Luka 4 - Bible Fulfulde Bénin New Testament

Seyɗan foonnii Yeesu

¹ Yeesu hebbii Ruuhu Ceniiɗo, o wittoy diga maayo Urdun, go Ruuhu yaari mo der haro.

² Ton Seyɗan foonni mo balɗe lasoy ɗiɗi, o nyaamay goɗɗum der balɗe ɗen.

³ Den Seyɗan wi'i mo: «To a laati nun Ɓiɗɗo Alla e gooŋa, ‟batu hayre nee ɗo waylitoo peen.”»

⁴ Yeesu toontii mo wi'i: «E winnaa: ‟Neɗɗo wuurirtaa e peen tan.”»

⁵ Seyɗan yaari mo to ɓuri towugo, tifel gootel, holli mo laamaareeji duuniyaaru fu,

⁶ wi'i mo: «Mi hokkete baawɗe ɗee fu, e tedduŋal laamaareeji ɗii fu, gam mi hokkaamaa ɗum, mi waawan bo ko hokki ɗum mo jiɗumi fu.

⁷ Gam majjum to a jiccanake am, ɗum fu a jeytan ɗum.»

⁸ Yeesu toonti mo wi'i: «E winnaa der dewtere: ‟Alla Joomiraawo maaɗa tan cujidantaa, kanko feere makko tan caafataa.”»

⁹ Go Seyɗan yaari mo kade *Urusaliima, ɓili mo dow suudu Alla, wi'i mo: «To a *Ɓiɗɗo Alla nun, fittu diga ɗo, koɗaa ley,

¹⁰ gam dewtere wi'ii: ‟Alla batan malaykaaɓe mum ɓe kakkilanee!”

¹¹ Dewtere wi'ii kade: ‟Ɓe taɓɓete e juuɗe maɓɓe, gam taa pergoɗaa hayre.”»

¹² Yeesu toontii mo wi'i: «E winnaa der dewtere: ‟Taa foonnu Alla Joomiraawo maaɗa.”»

¹³ No Seyɗan heennyi foonnugo mo, o woɗɗodii mo, faa wakkati gom kade.

Yeesu fuɗɗii golle mum der leydi Galili

¹⁴ Yeesu witti leydi Galili, e hebbi baawɗe *Ruuhu Ceniiɗo, inne makko sankitii der nokkuuje ɗen fu.

¹⁵ Oo janŋina der cuuɗi baajorɗi, go himɓe fu e teddini mo.

Yeesu riiwaama diga Nasaratu

¹⁶ O yahi Nasaratu to o umminaa, *nyalaane siwteteene, o naati der *suudu waajorde hande no o woowi waɗugo. O ummii gam o janŋa dewtere.

¹⁷ O hokkaa dewtere annabi *Esaaya. O fiirti ne, o yiiti nokkuure to winnaa:

¹⁸ «*Ruuhu Joomiraawo na'on der am o suɓii am e mootugo am nebbam gam mi waajoo talakaaɓe linjiila. O liloy am gam mi bata haɓɓaaɓe der kasu habaru fiirteego, wumuɓe heɓa wuntineego, tooreteeɓe bo heɓa yoofeego.

¹⁹ Gam mi fiina duuɓol moƴƴere Joomiraawo .»

²⁰ O taggi dewtere nen, o hokkiti ne gollotooɗo ɗon, o jooɗii. Tawaaɓe ɗon fu e tiggi mo gite.

²¹ O bati ɓe o wi'i: «Hanne haala dewtere ka nanuɗon ɗo hebbi.»

²² Ɓe fu, ɓee batana mo geeta, go haaynaare nanŋi ɓe, gam haalaaji belɗi ɗi o wurtinta der hunnuko makko. Ɓee bi'a: «Kanko bane woni ɓii Yusufu na?»

²³ Yeesu wi'i ɓe: «E gooŋa on batan ballool ŋol ɗo dow am bi'on: ‟Lokotoroojo, nyawtu hoore maa!” Men nanii ko gaɗuɗaa Kafarnahum, waɗu ɗum ɗo der genni maa bo.»

²⁴ Go o ɓeydi o wi'i: «E gooŋa batanmi on: daɗey annabiijo jaɓɓaaka no haaniri der genni mum.

²⁵ E gooŋa batanmi on, gowniiɓe ɗuuɓɓe e tawanoo der Isira'iila wakkati *Eliya. Diyam acci toɓugo faa duuɓi tati e feccere, den rafo manŋo yanti genni fu.

²⁶ Amma e non, Alla lilay Eliya to goɗɗo maɓɓe, sey to gooto tan tawaaɗo Sarepta, der leydi Sidon

²⁷ Sesseɓɓe ɗuuɓɓe bo e tawaanoo Isira'iila der wakkati annabi Elisee. Amma e non fu, goɗɗo maɓɓe nyawtaaka sey Naaman mo Siriya tan.»

²⁸ Ɓe fu der juulirde nen, mone hebbi ɓe no ɓe nani boliiɗe ɗen.

²⁹ Ɓe ummii ɓee jeeƴa mo, ɓe jaari mo sera genni, dow tepaare to genni maɓɓe jooɗii, gam ɓe jeeƴa mo o yana ley.

³⁰ Amma o solti caka maɓɓe o dilli.

Neɗɗo mo ginnool toorata

³¹ Yeesu yahi Kafarnahum der wanŋarde leydi *Galili gom e janŋina himɓe der nyalaaɗe ciwteteeɗe.

³² No o janŋinirta haaynii himɓe puy gam e baawɗe nun o batirta.

³³ Der juulirde ɗon, neɗɗo mo ginnool toorata e tawaa ɗon, go o yanti oo huuɓa puy:

³⁴ «O wi'i hey! Ume jiɗanɗaa men an Yeesu Nasaratuujo? A warii gam kalkaa men na? Mii anni mo laatiɗaa, a laati nun Ceniiɗo ƴiwuɗo to Alla!»

³⁵ Yeesu falmi ginnool ŋol wi'i: «Jeeɗa, wurta bo diga gorko on!» Go ginnool ŋol doƴƴi neɗɗo on yeeso himɓe, ŋol wurtii e makko ŋol waɗay mo goɗɗum.

³⁶ Ɓe fu, haaynaare nanŋi ɓe, go ɓee bi'ontira: «Haala iri kaye nun ɗo? Oo doola ginnaaji e baawɗe, e semme, go ɗii burtoo!»

³⁷ Go inne makko sankiti der nokkuure nen fu.

Yeesu nyawtii nyawɓe ɗuuɓɓe

³⁸ No Yeesu wurtii diga e juulirde ɗon o yahi wuro Simon, esiraawo Simon debbo e yontaa yontere mawne. Go ɓe eeli Yeesu nyawta mo.

³⁹ Yeesu jimminii dow makko, falmi yontere nen e semme, go ne acci mo, o ummii o hiinnii ɓe.

⁴⁰ No naaŋe yani, wooduɓe nyawɓe, ɓe nyawuuji feere feere toorata waddi ɓe to Yeesu. O yowi moy maɓɓe fu juuɗe, ko ɓe fu ɓe joofii.

⁴¹ Ginnaaji wurtii diga e nyawɓe ɗuuɓɓe, ɗii kalɓa ɗii bi'a: «An laatii *Ɓiɗɗo Alla.» Amma Yeesu falmi ɗi e semme, haɗi ɗi batugo, gam ɗii anni no kanko nun woni Almasiihu.

Yeesu e waajoo haala Laamaare Alla

⁴² No weeti, o wurtii siire nen o yahi der haro, ko himɓe ɗuuɓɓe e daarta mo, no ɓe jiiti mo, ɓee jiɗi haɗugo mo yawtugo acca ɓe.

⁴³ Amma o wi'i ɓe: «Sey mi waajoo bo *linjiila ka *Laamaare Alla der genniije koriiɗe, gam sabbu majjum nun Alla liloyimmi.»

⁴⁴ Go o yahi oo waajoo der cuuɗi baajorɗi der leydi *Yahuduuɓe.