Luka 8 - Bible Fulfulde Bénin New Testament

Rewɓe wonduɓe e Yeesu

¹ Ɓaawo mum Yeesu yahi der ci'e mawɗe e ci'on petton, oo waajoo, oo fiina *linjiila dow *Laamaare Alla. Aahiiɓe makko sappo e ɗiɗo e wondi e makko,

² e rewɓe woɓɓe, ɓe o wurtini ginnaaji e mum, e ɓe o nyawti. Kamɓe woni: Mariyama bi'eteeɗo mo Magadala, mo o wurtini ginnaaji jeeɗiɗi e mum.

³ E Yowana, debbo Hujja, kakkilanoowo jawdi Eroodu, e Susana e woɓɓe kade wallitinɓe ɓe e jawdi mum.

Ballool aawoowo

⁴ Jama'aare ɗuunne hawritii to Yeesu. Ɓe garii diga genniije feere feere, go o waɗani ɓe ballool ŋol ɗo o wi'i:

⁵ «Aawoowo gom nun wurtii gam aawa awdiiri mum. No o aawata, gonni saami sera laawol, ni yaaɓaa, colli nyaami ni.

⁶ Gonni bo saami dow kaaƴe: No ni fuɗi, ni yoori gam dullere peewɗum.

⁷ Gonni bo saami caka gi'e, gi'e ɗen ummodii e mayri, ɗe ɓiɗɗi ni.

⁸ Amma gonni mayri saami to leydi geeri, ni fuɗi, sammere fu rimi cammeeje hewre.» No Yeesu heennyi batugo ka, o wi'i e daane towne: «Gooduɗo noppi gam nanugo fu nana!»

Gam ume ko Yeesu e waɗa ballaaji?

⁹ Aahiiɓe Yeesu ƴami ɗum ko ballool ŋol fillitii.

¹⁰ O toontii ɓe o wi'i: «Onon on kokkaama annugo ko suuɗi der *Laamaare Alla, amma woɓɓe kan bata ka nun e ballaaji ‟gam baa ɓee daari to ɓe ji'u, baa ɓe nanii bo to ɓe paamu.”»

Yeesu e faamina ballool aawoowo

¹¹ «Nani ko ballool ŋol fillitii: Awdiiri nin, haala Alla nun.

¹² Sera laawol to awdiiri nin saami e nandi hande hettiniiɓe haala Alla. To ɓe nanii ka, Seyɗan wara sutta ka der ɓerɗe maɓɓe gam to ɓe goonɗin, hakko ɓe kisa.

¹³ Woɓɓe bo e nandi hande kaaƴe. Ɓe nanan haala kan, ɓe jaɓa ka e seyo. Amma, ɓe accataa ka waɗa ɗaɗi der maɓɓe, wakkati gooti tan ɓe goonɗinta, to toora yottake ɓe bitta ɓaawo.

¹⁴ c caamuni dow gi'e laati nun hande nanuɓe haala Alla, ko acca miilooji e jawdi e suuno duuniyaaru ɓiɗɗa ka, ɓe ɓennataa.

¹⁵ Awdiiri caamuni dow leydi geeri laatii hande nanuɓe haala Alla, ko jaɓi ka e ɓerɗe geete, laaɓuɗe, e tinnaare maɓɓe ɓe diman ɓikkon.»

Ballool fitilla

¹⁶ «Goɗɗo huɓɓataa fitilla gam omma ka gummal, naa bo soorna ka ley banni, amma ka yowete dow resirde fitilla gam naatooɓe fu yi'a jayŋol.

¹⁷ Gam walaa cuuɗiiɗum ko suuɗitintaako, walaa bo asiiri ko wurtintaake laaɓinee.

¹⁸ Gam majjum kakkilee e no kettinortoɗon! Gam gooduɗo huune nun ɓeydantee, amma mo woodaa, baa ko o miili oo woodi teetete.»

Miiraaɓe Yeesu e inna mum

¹⁹ Inna e miiraaɓe Yeesu warii to makko, amma ɓe baaway ko yottii mo gam jama'aare.

²⁰ Yeesu bataa wi'aa: «Inna maa e miiraaɓe maa na'on darii yaasi, ɓee jiɗi yi'ugo maa.»

²¹ Amma Yeesu toontii ɓe wi'i: «Inna am e miiraaɓe am woni hettiniiɓe haala Alla, e gollira ka.»

Yeesu deƴƴitini hennu mawkol

²² Nyalaane gom, Yeesu naati der laana diyam e aahiiɓe mum, o wi'i ɓe: «En jolee fonŋo maayo far ni,» ko ɓe jawti.

²³ Wakkati ɓe jolata, Yeesu ɗaani. Tifere woore, hennu mawkol gom yanti e wifa dow maayo ŋon faa laana e hebba diyam, go ɓee tawaa der kaliire.

²⁴ Aahiiɓe ɓen ɓattii mo, finnini mo wi'i: «Moodibbo! Moodibbo! En na'on kalka!» Yeesu fini, falmi hennu e galmaaji diyam e semme, ɗum fu ɗum deƴƴiti, go deƴƴere mawne waɗi.

²⁵ Yeesu wi'i ɓe: «Toy goonɗinki mon woni?» Amma kulol e haaynaare hebbi ɓe, go ɓee bi'ontira hakkune maɓɓe: «Moy nun iri gorko oo ɗo? Umuroowo baa hennu e diyam, ko eɗum ɗowtanoo mo!»

Yeesu nyawtii mo ginnaaji toorata

²⁶ Ɓe jottii leydi Gerasankeeɓe, daarontirni e Galili.

²⁷ No Yeesu jippii e leydi, ɗon gorko gom jeyaaɗo der genni nin, mo ginnaaji ɗuuɗɗi woni e mum, wari fotti e makko. Diga ko ɓooyi, o ɓornataako gineeji, o wonataako der suudu bo, amma caka caabeeje o tawaa.

²⁸ No o yi'i Yeesu, o huuɓi, o yani ley koyɗe mum o bati e semme o wi'i: «Ume jiɗuɗaa waɗango am, an Ɓiɗɗo Alla Towɗo? Mii sawrinee taa tooram!»

²⁹ O batii ka gam Yeesu wi'i ginnaaji ɗin wurtoo e makko, gam de ɗuuɗɗum ɗi ummantoo mo, ɓee kaɓɓa koyɗe e juuɗe makko e callalluuji, amma o tannya ɗi ɗi fu, ginnaaji ɗin e yaara mo faa der haro.

³⁰ Yeesu ƴami mo: «Noy inne maa?» O toontii: «Inne am nun ujuneeje.» gam ginnaaji ɗuuɗɗi nun woni der makko.

³¹ Ɗii eela Yeesu to wattu ɗi der gayka lugguka.

³² Darne afaaji mawne gom bo e tawaa ɗon e dura dow takkol waanne, go ginnaaji ɗin eeli mo o hokka ɗi laawol ɗi naata der afaaji ɗin. O nootanii ɗi.

³³ Ginnaaji ɗii wurtii diga e tagaaɗo on, naati der afaaji. Darne afaaji nen fu, dirtoy diga dow e doggudu, ɗi joolii der maayo.

³⁴ No durooɓe afaaji ɗi yi'i ɗum, ɓe doggi ɓe batoy habaru majjum der ci'e mawɗe e ci'on petton.

³⁵ Himɓe wurtoy wari daarugo ko waɗi, ɓe jottii to Yeesu, go ɓe tawi gorko mo ginnaaji toorannoo on e jooɗii ley koyɗe Yeesu e ɓornii gineeji mum e deƴƴiti, ɓe kuli.

³⁶ Yi'uɓe huune ɗum fillanii ɓe no o nyawtiri gorko mo ginnaaji toorannoo on.

³⁷ Ko himɓe leydi Gerasankeeɓe fu, eeli Yeesu yawta gam ɓe kulii puy. Yeesu naati der laana diyam yawti.

³⁸ Gorko mo ginnaaji wurtii e mum on sawrini Yeesu acca o tokka ɗum. Amma Yeesu wi'i mo:

³⁹ «Wittu hootu wuro maa, pilloɗaa ko Alla waɗan maa fu.» Gorko on witti, yahi e bata der siire nen fu ko Yeesu waɗani ɗum.

Ɓiɗɗo Jayrus debbo, e yeeraajo meemuɗo toggoore Yeesu

⁴⁰ No Yeesu wittoy diga fonŋo maayo ton, jama'aare fottitii e makko, gam ɓe fu ɓe kettinino mo nun.

⁴¹ Go gorko bi'eteeɗo Jayrus wari, o laati nun hooreejo waajorde, o jiccii yeeso Yeesu, o eeli mo o eeliti o yaha wuro makko,

⁴² Gam oo woodi ɓiɗɗo debbo bajjo mo jaka duuɓi sappo e ɗiɗi, nyawi faa ɓadii maayugo. Wakkati Yeesu yahata ton, jama'aare ɓilli ɗum.

⁴³ Debbo gom bo e tawaa ɗon mo lefol mum salii ko haggii diga duuɓi sappo e ɗiɗi. [o nyaami ko o woodi fu to nyawtooɓe] amma goɗɗo maɓɓe waaway ko nyawti mo.

⁴⁴ O ɓattii Yeesu ɓawɓawre, o meemi kommulol toggoore mum. Ɗon maa ɗon, ilol ƴiiƴam ɗam haggii.

⁴⁵ Yeesu ƴami: «Moy nun meemimmi?» Ɓe fu ɓe jeddi, go Piyer wi'i: «Moodibbo, jama'aare e tummu maa e ɓiɗɗee.»

⁴⁶ Amma Yeesu wi'i: «Goɗɗo meemii am, gam mi annitii semme gom wurtake diga e am.»

⁴⁷ Debbo on faanti no ɗum annitaamaa. O wari oo diwna, o jiccii ley yeeso Yeesu. O fillii yeeso jama'aare ko woni sabbu go o meemi Yeesu, e no o yooforii ɗon maa ɗon.

⁴⁸ Yeesu wi'i mo: «Sakiike am, goonɗinki maa nyawtii maa, yahu e jam.»

⁴⁹ Yeesu batiday ko lilaaɗo gom ƴiwoy diga wuro hooreejo waajorde on, wari wi'i mo: «Suka maaɗa maayii, taa ɓillu kade moodibbo.»

⁵⁰ Amma Yeesu nani ka, o bati hooreejo waajorde on o wi'i: «Taa hulu, goonɗin tan, o yoofoto.»

⁵¹ No o yottii wuro ŋon, o accay goɗɗo naatidi e makko sey Piyer e Yuhaana, e Yaakuuba e baaba e inna suka on.

⁵² Ɓe fu, ɓee bulla ɓee boytoo gam suka on, go Yeesu wi'i: «To on bullee, o maayay, amma o ɗaani nun.»

⁵³ Ɓe jali mo, gam ɓee anni o maayi.

⁵⁴ Amma Yeesu jogii mo e junŋo, bati e semme wi'i: «Suka, umma!»

⁵⁵ Yonki makko wittoy, go o ummii sikan. Yeesu wi'i ɓe, ɓe kokka mo ko nyaametee.

⁵⁶ Getti makko haaynaare nanŋi ɗum, amma Yeesu wi'i ɓe, to ɓe pillana goɗɗo ko waɗi.