Luka 5 - Bible Fulfulde Bénin New Testament

Yeesu e nodda aahiiɓe mum artirɓe

¹ Nyalaane gom, Yeesu e darii takkol maayo Genesaret, go jama'aare ɗuunne e ɓiɗɗontira ley makko, gam ɓee jiɗi nanugo haala Alla.

² O yi'i laanaaje diyam ɗiɗi fonŋo maayo, suuɓotooɓe liƴƴi jippii e majje e saƴƴa taarooji mum.

³ Yeesu naati der laanaaje ɗen goota mum, ŋa Simon, go o wi'i mo o woɗɗina ŋa fonŋo seɗɗa. O jooɗii der laana o yanti oo janŋina jama'aare.

⁴ No o heennyi batugo, o wi'i Simon: «Yaaru laana maa to luggi, an e banniraaɓe maa, paɗɗon taarooji mon, cuuɓoɗon liƴƴi.»

⁵ Simon toontii mo wi'i: «Moodibbo, men gollake jemmaare nee ɗo fu men nanŋay goɗɗum. Amma no an nun bati, men paɗɗan taarooji ɗin.»

⁶ Ɓe paɗɗi ɗi, go ɓe nanŋi liƴƴi ɗuuɗɗi faa taarooji maɓɓe yiɗi serkitaago.

⁷ Go ɓe ɓaaƴi banniraaɓe maɓɓe tawaaɓe der laana diyam ɗiɗaɓa wara walla ɓe. Ɓe gari go ɓe kebbini laanaaje ɗiɗi ɗen fu liƴƴi faa ɗee jiɗi mutugo der diyam.

⁸ No Simon Piyer yi'i ɗum, o jiccii yeeso Yeesu, o wi'i: «woɗɗam Joomiraawo, gam mi laati nun hakkeejo.»

⁹ Ko acci Simon e banniraaɓe mum fu haaynaare nanŋi ɗum, woni, gam liƴƴi ɗuuɗɗi ɗi ɓe nanŋi.

¹⁰ Nun bo haaynaare nanŋiri Yaakuuba e Yuhaana ɓiɓɓe Jebede, igooɓe Simon. Amma Yeesu bati Simon wi'i: «Taa hulu, diga jooni a laatoto gaddoowo himɓe to am.»

¹¹ No ɓe bittinoy laanaaje maɓɓe fonŋo, ɓe acci ɗon huune fu ɓe tokki mo.

Yeesu nyawtii ceccefo

¹² Nyalaane gom Yeesu e woni der genni gom. Goɗɗo mo ceppam toorata e tawaa ɗon. Wakkati o jiccii yeeso makko, o eeli mo o wi'i: «Moodibbo, to aa yiɗi a waawan ko laaɓinimmi»

¹³ Yeesu foorti junŋo mum, meemi mo, wi'i: «Mii yiɗi, laaɓu!» Ɗon maa ɗon ceppam ɗam acci mo.

¹⁴ Yeesu waggini mo, wi'i, to o haalana ka goɗɗo. Amma o wi'i mo, yahu: «Holloy hoore maa *Limaamiijo, gaɗaa bo sadaka ka Muusa wi'i waɗee, gam kollaa moy fu no a yoofake.»

¹⁵ E nun fu, inne Yeesu yahi e sankito yaago, jama'aare ɗuunne wari e hawritii, gam hettinanoo mo, ɓe keɓa nyawtaago nyawuuji maɓɓe.

¹⁶ Amma Yeesu soltii, yahi der haro e du'oo.

Yeesu nyawtii moofo

¹⁷ Nyalaane gom, Yeesu e janŋina, go *Farisaaɓe e *moodiɓɓe tawreeta e jooɗi. Ɓe ƴiway maa diga e ci'e *Galili e Yahudiya e *Urusaliima, go baawɗe Joomiraawo e hollitoo e makko, e nyawta ɓe.

¹⁸ Den himɓe wari, e roonii moofo gom e banni mum, ɓee daarta naannugo mo der suudu, ɓe desa yeeso Yeesu.

¹⁹ Amma ɓe annaa to ɓe naannirta mo gam jama'aare, go ɓe eenci dow suudu, ɓe juli doomoode maggol, ɓe jippini mo e banni makko yeeso Yeesu, hakkune jama'aare.

²⁰ No o yi'i goonɗinki maɓɓe, o wi'i gorko on: «Hakkeeji maaɗa yaafaama.»

²¹ Moodiɓɓe tawreeta e Farisaaɓe e miijoo e wi'a: «Iri moy nun oo ɗo, batoowo kalluka dow Alla? Moy waawata ko yaafi hakkeeji to hinaa Alla tan?»

²² Amma Yeesu anniti miilooji maɓɓe, wi'i ɓe: «Gam ume ko oon goodi miilooji hande ɗii der ɓerɗe mooɗon?

²³ Ume ɓuri hoyugo: ‟Wi'ugo hakkeeji maa yaafaama naa, wi'ugo umma yahu?”

²⁴ Amma mii yiɗi annon *Ɓii neɗɗo e woodi baawɗe e leydi ɗo gam sawranaago himɓe hakkeeji mum.» Den o wi'i moofo on: «Mii batee, umma ettu banni maa hootu wuro maa!»

²⁵ Ɗon maa ɗon neɗɗo on ummii yeeso himɓe fu, etti banni mum e hoota e teddinira Alla.

²⁶ Ɓe fu, haaynaare nanŋi ɓe, ɓee jetta Alla, kulol e hebbiri ɓe, ɓee bi'a: «Men ji'ii ko haaynii hanne.»

Yeesu e nodda Leewi

²⁷ Ɓaawo majjum, Yeesu wurtii, o yi'i jaɓoowo ceede faada gom bi'eteeɗo Leewi e jooɗii to gollorde mum. Yeesu wi'i mo: «Tokkam!»

²⁸ Leewi ummii, acci huune fu, tokki mo.

²⁹ Go o waɗani Yeesu ciriyaari wuro makko. Jaɓooɓe ceede faada ɗuuɓɓe, e woɓɓe kade yahii e nyaamda e maɓɓe.

³⁰ *Farisaaɓe e *moodiɓɓe tawreeta yanti e dumbitoo, ko ɓe ƴami aahiiɓe Yeesu ɓe bi'i: «Gam ume nun ko oon nyaamda, oon jarida bo e jaɓooɓe ceede faada e hakkeeɓe?»

³¹ Yeesu toontii ɓe wi'i: «Yanɗuɓe bukaaka nyawtoowo sey nyawɓe.

³² Mi waray noddugo foonnitiiɓe, amma hakkeeɓe, gam ɓe baylitoo ɓe tuuba.»

Ƴanɗe dow suumayeere

³³ *Farisaaɓe wi'i Yeesu: «Aahiiɓe Yuhaana e suumoo de ɗuuɗɗum e du'oo bo hande ɓe amen, amma ɓe maa e nyaama e yara.»

³⁴ Yeesu toontii ɓe wi'i: «On baawan ko suumini igooɓe jommanjo to jommanjo on e wondi e maɓɓe na?

³⁵ Amma wakkati waraan, jommanjo on ettete hakkune maɓɓe, den fu, ɓe cuumoyto.»

³⁶ Yeesu waɗani ɓe ballool ŋol ɗo wi'i: «Goɗɗo serkitintaa wudere heyre takkira hiinne, to o waɗii ɗum, o biisan wudere heyre. Nun bo lefol ŋol fottataa e hiinne.

³⁷ Goɗɗo bo loowataa *innabojam kesam der jollooji guri kiiɗɗi, to ɗum waɗaama, innabojam futtinan jollooji ɗin, ɗam sankitoo, jollooji bo halka.

³⁸ Amma, innabojam kesam sey loowee der jollooji guri kesi.

³⁹ To goɗɗo yari innabojam kiiɗɗan, yiɗataa kade kesam: ‟Gam o wi'an kiiɗɗam e ɓuri kesam welugo.”»