Marku 10 - Bible Fulfulde Bénin New Testament

Ekkitinol dow ceerontiral

¹ No Yeesu yawti diga ɗon, o yahi leydi Yahudiya o joli maayo Urdun. Ɗon himɓe ɗuuɓɓe wari e huuritii mo, o darii oo janŋina ɓe hande no o woowi.

² Woɓɓe caka *Farisaaɓe wari gam jarboo mo, ƴami mo: «Gorko e woodi laawol seera debbo mum na?»

³ O toontii ɓe o wi'i: «Ume Muusa umuri on?»

⁴ Ɓe toontii, ɓe bi'i: «Muusa umurii gorko winna ɗerewol ceergal to e seera debbo mum .»

⁵ Yeesu wi'i ɓe: «Sabbu cattal ko'e mon waɗi ko Muusa winnani on umuroore nen.

⁶ Amma diga fuɗɗoode, Alla tagii gorko e debbo .

⁷ Kan waɗi, ‟gorko accan baaba e inna mum, takkontira e debbo mum,

⁸ ɓe fu ɗiɗo ɓe laatoo neɗɗo gooto.” Hande nun ɓe laatataako ɗiɗo, amma gooto .

⁹ Gam mum, to neɗɗo seennu ko Alla hawti.»

¹⁰ No ɓe bitti der suudu, aahiiɓe makko bo ƴami mo haala majjum.

¹¹ O wi'i ɓe: «Gorko ceeruɗo debbo mum fu, ko hoowi goɗɗo, jeenii dow oo to,

¹² hande nun debbo bo, to salake gorum, go gorko goɗɗo hoowitii ɗum, waɗii jeenu.»

Yeesu barkiɗinii sukahon petton

¹³ Himɓe e waddana Yeesu sukahon, gam o meema kon, amma aahiiɓe makko nyaasitii ɓe.

¹⁴ No o yi'i ɗum, o ɓernani ɓe, o wi'i: «Accee sukahon petton wara to am, to on kaɗee kon, gam nanduɓe e makkon jey *Laamaare Alla.

¹⁵ Mii bata on e gooŋa, mo jaɓay Laamaare Alla hande sukahon petton, naatataa ŋu pay.»

¹⁶ Go o etti sukahon o wuunii, o yowi junŋo makko dow makkon, o barkiɗini kon.

Gojankeejo jom jawdiijo

¹⁷ No Yeesu nanŋi laawol, gorko gom doggoy wari, jiccii yeeso mum, ƴami mo, wi'i: «Moodibbo booɗɗo, ume haani mi waɗa go mi heɓa yonki tabitiiki?»

¹⁸ Yeesu wi'i mo: «Ko waɗi aa noddammi booɗɗo? Booɗɗo walaa to hinaa Alla gooto.

¹⁹ Aa anni umurooje: Taa waru neɗɗo, taa jeenu, taa wujju, taa seeda fewre, taa nyaamu goɗɗo amaana, teddin baaba maa e inna maa .»

²⁰ Gorko on toontii mo, wi'i: «Moodibbo, mii jogii ɗum ɗum fu diga sukaaku am.»

²¹ Ɗon Yeesu daari mo, yiɗi mo, wi'i: «Huune woore tan jaccu maa: Yahu sippu ko gooduɗaa fu, kokkaa ceede mum talakaaɓe. Den a heɓan jawdi dow kammu, ɓaawo mum, garaa tokkaa am.»

²² Amma no gorko on nani haala kan, o ɓalinii, o dilli e ɓerne biisiine gam o laati nun ɗuuɗa jawdiijo.

²³ Yeesu daari aahiiɓe mum, wi'i: «Naatugo jom jawdiijo der *Laamaare Alla e saɗi!

²⁴ Aahiiɓe makko haayɗinii gam haala kan, o ɓeydi kade, o wi'i ɓe: «Sukaaɓe am, naatugo hooliiɓe jawdi mum der Laamaare Alla e saɗi!

²⁵ Jeelooba wurtoroo hinere baatal e ɓuri hoyugo dow naatugo kooliiɗo jawdi mum der Laamaare Alla.»

²⁶ Aahiiɓe ɓeydi haayɗinaago, darii e ƴamontira hakkune mum e wi'a: «Den, moy waawata ko hisi?»

²⁷ O daari ɓe, o wi'i: «E himɓe ɗum waɗataako, amma to Alla ɗum waɗoto. Gam walaa fu ko Alla tampi.»

²⁸ Den Piyer wi'i mo: «Minon, men accii huune fu, men tokkii maa!»

²⁹ Yeesu toontii, wi'i: «Mii bata on e gooŋa, accuɗo suudu mum, miiraaɓe mum, e mawniraaɓe mum, e sakikiraaɓe mum, e inna mum, e baaba mum, e sukaaɓe mum, naa bo gese mum, sabbu am e sabbu *linjiila,

³⁰ O heɓan ɗum de hewre der wakkati mo gonɗen jooni, diga e cuuɗi, faa e sakikiraaɓe rewɓe e worɓe, faa e inniraaɓe, sukaaɓe, e gese, o toorete bo. Der wakkati garoowi bo, joomum heɓan yonki tabitiiki.

³¹ Wakkati mum, ardiiɓe ɗuuɓɓe laatoto sakitiiɓe, sakitiiɓe bo laatoo ardiiɓe .»

Yeesu batanii maayde e pintol mum de tatawre

³² No ɓe janti laawol ɓee jaha *Urusaliima, Yeesu ardii ɓe, ɓerɗe aahiiɓe makko e taƴi, go ɓee tokkunoo mo e kulol. Yeesu noddi aahiiɓe mum sappo e ɗiɗo, o darii oo bata ɓe ko warata heɓugo mo.

³³ O wi'i ɓe: «Kettinee, en nani yaha Urusaliima, ton *Ɓii neɗɗo wattete e juuɗe *hooreeɓe limaamiiɓe e *moodiɓɓe tawreeta. Ɓe kiitoto mo kiita maayde, ɓe gattan mo e juuɗe heeferɓe.

³⁴ Ɓe jaancan mo, ɓe tuuta mo joode, ɓe piya mo looci, ɓe bara mo. Amma ɓaawo balɗe tati, o fintan.»

Elgal Yaakuuba e Yuhaana

³⁵ Yaakuuba e Yuhaana, ɓiɓɓe Jebede, wari to Yeesu, wi'i mo: «Moodibbo, woodi ko men jiɗi eelugo ma, emen jiɗi gaɗanaa men ɗum.»

³⁶ O wi'i ɓe: «Ume jiɗɗon mi waɗana on?»

³⁷ Ɓe toontii mo: «To a jooɗake der laamaare maa, gaɗaa men jooɗoo, oo ɗo takkol maa nyaamo, oo ɗo bo takkol maa nano, der tedduŋal maa.»

³⁸ O toontii ɓe, o wi'i: «On annaa ko eeloton. On baawan ko yari bone ne jarammi, mutineɗon der toora hande no gaɗanteemi na?»

³⁹ Ɓe toontii mo, ɓe bi'i: «Ee, men baawan.» Yeesu wi'i ɓe: «On jaran bone hande no jarirammi, mutineɗon der toora hande no gaɗanteemi bo.

⁴⁰ Amma haanuɓe jooɗoo takkol am nyaamo e nano, min bane waɗata ɗum, ɓe Alla resani joonɗe ɗen, kamɓe jooɗotoo ɗon.»

⁴¹ No aahiiɓe sappo horiiɓe nani ka, ɓe tikkani Yaakuuba e Yuhaana.

⁴² Yeesu noddi ɓe, wi'i: «Oon anni no daaraaɓe hande laamiiɓe der lenyi janani laamoranto nun himɓe mum e baawɗe, e jogorii ɓe no boni.

⁴³ Onon kan, ɗum waɗataako nun hakkune mooɗon, to goɗɗo mooɗon e yiɗi laatoo tedduɗo, o gollano horiiɓe.

⁴⁴ Jiɗɗo e mooɗon laatoo ardiiɗo, sey o laatoo maccuɗo mooɗon, on fu.

⁴⁵ *Ɓii neɗɗo e hoore mum waray gam jagganeego, amma jagganaago himɓe waddi mo, o hokkitira yonki makko gam sooditaago ɗuuɓɓe.»

Yeesu wuntinii Bartimee

⁴⁶ Ɓe jottii Yeriko. No Yeesu e aahiiɓe mum wurtotoo siire e jama'aare ɗuunne, ɗon ɓe tawi bunɗo bi'eteeɗo Bartimee, ɓii Timee e jooɗii e fiya bara sera laawol.

⁴⁷ No o nani Yeesu mo Nasaratu nun yawtata, o darii oo nodda, oo wi'a: «Yeesu, *Ɓii Dawda, yurmam!»

⁴⁸ Ɗuuɓɓe der dariiɓe ɗon e wooltana mo e wi'a: «Jeeɗa!» Amma o ɓeydii noddugo oo wi'a: «Ɓii Dawda, yurmam!»

⁴⁹ Go Yeesu darii, wi'i: «Noddee mo o wara.» Ɓe noddi bunɗo on, ɓe bi'i mo: «Tinna, umma, oo noddee.»

⁵⁰ O ummii, o woppi gulunfaare makko, o wari to Yeesu.

⁵¹ Yeesu ƴami mo, wi'i: «Ume jiɗɗaa mi waɗanee?» Bunɗo on toontii mo, wi'i: «Moodibbo, accu mi yi'itoo»

⁵² Yeesu wi'i mo: «Yahu, goonɗinki maa nyawtii maa.» Ɗon maa ɗon o wunti, o tokkini Yeesu der jahaaŋal muuɗum.