Luka 9 - Bible Fulfulde Bénin New Testament

Yeesu lilii aahiiɓe mum sappo e ɗiɗo

¹ Yeesu noddii aahiiɓe mum sappo e ɗiɗo, hokki ɓe baawɗe e semme dow ginnaaji fu, ɓe nyawta bo nyawuuji.

² O lili ɓe, ɓe baajoo habaru *Laamaare Alla, ɓe nyawta bo nyawɓe.

³ O wi'i ɓe: «To on ettee goɗɗum gam jahaaŋal, to on ettee sawru, naa bo bogooru, ɗum bo peen, maa bo ceede, to goɗɗo mon jogoo toggooje ɗiɗi.

⁴ Wuro ŋo beeruɗon e mum fu, jooɗee ɗon faa de wakkati jawtol mon foti.

⁵ Genni ni himɓe mum salii ko jaɓii on fu, burtee e mayri, piɗɗanon ɓe sollaare koyɗe mon, ɗum laatoo seedaaku dow maɓɓe.»

⁶ Ɓe jawti, ɓe jahi der ci'e e ci'e, ɓee piina linjiila, ɓee nyawta nyawɓe nokku fu.

Hakkillo Eroodu jiɓake

⁷ No *Eroodu laamiiɗo nani ko Yeesu waɗata, o jiɓii gam woɓɓe e wi'a: «Yuhaana gaɗoowo batisi nun finti.»

⁸ Woɓɓe bo e wi'a: «*Eliya nun suppitoy,» woɓɓe kade e wi'a: «Annabiiɓe arandeeɓe gooto mum nun finti.»

⁹ Amma Eroodu wi'i: «Mi waɗii hoore Yuhaana gaɗoowo *batisi settaa, moy nun gorko mo nananmi e batanee kujje ɗee kade?» Ko oo daarta o yi'a mo.

Yeesu nyaanni worɓe ujune joyo.

¹⁰ De lilaaɓe ɓen warti, ɓe bati Yeesu ko ɓe gaɗi fu. O etti ɓe feere maɓɓe, ɓe jahi far siire gom bi'eteene Baytisayda.

¹¹ Amma jama'aare anniti, tokki ɓe. Yeesu jaɓɓii ɓe, fillanii ɓe haala *Laamaare Alla, o nyawti bo haajaaɓe nyawteego.

¹² No naaŋe faanii yanugo, aahiiɓe sappo e ɗiɗo ɓen ɓattii mo wi'i: «Accu jama'aare sankitoo, yaha der genniije e ci'e piiltitiiɗe gam ɓe daartaa werdude e nafa, gam der ladde haro nun tawaɗen ɗo.»

¹³ Amma Yeesu wi'i ɓe: «Onon e hoore mon, kokkee ɓe nafa ɓe nyaama!» Ɓe toontii mo ɓe bi'i: «Peen joyo e liƴƴi ɗiɗi tan men goodi. Sey ni to minon e ko'e amen men jahan men coodanaa jama'aare nee ɗo fu nyaamdu»

¹⁴ Jaka worɓe ujune joyo nun tawaa ɗon, go Yeesu bati aahiiɓe mum wi'i: «Jooɗinee ɓe ukke ukke, lasoy ɗiɗo e sappo sappo.»

¹⁵ Ɓe gaɗi nun nun, ɓe jooɗini ɓe ɓe fu.

¹⁶ Yeesu etti peen joyo kon, e liƴƴi ɗiɗi ɗin, ɓanti gite dow kammu. O du'ii gam Alla barkiɗina ɗum. O ŋappi ŋappiti, o hokki aahiiɓe makko ɓe ceennana jama'aare.

¹⁷ Ɓe fu ɓe nyaami ɓe kaari, ɓe kawriti ko horii ɗum hebbi killaaje sappo e ɗiɗi.

Piyer batii no Yeesu nun woni Almasiihu

¹⁸ Nyalaane gom, Yeesu e du'oo feere mum, go aahiiɓe makko wari to makko. O ƴami ɓe o wi'i: «Moy himɓe wi'ata mii laatii?»

¹⁹ Ɓe toontii mo: «Woɓɓe e wi'a, an woni Yuhaana gaɗoowo batisi, woɓɓe bo e wi'a, an woni Eliya, woɓɓe bo e wi'a, annabiiɓe arandeeɓe gom nun gooto mum fintii.»

²⁰ O wi'i ɓe: «Onon bo na, moy bi'oton mii laatii?» Piyer toontii wi'i: «An woni Almasiihu mo Alla.»

Yeesu e batana maayde e pintol mum.

²¹ Yeesu waggini ɓe, to ɓe batu ka goɗɗo.

²² Yeesu ɓeydi kade o wi'i ɓe: «*Ɓii neɗɗo tooroto sanne, *dottiiɓe, e hooreeɓe *limaamiiɓe e *moodiɓɓe tawreeta woppan mo, ɓe bara mo, amma nyalaane tatawre o fintan.»

²³ O bati ɓe kade ɓe fu o wi'i: «To goɗɗo e yiɗi yaadugo e am, joomum acca miijanaago hoore mum, etta palaaŋal mum nyalaane fu, tokkanmi.

²⁴ Gam jiɗuɗo hisina yonki mum dullan ki, amma majjinɗo yonki mum gam am, hisinan ki.

²⁵ To goɗɗo heɓii huune fu der duuniyaaru, go o halki, ume ɗum nafi mo?

²⁶ To goɗɗo sentii am e haala am, Ɓii neɗɗo bo sentan joomum to waroy der tedduŋal mum e ŋal *Baaba, e ŋal malaykaaɓe seniiɓe.

²⁷ E gooŋa batanmi on, tawaaɓe ɗo, woɓɓe mum maayataa go ɓe ji'a *Laamaare Alla.»

Waylitaago Yeesu

²⁸ Balɗe jeetati yawti ɓaawo Yeesu heennyi batugo haalaaji ɗin, o etti Piyer e Yuhaana e Yaakuuba, o eencidi e maɓɓe dow waanne gam o du'oo.

²⁹ Wakkati o du'otoo, yeeso makko waylitii, gineeji makko rawni tar e jalba.

³⁰ Ɗon himɓe ɗiɗo wari e badda e makko, kamɓe woni Muusa e *Eliya.

³¹ Ɓe cuppitii e tedduŋal. Ɓee badda e Yeesu dow no o heennyitirta golle makko, e no o maayiroyta *Urusaliima.

³² Piyer e wondaaɓe mum e ɗaaninoo ɗoyŋol lugguŋol, go ɓe pini ɓe ji'i tedduŋal Yeesu e himɓe ɗiɗo darodiiɓe e makko.

³³ Wakkati himɓe ɓen yiɗi accugo Yeesu, Piyer wi'i mo: «Moodibbo, taweego men ɗo e wooɗi. Accu men darna ɗo bukaaji tati! Wooru gam maa, wooru gam Muusa, wooru gam Eliya.» O annaa ka o batata.

³⁴ Wakkati o batata ka, ɗon duula gom wari ommi ɓe, go aahiiɓe huli no duula ŋan ommata ɓe.

³⁵ Diga der duula ŋan, daane gom nanaa e wi'a: «Oo ɗo nun laatii *Ɓiɗɗo am mo cuɓumi, kettinanee mo!»

³⁶ No daane nen nanaa, Yeesu horii kan tan. Aahiiɓe ɓen jeeɗii der wakkati mum, fillanaaki goɗɗo ko yi'i.

Yeesu nyawtii suka mo ginnool toorata

³⁷ Fini mum, no ɓe jippii diga dow waanne, jama'aare ɗuunne wari fotti e Yeesu.

³⁸ Ɗon der caka jama'aare nen, goɗɗo yanti e huuɓa, e wi'a: «Moodibbo, mi eelii maa, daaru suka am gorko, Ɓiɗɗo am bajjo nun!

³⁹ Ginnool ŋol nanŋan mo nun, tifel gootel o yantan oo huuɓa, ŋol dimma mo e semme, ŋol ƴufina guufo e hunnuko makko, ŋol nawna mo, no boni ŋol yoofirta mo.

⁴⁰ Mi eelii aahiiɓe maa riiwa ginnool ŋol, amma ɓe baaway.»

⁴¹ Yeesu toontii wi'i: «Hey, onon ɓe galaa goonɗinki, oonyiiɓe, faa dey gondanmi e mooɗon, mii munyani on?» O wi'i gorko on: «Waddu ɗo ɓiɗɗo maa.»

⁴² No suka on ɓattotoo, ginnool ŋol faɗɗiti mo e leydi, talliti mo e semme. Amma Yeesu falmi ŋol, suka on yoofii, o hokkiti mo baabiiko.

⁴³ Ɓe fu, haaynaare manŋu Alla waɗi ɓe. Wakkati mum moy fu haaynaare nanŋi ɗum dow ko Yeesu waɗata, o bati aahiiɓe makko o wi'i:

Yeesu batitake maayde mum e pintol mum

⁴⁴ «Onon, nanee ka batanmi on faa wooɗa: *Ɓii neɗɗo wattoyte der juuɗe himɓe.»

⁴⁵ Amma ɓe paamay haala ka, ka suuɗi ɓe nun gam to ɓe paamu, ɓee kula bo ƴantinaago ka Yeesu.

Moy ɓuri manŋu

⁴⁶ Aahiiɓe ɓen yanti e yeddontira hakkune mum gam ɓe anna hakkune maɓɓe moy nun ɓuri manŋu.

⁴⁷ Yeesu e anni miilooji ɓerɗe maɓɓe, o etti sukeel pettel, o takki ŋel ley makko,

⁴⁸ o wi'i ɓe: «Jaɓuɗo suka oo gam inne am, jaɓii am min e hoore am, jaɓuɗo am bo, jaɓii liloyɗo am, gam laatiiɗo pettel hakkune mooɗon on fu, joomum nun ɓuri manŋu.»

Mo wanyaa on laati nun mo mooɗon

⁴⁹ Yuhaana etti haala wi'i: «Moodibbo, men ji'ii goɗɗo e riiwa ginnaaji e inne maa, go men kaɗi mo, gam o tokkay maa e amen.»

⁵⁰ Yeesu toontii mo wi'i: «To on kaɗee mo gam mo wanyaa on fu laati nun mo mooɗon.»

Himɓe Samariya salake ko jaɓɓii Yeesu

⁵¹ No nyalaane ne Yeesu ettetee dow faanii, o waɗi niiya o yaha *Urusaliima.

⁵² O waɗi lilaaɓe ardii mo, ɓe jahi, ɓe naati der siire Samariyaaɓe gam ɓe ciryoo warugo makko.

⁵³ Amma himɓe Samariya jaɓɓaaki mo, gam o foonni nun far Urusaliima.

⁵⁴ No aahiiɓe makko Yaakuuba e Yuhaana yi'i ɗum, ɓe bi'i: «Joomiraawo, aa yiɗi men bi'a yiite jippoo diga dow halka ɓe na?»

⁵⁵ Yeesu yeeƴitii far to maɓɓe wooltani ɓe e semme!

⁵⁶ Den ɓe jawti, ɓe jahi der siire wonne.

Yiɗuɓe tokkugo Yeesu

⁵⁷ Wakkati ɓe tawaa e laawol, goɗɗo bati Yeesu wi'i: «Mi tokkete to jahataa fu.»

⁵⁸ Yeesu wi'i mo: Dondonɗehon e woodi gayɗe mum, pooli bo e woodi daɗɗa mum, amma *Ɓii Neɗɗo woodaa nokkuure to siwtotoo.

⁵⁹ O wi'i goɗɗo: «Tokkam!» Amma joomum wi'i mo: «Accu taw mi uwaa baaba am.»

⁶⁰ Yeesu toontii mo wi'i: «Accu maayɓe uwa maayɓe mum, an, yahu waaja habaru *Laamaare Alla.»

⁶¹ Goɗɗo wi'i kade: Moodibbo, «Mi tokkete, amma accu taw mi yaha mi waynoo getti am.»

⁶² Yeesu wi'i mo: «Jogiiɗo jalo ga'i fu, go yeeƴitii ɓaawo, joomum nafataa der Laamaare Alla.»