Luka 22 - Bible Fulfulde Bénin New Testament

Mawɓe e dawra no nanŋirta Yeesu

¹ No juulɗe peen ko *ƴuufinaaka bi'eteeɗe *Paska faanii,

² hooreeɓe *limaamiiɓe e *moodiɓɓe tawreeta e daarta laawol no warirta Yeesu, amma ɓee kula himɓe.

³ Den Seyɗan naati der Yahuuda bi'eteeɗo Iskariyot, gooto der aahiiɓe sappo e ɗiɗo.

⁴ O yahi o baddoy e hooreeɓe limaamiiɓe e mawɓe reenuɓe suudu Alla, dow no o wattirta Yeesu der juuɗe maɓɓe.

⁵ Ɗum weli ɓe, go ɓe nannantiri ɓe kokka mo ceede.

⁶ Yahuuda nootii, yanti e daarta laabi no jammorto Yeesu, to himɓe annu.

Siriyaago hiraane Paska

⁷ Nyalaane juulɗe peen ko ƴuufinaaka, der ne ɓe boowi hiisugo jawgihon *Paska yottii.

⁸ Yeesu lili Piyer e Yuhaana, wi'i ɓe: «Jahee ciryanoɗon en Paska gam nyaamen.»

⁹ Ɓe ƴami mo ɓe bi'i: «Toy jiɗuɗaa men ciryoo ɗum?»

¹⁰ O wi'i ɓe: «Daaree, to on naatii der siire, gorko dooniiɗo faanu diyam fottan e mon, tokkee mo faa der wuro ŋo o naatata,

¹¹ den, bi'on jom wuro ŋon: ‟Moodibbo e ƴamee: Toy suudu to kanko e aahiiɓe makko ɓe nyaamata hiraane Paska?”

¹² O hollan on suudu dowrowol manŋol moƴƴinaaŋol, ton nun ciryotoɗon ka.»

¹³ Ɓe jawti, ɓe tawoy huune fu hande no Yeesu batirnoo ɓe, go ɓe ciriyii ton hiraane Paska.

Kirtaari Ceniini

¹⁴ No wakkati yottii, Yeesu wari jooɗii e nyaamida e lilaaɓe mum.

¹⁵ O wi'i ɓe: «Mii yiɗuno sanne mi nyaamda nafa *Paska ka e mon ko mi tooro.

¹⁶ Gam mii bata on, mi nyaamataa Paska ka kade, faa de ko ka fillitii hebba der *Laamaare Alla.»

¹⁷ O etti jarirgel, o yetti Alla o wi'i: «Jaɓee, ceenniron hakkune mon.

¹⁸ Gam mii bata on, diga jooni, mi yarataa kade jaram innabohi faa Laamaare Alla wara.»

¹⁹ Ɓaawo majjum, o etti peen, o yetti Alla, o ŋappiti, o hokki ɓe, o wi'i: «Ɗum ɗo laatii ɓannu am kokkaaŋol gam mooɗon. Gaɗee ɗum oon ciwtirorammi.»

²⁰ No ɓe nyaandi ɓe keenyi, o etti jarirgel o hokki ɓe, o wi'i: «Jarirgel ŋel ɗo laatii alkawal kesal ŋal Alla tabbitinirta e ƴiiƴam am, deƴƴitintooɗam gam mooɗon.

²¹ Amma daaree, jammotooɗo am na'on e nyaamida e am.

²² E gooŋa, *Ɓii neɗɗo na'on foonni maayoygo hande no Alla resiri, amma bone laatanto jammotooɗo mo!»

²³ Go ɓe janti ɓee ƴanƴantira to moy nun hakkune maɓɓe waɗata ɗum.

Moy ɓuri manŋu?

²⁴ Den, jeddi ummii hakkune aahiiɓe ɓen dow moy nun laatotoo ɓuruɗo mawnugo caka maɓɓe.

²⁵ Yeesu wi'i ɓe: «Laamiiɓe leyɗe e dawrana himɓe mum e semme, wooduɓe baawɗe bo, e daarta noddeego himɓe yeeɓɓe.

²⁶ Amma onon, non non bane, ɓuruɗo manŋu hakkune mon, sey joomum laatoo hande ɓuruɗo faanɗugo, ardiiɗo bo, sey laatoo gollantooɗo horiiɓe.

²⁷ Moy ɓuri manŋu? Jooɗiiɗo e nyaama naa jaggotooɗo? Hinaa ba jooɗiiɗo e nyaama nun? Amma min, mi na'on hakkune mon hande jaggiiɗo!

²⁸ Onon, on accay am der tooraaji am,

²⁹ gam majjum, hande no *Baaba hokkirimmi *Laamaare, hande nun min bo, kokkirmi on ne.

³⁰ Den mum, on nyaaman, jaron, jooɗoɗon dow kittaal laamaare am, kiitoɗon lenyi Isira'iilaaɓe sappo e ɗiɗi.»

Yeesu e bata no Piyer yeddan ɗum

³¹ Joomiraawo wi'i: «Simon, Simon, *Seyɗan eelii wesa on hande gawri.

³² Amma mi du'anake maa gam to goonɗinki maa heennya. An, to a wittoy to am, semmiɗin banniraaɓe maa.»

³³ Piyer wi'i mo: «Joomiraawo, mii siriyii naatidingo e maa der kasu, e maayidingo e maa bo.»

³⁴ Yeesu toontii mo wi'i: «Mii batee, Piyer, jakaraari joggataa hanne, go jeddaa am faa de tati bi'aa a annaa am.»

Ciriyee gam wakkati toora

³⁵ Den Yeesu wi'i ɓe: «No lilunoomi on on jogaaki ceede e bogooru e paɗe, on dullii goɗɗum na?» Ɓe toontii: «Men dullay goɗɗum.»

³⁶ Den, o wi'i ɓe: «Amma jooni, gooduɗo ceede fu etta, non bo gooduɗo bogooru fu etta nu, mo walaa kaafahi fu, sippa toggoore mum soodira ki.

³⁷ Gam mii bata on. Sey haala binnaaka kaa fu hebba dow am: ‟O lintaama hakkune waɗooɓe ko halli.” Ko bataa dow am fu hebban.»

³⁸ Aahiiɓe makko wi'i mo: «Joomiraawo, nani ɗo kaafaaje ɗiɗi.» O toontii: «Heƴii.»

Yeesu e du'oo dow waanne jaytuuje

³⁹ Yeesu wurtii, yahi dow waanne Jaytuuje, hande no o woowunoo, aahiiɓe makko tokki mo.

⁴⁰ No o yottii nokkuure nen, o wi'i ɓe: «Du'ee, gam to on naatee der jarbeeji.»

⁴¹ O woɗɗodii ɓe seɗɗa hande jaka faɗɗande hayre, o jiccii oo du'oo,

⁴² oo wi'a: «*Baaba, to aa yiɗi, woɗɗinanam jarirgel toora ŋel, amma ko jiɗuɗaa laatoo, hinaa ko jiɗum.»

⁴³ Den malaykaajo gom suppitanii mo diga kammu, gam semmiɗina mo.

⁴⁴ [No biisere ɓerne sattani mo, o du'ii e tinnaare, ko guli makko waylitii hande toɓɓe ƴiiƴam, e sinta e leydi]

⁴⁵ No o du'odii, o ummi o witti to aahiiɓe makko, o tawi ɓee ɗaani sabbu biisere ɓerɗe.

⁴⁶ O wi'i ɓe: «Gam ume ko oon ɗaani? Ummee, du'ee, gam to on naatee der jarbeeji.»

Nanŋoore Yeesu

⁴⁷ O heennyay batugo, go jama'aare suppitoy, Yahuuda, gooto der aahiiɓe sappo e ɗiɗo, e ardoy ɓe, o ɓattii Yeesu gam o mammiloo ɗum.

⁴⁸ Amma Yeesu wi'i mo: «Yahuuda, e mammilaaɗe nun jammortoɗaa *Ɓii neɗɗo?»

⁴⁹ No yaadiiɓe Yeesu yi'i ko yiɗi waɗugo, ɓe ƴami mo ɓe bi'i: «Joomiraawo, men peƴƴa ɓe kaafaaje na?»

⁵⁰ Ko gooto maɓɓe feƴƴi maccuɗo hooreejo *Limaamiiɓe, wudditi nowru nyaamowol.

⁵¹ Amma Yeesu wi'i ɓe: «Accee, heƴii non non.» O meemi nowru neɗɗo on, o nyawti ɗum.

⁵² Go Yeesu bati hooreejo limaamiiɓe, e mawɗo reenuɓe suudu Alla, e *dottiiɓe waruɓe nanŋugo mo, o wi'i: «Gam ume garuɗon e kaafaaje, e cabbi, hande gujjo nun daartoton?

⁵³ Baadey bane gondumi e mooɗon der suudu Alla go on daartay nanŋugo am? Amma wakkatiire nee ɗo nun laatii ne mon, e baawɗe niwre.»

Piyer yeddii wi'i annaa Yeesu

⁵⁴ No ɓe nanŋi Yeesu, ɓe jaari der wuro hooreejo *Limaamiiɓe, Piyer e tokki ɓawɓawre.

⁵⁵ Duɗal gom e huɓɓaa caka fageere wuro, himɓe e jooɗi e aytinii, go Piyer jooɗii hakkune maɓɓe.

⁵⁶ Go korɗo debbo gom yi'i mo, oo jooɗii ley yiite, go tiggi mo gite, wi'i: «Neɗɗo oo ɗo bo e wondunoo e makko!»

⁵⁷ Amma Piyer yeddi mo wi'i: «Debbo, mi annaa mo.»

⁵⁸ No ɓeydii seɗɗa, goɗɗo yi'i mo kade, wi'i: «An bo aa gooto maɓɓe nun!» Amma Piyer toontii mo wi'i: «Aawo, mi laataaki gooto maɓɓe.»

⁵⁹ Kade no jaka yanne woore waɗi, goɗɗo wi'i e semme: «Din din neɗɗo oo e wondunoo e makko, Galilinkeejo nun du.»

⁶⁰ Amma Piyer toontii wi'i: «Mi faamaay ko jiɗuɗaa batugo.» Wakkati o bati ka, den jakaraari joggi.

⁶¹ Joomiraawo yeeƴitii daari Piyer, den Piyer siwtori ka Joomiraawo batunoo ɗum: «Go jakaraari joga hanne, a wi'an de tati a annaa am.»

⁶² Den Piyer wurtii wulli bojji kaaɗuɗi.

Yeesu yennaama fiyaa

⁶³ Himɓe reenuɓe Yeesu e jala mo, e fiya mo,

⁶⁴ ɓee kooma yeeso makko, den ɓee ƴama mo ɓee bi'a: «Tinta, moy nun fiyu maa?»

⁶⁵ Go ɓee jenna mo jennooje naawuɗe.

Yeesu yaaraama yeeso dawrooɓe

⁶⁶ No weeti, *dottiiɓe *Yahuduuɓe e hooreeɓe *Limaamiiɓe e *moodiɓɓe tawreeta hawritii. Ɓe gaɗi Yeesu waddaa yeeso waalde maɓɓe dawroore mawne,

⁶⁷ go ɓe ƴami mo ɓe bi'i: «To an woni *Almasiihu, batu men.» O toontii ɓe o wi'i: «To mi batii on bo, on goonɗintaa,

⁶⁸ to bo mi ƴamii on haala on toontataako am.

⁶⁹ Amma diga jooni, *Ɓii neɗɗo jooɗoto nyaamo Alla mo baawɗe.»

⁷⁰ Go ɓe fu ɓe bi'i: «A laati nun den *Ɓiɗɗo Alla na?» O toontii ɓe o wi'i: «On batii ka, nun nun laatiimi.»

⁷¹ Ko ɓe bi'i: «En bukaaka kade seedeejo! Enen e ko'e men en nanii ka o bati e hunnuko makko.»