go o hollirii ibbi bilitinki haako, o yahi daaroygo naa o tawan ɓiɓɓe e makki, no o yottii, o taway goɗɗum, sey haako tan gam wakkati dingol ibbe bane.

¹⁴ O bati ibbi kin o wi'i: «Goɗɗo nyaamataa ɓiɓɓe maa kade faa abada!» Aahiiɓe makko nani ka.

Yeesu der suudu Alla

¹⁵ No ɓe jottii *Urusaliima, Yeesu naati suudu Alla, o yanti oo riiwa soodooɓe e sippooɓe wonɓe der mayru. O hippi taaburuuji cengotooɓe ceede e kittaaje sippooɓe tantabaraaji.

¹⁶ O accay goɗɗo tokka e jayri suudu Alla e roonorii doongal.

¹⁷ O janŋini ɓe o wi'i: «E winnaa der Dewtere: ‟Suudu am woni suudu waɗirde du'aare gam lenyi fu!” Amma onon, on gartirii kol suuɗorde pasotooɓe .»

¹⁸ *Hooreeɓe limaamiiɓe e *moodiɓɓe tawreeta nani ka, gam mum ɓe daarti no ɓe kalkirta mo. Amma ɓe kuli mo, gam waaju makko meemi jama'aare sanne.

¹⁹ No kiikiiɗe waɗi, Yeesu e aahiiɓe mum yahi yaasi wanŋarde nen.

Ibbi joorki

²⁰ Fini mum subaka, ɓee paloo, go ɓe ji'i ibbi kin yoorii koron faa e ɗaɗi.

²¹ Piyer siwtorii, wi'i mo: «Moodibbo, Daaru! ibbi ki jaa'iɗaa kin yoorii.»

²² Yeesu toontii, wi'i: «Goonɗinee Alla!

²³ Mii bata on e gooŋa, to goɗɗo wi'i hayre nee: ‟Ɗoofa, yanoy der maayo”, to joomum sikay der ɓerne mum, ko o goonɗini ko wi'i waɗan, den kan ɗum laatoto.

²⁴ Gam majjum bi'anmi on: ko eeluɗon fu der du'aare mooɗon, goonɗinee on keɓii ɗum, e gooŋa ɗum laatanto on.

²⁵ De dariɗon gam gaɗon du'aare fu, to oon goodi gokka e goɗɗo, jaafee mo, gam *Baaba mooɗon gonɗo dow yaafanoo on boofi mooɗon. [

²⁶ Amma to on jaafanaaki woɓɓe, Baaba mooɗon gonɗo dow yaafantaako on onon bo boofi mooɗon.]»

Baawɗe Yeesu

²⁷ Ɓe bittoy *Urusaliima kade, de Yeesu woositintoo der suudu Alla, *hooreeɓe limaamiiɓe, e *moodiɓɓe tawreeta, e *dottiiɓe genni ɓattii mo,

²⁸ ƴami mo wi'i: «E baawɗe ɗey gaɗirtaa golle ɗee? Moy hokku maa baawɗe majjum?»

²⁹ Yeesu toontii ɓe wi'i: «Min bo mi ƴaman on huune gootum. To on toontake am, mi batan on e baawɗe ɗey golliranmi.

³⁰ *Batisi Yuhaana, to Alla ƴiwi naa to himɓe? Toontee am!»

³¹ Ɓe dawri hakkune maɓɓe, ɓe bi'i: «To en bi'ii: ‟to Alla”, o wi'an, ‟den ko waɗi on goonɗinay mo”?

³² To en bi'ii to himɓe nun, aa, ɓee kula jama'aare, gam ɓe daariino Yuhaana laati nun annabiijo lalley.»

³³ Ɓe toontii, ɓe bi'i: «Men annaa!» Yeesu wi'i ɓe: «Min bo, mi batataa on e baawɗe ɗe golliranmi!»