Luka 23 - Bible Fulfulde Bénin New Testament

Yeesu yaaraama yeeso Pilaatu

¹ Ɓe fu ɓe ummii, ɓe jaari Yeesu yeeso Pilaatu.

² Ɓe janti ɓee gaccoo mo ɓee bi'a: «Men tawii neɗɗo oo, e laawa himɓe amen, oo haɗa ɓe to ɓe joɓu laamiiɗo Roma ceede faada, go oo wi'a kanko nun laatii *Almasiihu laamiiɗo.»

³ Pilaatu ƴami mo: «An woni laamiiɗo *Yahuduuɓe na?» Yeesu toontii mo wi'i: «A batii ka.»

⁴ Pilaatu bati hooreeɓe *Limaamiiɓe, e jama'aare wi'i: «Mi yi'ay gacce gom der neɗɗo oo.»

⁵ Amma ɓe bati kade e semme, ɓe bi'i: «O laawan nun himɓe e janŋinol makko. O fuɗɗay maa diga *Galili, o tokki faa e Yahudiya, faa o yottii ɗo.»

Yeesu yaaraama to Eroodu

⁶ No Pilaatu nani boliiɗe ɗen, ƴami: «Naa neɗɗo on laati nun mo *Galili?»

⁷ No o nani Yeesu ƴiway maa diga jeyde *Eroodu, o lildi mo to makko gam wakkati mum Eroodu na'on *Urusaliima.

⁸ No Eroodu yi'i Yeesu, ɗum weli ɗum sanne, gam diga ko ɓooyi oo yiɗuno yi'ugo mo, gam oo nana bateteeka dow makko. Oo miijunoo Yeesu waɗan kaayniiɗum gom, o yi'a.

⁹ O ƴami mo haalaaji ɗuuɗɗi, amma Yeesu toontaaki mo gokka.

¹⁰ Hooreeɓe *Limaamiiɓe e *moodiɓɓe tawreeta tawaaɓe ɗon, e gaccoo mo sanne.

¹¹ Eroodu e soogeeji mum jali mo jaleeɗe yawaare, ɓe jaanci mo, no ɓe keennyi, ɓe ɓornini mo toggoore wooɗune, ɓe bittini mo to Pilaatu.

¹² Nyaanne mum, Eroodu e Pilaatu weldi, gam ɓe beldaano.

Yeesu hiitanaama waree

¹³ Pilaatu hawriti hooreeɓe *Limaamiiɓe e mawɓe, e himɓe genni fu

¹⁴ O wi'i ɓe: «On gaddanii am neɗɗo oo, bi'uɗon o laawan nun himɓe. Gooŋa! Mi ƴamii mo haalaaji yeeso mon, mi tawii bo o walaa gacce dow ko gaccortoɗon mo fu.

¹⁵ *Eroodu bo yi'ay gacce gom dow makko, gam o lilditake en mo. Neɗɗo oo waɗay gacce gom potuɗe warugo mo.

¹⁶ Gam majjum, mi accan o fiyee o yoofee.» [

¹⁷ De juulɗe waɗi fu, doole nun o yoofana ɓe nanŋaaɗo gooto.]

¹⁸ Amma ɓe janti ɓee kuuɓa ɓe fu, ɓee bi'a: «Waru mo, joofanaa men Barabbas!»

¹⁹ Barabbas maɓɓano nun gam hawre gom waɗii der siire, e gam o warii neɗɗo.

²⁰ Pilaatu wanyayno yoofa Yeesu, gam mum o baddi kade jama'aare.

²¹ Amma ɓe fu, ɓee kuuɓa e semme ɓee bi'a: «Tiggu mo dow palaaŋal! Tiggu mo dow palaaŋal!»

²² Pilaatu etti haala de tatawre wi'i ɓe: «Baadi bonni niye nun o waɗi? Min, mi yi'ay gacce dow makko accooje o waree. Mi accan o fiyee ɓocci, den mum mi yoofa mo.»

²³ Amma faa hanne, ɓe janti ɓee kuuɓa e semme, ɓee bi'a, sey o tiggee dow palaaŋal, go Pilaatu tampi kuuɓaali maɓɓe.

²⁴ Pilaatu resi hokka ɓe laawol ɓe gaɗa ko ɓe jiɗi.

²⁵ O yoofitani ɓe maɓɓanooɗo gam hawre e barki neɗɗo mo ɓe jiɗi yoofee, amma o hokki ɓe Yeesu ɓe gaɗaa ko ɓe jiɗi.

Yeesu tiggaama dow leggal palaaŋal

²⁶ No ɓe jawtinta Yeesu, ɓe nanŋi neɗɗo gom mo Sirene, bi'eteeɗo Simon, e ƴiwoy debeeje. Ɓe doonini mo palaaŋal Yeesu, oo tokkini ɓe.

²⁷ Jama'aare ɗuunne e tokki mo, der maɓɓe, rewɓe e wulla, e wooytoo gam Yeesu.

²⁸ Yeesu yeeƴitii far to maɓɓe wi'i: «Rewɓe *Urusaliima, to on bullee gam am, bullanee ko'e mon, e sukaaɓe mon.

²⁹ Daaree! Nyalaaɗe waraan de wi'oytee: “Barke laatanto rewɓe rimarɓe, ɓe rimay daɗey, e ɓe suka musinay!”

³⁰ Den mum, himɓe yantan e wi'a: ‟Baalle, janee dow amen!‟ tepaaje bo: ‟Cuuɗee men!”

³¹ Gam to leggal keccal waɗanaama non non, ume tawoyta leggal joorŋal?»

³² Der wakkatiire nen, himɓe ɗiɗo halluɓe gom bo e yaaree gam waridee e Yeesu.

³³ No ɓe jottii e nokkuure wi'eteene Le'al hoore, ɓe tiggi ɗon Yeesu dow palaaŋal. Ɓe tiggi himɓe ɗiɗo ɓen bo, gooto nyaamo makko, gooto bo nano makko.

³⁴ Yeesu wi'i: «*Baaba, yaafana ɓe gam ɓe annaa ko ɓe gaɗata.» Go ɓe ceenniri gineeji makko hakkune maɓɓe e fiɗugo tete.

³⁵ Jama'aare darii e daara, amma hooreeɓe *Yahuduuɓe kan e jala mo, e wi'a: «O faabake woɓɓe, o faaboo hoore makko bo, to o laati nun *Almasiihu, mo Alla suɓi!»

³⁶ Soogeeji bo ɓattii e jaanca mo, ɓe kokki mo diyam lammuɗam,

³⁷ ɓe bi'i: «To an woni laamiiɗo *Yahuduuɓe, faaba hoore maa!»

³⁸ Boliiɗe ɗee ɗo e winnaa dow palaaŋal to ɓe tiggi mo: «Oo ɗo woni laamiiɗo Yahuduuɓe.»

³⁹ Halluɓe ɓen gooto mum, tiggidaaɗo e Yeesu, yenni mo, wi'i: «A laataaki woni *Almasiihu? Faaba hoore maa, paaboɗaa men!»

⁴⁰ Amma gooto makko kayii mo wi'i: «A hulataa woni Alla, an keɓuɗo kiita goota e makko?

⁴¹ Enen, kiita men laati nun deydey, gam ko gaɗuɗen nun joɓeteɗen, amma kanko, o waɗay ko halli gom.»

⁴² Go o wi'i: «Yeesu, siwtoram to a wittii der *Laamaare maa.»

⁴³ Yeesu toontii mo wi'i: «E gooŋa batan maa mi: Hanne, a wondan e am der aljanna.»

Maayde Yeesu

⁴⁴ Caka nyalooma niwre waɗi der leydi nin fu, faa yottii yanne tati kiikiiɗe.

⁴⁵ Naaŋe niɓɓi, go wudere maɓɓiranoone dammugal suudu Alla serkitii caka caka.

⁴⁶ Go Yeesu halɓi e semme wi'i: «*Baaba, mi wattii yonki am der juuɗe maa.» No o batidi ka, o maayi.

⁴⁷ Soogeeru Roma gom nu ɓoggi, no yi'i ko waɗi, teddini Alla, wi'i: «Din din, neɗɗo oo laati nun poonnitiiɗo.»

⁴⁸ Jama'aare warunoone gam daara huune ɗum, no ɓe ji'i ko waɗi, ɓe kogitii, ɓe bitti e ɓerɗe biisiiɗe.

⁴⁹ Annuɓe Yeesu, e rewɓe ɗottoynooɓe mo diga *Galili e darii, e wosii seɗɗa, e daara ko waɗata.

Yeesu uwaama

⁵⁰ E woodi goɗɗo bi'eteeɗo Yusufu, o laati nun neɗɗo geeto, poonnitiiɗo, oo tawaa der waalde dawrooɓe.

⁵¹ O nootaakino ka horiiɓe makko resi, e ko ɓe gaɗi, o laati nun neɗɗo Arimatiya, der leydi *Yahuduuɓe, oo heɗiino garki *Laamaare Alla.

⁵² O yahi to Pilaatu, o ƴamoy ɗum ɓannu Yeesu,

⁵³ o jippini ŋol diga dow palaaŋal, o suddi ŋol wudere raneere, o yaari o wattoy der yenaane wasaane der hayre, yenaane ne der mum goɗɗo uwaakano taw.

⁵⁴ Nyalaane nen, nyalaane siriyaago *nyalaane siwteteene nun.

⁵⁵ Rewɓe ɗottoynooɓe Yeesu diga *Galili waridi e Yusufu, ɓe ji'ii yenaane nen e no Yeesu wattiraa der mayre.

⁵⁶ Go ɓe kooti ɓee ciriyoo nebbeele luuttooje e wardiiji. *Nyalaane siwteteene, ɓe ciwtii hande no tawreeta resiri.