Luka 24 - Bible Fulfulde Bénin New Testament

Pintol Yeesu

¹ Alal faji fajiri, rewɓe yahi yenaane, ɓe jaari wardiiji ɗi ɓe ciriyinoo.

² Ɓe tawi hayre tallaama diga dammugal yenaane.

³ Ɓe naati, amma ɓe taway ɗon ɓannu Yeesu Joomiraawo.

⁴ Go ɓe jiɓii dow majjum, ɗon worɓe ɗiɗo ɓorniiɓe gineeji daneeji suppitii ley maɓɓe.

⁵ Ɓe kuli, ɓe jimminii, go worɓe ɓen wi'i ɓe: «Gam ume daartoton buurɗo caka maayɓe?

⁶ [O walaa ɗo, o fintii.] Ciwtoree ka o batunoo on wakkati o woni *Galili.

⁷ O wi'i: ‟Sey *Ɓii neɗɗo wattee der juuɗe hakkeeɓe, o tiggee dow palaaŋal, o finta nyalaane tatawre.”»

⁸ Go ɓe ciwtori haalaaji Yeesu.

⁹ Ɓe jawti diga to yenaane ɗon, ɓe jahi ɓe batoy aahiiɓe sappo e go'o, e horiiɓe.

¹⁰ Batoyɓe ka woni Mariyama mo Magadala e Yowana e Mariyama inna Yaakuuba, e rewɓe woɓɓe wondunooɓe e maɓɓe.

¹¹ Amma aahiiɓe miiji dullere hoore nun batinta ɓe ka, ɓe koolaaki.

¹² Go Piyer ummii doggiri yahi to yenaane nen, no o yuurni, lefol tan nun o yi'i e joowi dow leydi, den o hooti e haaynaare gam ko waɗi.

Ko waɗi dow laawol Emawus

¹³ Der nyalaane woore nen, ɗiɗo maɓɓe e foonnii ci'el gom bi'eteeŋel Emawus. Woɗɗugo maggel e *Urusaliima waɗan kilo sappo e go'o.

¹⁴ Ɓee paajoo dow ko waɗi,

¹⁵ wakkati ɓe paajotoo, ɓee jeddontira, Yeesu ɓattii e yaada e maɓɓe.

¹⁶ Amma gite maɓɓe haɗaa annitingo mo.

¹⁷ Yeesu ƴami ɓe wi'i: «Kaye paajotoɗon oon jahira?» Go ɓe darii e biisere ɓerne.

¹⁸ Gooto maɓɓe bi'eteeɗo Keleyopas wi'i, mo: «An tan woni koɗo der Urusaliima mo annaa ko waɗi der balɗe ɗe!»

¹⁹ O ƴami ɓe o wi'i: «Ume nun waɗi?» Go ɓe toontii mo ɓe bi'i: «Ko tawi Yeesu Nasaratuujo laatinooɗo annabiijo mo baawɗe dow gaɗu e haala, yeeso Alla e yeeso himɓe fu.

²⁰ Go hooreeɓe *Limaamiiɓe men, e mawɓe men hokkitiri mo o waree, o tiggee dow palaaŋal.

²¹ Emen miijuno kanko nun woni teetannooɗo Isira'iilaaɓe. Amma dow majjum, hanne nyalaane tatawre nun ɗo diga ko huune nen laatii.

²² Kade rewɓe wonduɓe e amen accii haaynaare nanŋi men, ɓe dawi diga suba subaka, ɓe jahi to yenaane,

²³ amma ɓe taway ɓannu makko, ɓe bittoy ɓe bati men no malaykaaɓe suppitoranii ɓe, wi'i, oo wuuri.

²⁴ Woɓɓe der wonduɓe e amen yahi to yenaane, tawi huune ɗum fu hande no rewɓe ɓen batiri, amma kanko, ɓe ji'ay mo.»

²⁵ Den Yeesu wi'i ɓe: «Onon himɓe ɓe walaa faamu, e ɓe ɓerɗe muuɗum hoolataako law ko annabiiɓe bati fu!

²⁶ Haanay *Almasiihu tooroo hande nun den o naata der tedduŋal makko na?»

²⁷ Den o faamini ɓe ko batanoo dow makko der binni ceniini fu, o fuɗɗiri dewtere Muusa e ɗe annabiiɓe fu.

²⁸ No ɓe paanii siire to ɓe jahata, Yeesu waɗi hande ko foonnii yeeso.

²⁹ Amma, ɓe eeli mo ɓe eeliti o jooɗodo e maɓɓe, gam naaŋe e yana, jemma bo faanake. O naati o jooɗodii e maɓɓe.

³⁰ No o jooɗii gam o nyaamda e maɓɓe, o yetti Alla, o ŋappiti peen o hokki ɓe.

³¹ Den gite maɓɓe feertii, ɓe anniti mo, amma ɓe majjiti mo yeeso maɓɓe.

³² Ɓe bi'ontiri hakkune maɓɓe: «Nandayno hande ɓerɗe men e maatanno seyo wakkati o baddata en dow laawol, oo faamina en binni ceniini na?»

³³ Ɓe ummii ɗon maa ɗon, ɓe bitti *Urusaliima, ɓe tawi aahiiɓe sappo e go'o e hawritii e wondaaɓe mum,

³⁴ e wi'a: «E gooŋa, Joomiraawo fintii, o accii Simon yi'ii mo!»

³⁵ Go kamɓe bo, ɓe bati ɓe ko waɗi dow laawol e no ɓe annitiri Yeesu wakkati o seennanta ɓe peen.

Yeesu suppitanake Aahiiɓe mum

³⁶ Ɓe keennyay batugo go Yeesu e hoore mum wari darii caka maɓɓe, wi'i ɓe: «Jam wonoo e mon!»

³⁷ Go ɓerɗe maɓɓe taƴi, ɓe kuli, gam ɓee miiji beelu nun ɓe ji'i.

³⁸ Amma Yeesu wi'i ɓe: «Gam ume ko oon jiɓii? Gam ume ko oon gaɗa seko der ɓerɗe mon?

³⁹ Daaree juuɗe am e koyɗe am, min nun! Meemee am, daaree, gam beelu woodaa ɓannu, hakko ƴiƴal hande no ji'irton mii woodi.»

⁴⁰ No o bati ɓe ka, o holli ɓe juuɗe makko e koyɗe makko.

⁴¹ Ɓe baaway ko hoolii sabbu seyo e haaynaare, den o ƴami ɓe o wi'i: «Oon goodi ɗo goɗɗum ko nyaametee na?»

⁴² Ɓe kokki mo taƴere linŋol ɓuynaaŋol.

⁴³ O jaɓi ne, o ƴakki yeeso maɓɓe.

⁴⁴ O wi'i ɓe: «Nani ka batunoomi on wakkati gondunoomi e mon: ‟Ko bataa dow am der dewte Muusa, e der dewte annabiiɓe, e der Jabuura fu, e haani hebba.”»

⁴⁵ Den o maɓɓiti hakkillo maɓɓe gam ɓe paama Binni ceniini.

⁴⁶ Go o wi'i ɓe: «Nani ko winnaa: *Almasiihu tooroto, finta diga maayɓe der nyalaane tatawre.

⁴⁷ Sey tuubu e yaafuye hakkeeji waajee himɓe lenyi fu, e inne makko, ɗum fuɗɗa diga *Urusaliima.

⁴⁸ Onon nun laatii seedeeɓe majjum.

⁴⁹ Daa mi lildanaan on ko *Baaba am haɓɓannoo on alkawal. Amma onon, sey jooɗoɗon der wanŋarde faa to on ɓornaama baawɗe diga dow.»

Yeesu eenci dow

⁵⁰ Yeesu yaarii ɓe far Baytaniya, o ɓanti juuɗe o barkiɗini ɓe.

⁵¹ Wakkati o barkiɗinta ɓe, o seenniri e maɓɓe, o ettaa dow kammu.

⁵² Kamɓe bo, ɓaawo no ɓe cujidani mo, ɓe bitti *Urusaliima e seyo manŋo.

⁵³ Wakkati fu, ɓee gonii der suudu Alla, ɓee maanta Alla.