Luka 6 - Bible Fulfulde Bénin New Testament

Yeesu nun laatii jom nyalaane siwteteene

¹ *Nyalaane siwteteene gom, Yeesu e falta der gesa alkamaari, go aahiiɓe makko e wooca cammeeje e wogga e ƴakka.

² Go *Farisaaɓe woɓɓe wi'i ɓe: «Gam ume ko oon gaɗa ko tawreeta salii waɗee der nyalaane siwteteene?»

³ Yeesu toontii ɓe wi'i: «On janŋay ko Dawda waɗi nyalaane gom no rafo waɗata mo kanko e himɓe makko na?

⁴ O naati suudu Alla, o etti peen desanaako Alla o ƴakki, o hokki bo himɓe makko, baa no limaamiiɓe tan nun woodi laawol nyaamugo ko.»

⁵ Yeesu wi'i ɓe kade: «*Ɓii neɗɗo woni jom nyalaane siwteteene.»

Gorko mo junŋo mum nyaamo waati

⁶ Kade *nyalaane siwteteene gom, Yeesu naati der *suudu waajorde fuɗɗi e janŋina. Tawi gorko gom e tawaa ɗon mo junŋo mum nyaamo waati.

⁷ *Moodiɓɓe *tawreeta e *Farisaaɓe e hakkilani mo naa o nyawtan goɗɗo der nyalaane siwteteene, gam ɓe keɓa laabi no ɓe gaccortoo mo.

⁸ Amma Yeesu e anni miilooji maɓɓe, go o bati mo junŋo waatuŋo on o wi'i: «Umma dara ɗo, caka himɓe.» Gorko on ummii darii.

⁹ Go o wi'i ɓe: «Mi ƴaman on goota: e haani der nyalaane siwteteene, geetum waɗee naa kalluɗum? Yonki tagaaɗo faabee naa ki halkee?»

¹⁰ O daari daari ɓe ɓe fu, go o bati gorko on o wi'i: «Foortu junŋo maa.» O waɗi nun, ko junŋo makko yanɗiti.

¹¹ Mone waɗi ɓe, go ɓe janti ɓee jeddontira hakkune maɓɓe dow ko ɓe gaɗanta Yeesu.

Yeesu suɓii aahiiɓe mum sappo e ɗiɗo

¹² Wakkati mum, Yeesu eenci dow waanne gom gam du'oo, o waali oo eela Alla.

¹³ No weeti, o noddi aahiiɓe makko, o suɓi der maɓɓe sappo e ɗiɗo o noddi ɓe «Lilaaɓe»:

¹⁴ Simon mo o innitiri Piyer, e miiraawo mum Andere, e Yaakuuba e Yuhaana, e Filippu e Bartolome,

¹⁵ e Matiye e Toma, e Yaakuuba ɓii Alfa e Simon tinniiɗo gam Alla.

¹⁶ E Yahuuda ɓii Yaakuuba, e Yahuuda Iskariyot, jammoytooɗo Yeesu.

Yeesu e janŋina jama'aare, e nyawta nyawɓe

¹⁷ Yeesu jippodoy e maɓɓe diga dow waanne, wari to jayri jaajuni, to aahiiɓe makko ɗuuɓɓe mum woni. Jama'aare ɗuunne ƴiwune Yahudiya e *Urusaliima, e ci'e Tirus e Sidon, cawiiɗe maayo e tawaa ɗon.

¹⁸ Ɓe garu nun gam hettinanaago mo, e gam ɓe nyawtee bo nyawuuji maɓɓe. Ɓe ginnaaji toorannoo fu, e yoofoo.

¹⁹ Moy fu e daarta meema mo, gam baawɗe e wurtoo diga e makko, e nyawta ɓe ɓe fu.

Barkaaji e jaa'ooje

²⁰ Yeesu daari aahiiɓe mum wi'i: «Barke laatanii on onon talakaaɓe, gam *Laamaare Alla e wonanii on!

²¹ Barke laatanii on onon rafaaɓe jooni, gam on kaaran! Barke laatanii on onon wullooɓe jooni, gam on jalaan.

²² Barke laatanii on, to himɓe wanyii on, ɓee diiwa on, ɓee jenna on, ɓee biisa inɗe mooɗon, ɗum ɗon fu gam *Ɓii neɗɗo.

²³ Accee ɓerɗe mon wela to ɗum waroy, belbelton, gam oon goodi riiba mawka dow kammu, gam non non nun kaakiraaɓe maɓɓe waɗanannoo annabiiɓe.

²⁴ Amma bone laatanto on onon jom jawdiiɓe, gam on keɓii ko deƴƴitinol mon.

²⁵ Bone laatanto on onon haaruɓe jooni, gam on dafoytee. Bone laatanto on onon jalooɓe jooni gam ɓerɗe mooɗon biisoyto, bullon.

²⁶ Bone laatanto on to himɓe fu e batana on geeta, gam nun kaakiraaɓe maɓɓe waɗannoo annabiiɓe fewooɓe!»

Jiɗee wayɓe mon

²⁷ Amma mii bata on onon hettinaniiɓe am: «Jiɗee wayɓe mon, gaɗanee ɓe geetum.

²⁸ Barkiɗinee yaa'otooɓe on, du'anee tooranɓe on.

²⁹ To goɗɗo fiyii maa meenyo to golal ŋal ɗo, hokku mo kade ŋal to. To goɗɗo teetii gulunfaare maa, accu mo o etta daɗɗeel maa bo.

³⁰ Hokkor eeluɗo maa fu, to goɗɗo jaɓirii maa ko gooduɗaa, taa ƴamu mo.

³¹ Gaɗanee woɓɓe ko jiɗuɗon ɓe gaɗana on.

³² To on jiɗii yiɗuɓe on tan, yettoore ney keɓoton? Baa hakkeeɓe e yiɗa yiɗuɓe ɗum.

³³ To oon gaɗana woonnanooɓe on tan geetum, yettoore ney keɓoton? Baa hakkeeɓe bo e waɗa nonnon.

³⁴ To oon nyalloo to ɓe kooliɗon heɓugo riiba, yettoore ney keɓoton? Hakkeeɓe bo e nyalloo hakkeeɓe bannun gam ɓe joɓitoo ɓe ɗum!

³⁵ Amma, jiɗee wayɓe mon, gaɗanee ɓe geetum, nyallee ɓe, to on miijee yoɓiteego. On keɓan joddi mawni, on laatoto ɓiɓɓe Alla Towuɗo, gam kanko oo moƴƴana ɓe annaa gaɗu e halluɓe.

³⁶ Laatee enɗooɓe hande no Baaba mon laatorii enɗoowo.»

To on kiitee woɓɓe

³⁷ «To on kiitee woɓɓe, on kiitataake, to on gaccee woɓɓe, on gaccataake bo. Cawranee woɓɓe, Alla bo sawranto on.

³⁸ Kokkoree, Alla bo hokkoran on: Der ettorde yeere kebbinaane, daɓaa faa e saama, loowiranteɗon, gam ettorde ne etiranɗon woɓɓe, kayre ettiranteɗon.»

³⁹ Yeesu waɗanii ɓe kade ballool wi'i: «Bunɗo waawan ko ardii bunɗo bannun na? Ɓe fu ɗiɗo ɓe jantoytaa der gayka na?

⁴⁰ Aahiijo ɓurataa moodibbo mum manŋu, amma to aahiijo janŋinaama faa wooɗi, laatoto hande no moodibbo mum.

⁴¹ Gam ume ko aa daara kuɗool tawaaŋol der itere banniraawo maa. Amma a faamanay leggal tawaaŋal der itere maa?

⁴² Noy baawirtaa ko wi'i banniraawo maa: ‟Banniraawo, accu mi ikkinanee kuɗool tawaaŋol der itere maa, an mo faamanay leggal tawaaŋal der ne maa?” Munaafitiijo, ikkin taw leggal tawaaŋal der itere maa, den mum, a yi'an faa laaɓa, keɓaa no cuttiranɗaa banniraawo maa kuɗool tawaaŋol der itere mum.»

Leggal e ɓikkol mum

⁴³ «Leggal geetal rimataa ɓikkol kallukon, leggal kalluŋal bo rimataa ɓikkol geetol.

⁴⁴ Leggal fu annitirtaake maa diga e ɓikkol mum. Ibbe ɓorataake dow gi'e danehi, innabooje bo ɓorataake der gi'e.

⁴⁵ Neɗɗo geeto, wurtinan geetum diga ko suuɗii der ɓerne mum, neɗɗo kalluɗo bo wurtina ko halli diga ko suuɗii der ɓerne mum. Gam hunnuko neɗɗo batataa maa ko hebbi der ɓerne.»

Cuuɗi ɗiɗi

⁴⁶ «Gam ume ko oon noddammi: ‟Joomiraawo, Joomiraawo,” on gaɗataa bo ko bi'umi on?

⁴⁷ Garuɗo to an fu, ko e hettinii haala am e gollira ka, mi hollan on mo joomum nandi:

⁴⁸ oo nandi e gorko mahuɗo suudu mum, wasi gayka faa luggi, daɗɗi suudu mum dow hayre. No diyam toɓi, ɗam ɓotti suudu ŋol, amma ŋol dimmaaki, gam ŋol heɓii maadi geeri.

⁴⁹ Amma kettintooɗo haala am ko gollirtaa ka, joomum e nandi e neɗɗo mahuɗo suudu mum dow leydi, waɗanay ŋol daɗɗa. Diyam iloy e semme, ɓotti ŋol, ɗon maa ɗon ŋol yani, yanande maggol mawnii puy.»