Luka 21 - Bible Fulfulde Bénin New Testament

Dokkal debbo gowniijo

¹ Yeesu ɓanti gite go o yi'i jom ceedeeɓe e watta dokke mum der nokkuure to ceede wattetee.

² Den o yi'i debbo gowniijo talakaajo gom e watta ceeron petton ɗiɗon.

³ O wi'i: «E gooŋa batanmi on, debbo gowniijo talakaajo on, wattii ceede ɓuri ɓee to fu.

⁴ Gam horiiɓe fu, wattu nun ceede ɗe ɓe bukaaka, amma kanko, der talakaaku makko, o wattii ceede ɗe o woodi oo rentorii fu.»

Yeesu e batana pusol suudu Alla

⁵ Himɓe woɓɓe e batana suudu Alla e no nu wooɗiniraa e kaaƴe booɗɗe, e dokke ɗe Alla hokkaa, go Yeesu wi'i:

⁶ «Ko ji'oton ɗo fu, nyalaane gom waraan baa hayre yowataako dow wonne, ɗum fu ɗum birgitinte.»

Boneeji garooji go duuniyaaru heennya

⁷ Ɓe ƴami mo ɓe bi'i: «Moodibbo, dey nun ɗum waɗoyta? Maane ney nun hollitoyta wakkati ɗum waɗoyta?»

⁸ Yeesu toontii ɓe, wi'i: «Kakkilee, to on accee goɗɗo jammoo on, gam himɓe ɗuuɓɓe waraan e inne am wi'a kan woni *Almasiihu. Wakkati on yottake du ko! Amma to on tokkee ɓe.

⁹ To on nananii konuuji e fitina, to on kulee, sey ɗum ɗon wara taw, amma keenyol duuniyaaru bane ɗon taw.»

¹⁰ Go o ɓeydi kade o wi'i: «Lenyi ummontirto hawre, laamu ummanto laamu,

¹¹ leydi dimmoto sanne, der nokkuuje goɗɗe bo, masiibooji e rafooji waɗan, kujje kunniiɗe e maaneeji mawɗi laatoto dow kammu.

¹² Amma ko huune ɗum fu laatoo, on nanŋete, tooreɗon, jaareɗon kiiteɗon der cuuɗi juulirɗe, ɓaawo mum, on maɓɓete der kasu, jaareɗon yeeso laamiiɓe e mawɓe genni gam inne am.

¹³ Kanjum nun hokkata on laawol seedanaago inne am.

¹⁴ To on miilee der ɓerɗe mooɗon to noy burtortoɗon, e kaye batoyton.

¹⁵ Gam mi hokkan on haala ka batoyton, e hakkillo ŋo wayɓe mon fu waawataa ko salii naa bo yeddi.

¹⁶ Saareeji mon, e rindaaɓe mon, e wondaaɓe mon, e banniraaɓe mon fu jammoto on, ɓe baran woɓɓe mon.

¹⁷ Himɓe fu wanyan on gam inne am.

¹⁸ Amma baa gaasayel hoore mon gootel halkataa.

¹⁹ E tinnaare mooɗon, on kisinan yonkiiji mon.»

Yeesu e batana pusol Urusaliima

²⁰ «To on ji'ii haɓooɓe konu, e fiiltitii *Urusaliima, paamee no wakkati muunyitol maggol faanake.

²¹ Den mum, tawaaɓe Yahudiya dogga yaha dow baalle, tawaaɓe Urusaliima bo dogga wurtoo, wonɓe der gennihon petton bo to wittu der wanŋarde.

²² Gam nyalaaɗe ɗen laati nun nyalaaɗe wattaago, heɓa ko dewte batunoo fu hebba.

²³ Bone laatanto rewɓe gaamɓe e musinteeɓe der nyalaaɗe ɗen! Gam ɓillaare mawne laatoto dow leydi nin, e mone Alla dow himɓe mayri.

²⁴ Ɓe bariroyte e kaafaaje, ɓe jaarete ɓe maɓɓee der leyɗe fu, lenyi janani yaaɓan Urusaliima faa wakkati majji hebba.»

Garki ɓii neɗɗo

²⁵ «Alaamaaji laatoyto dow naaŋe e lewru, e der koode. Dow leydi bo, hakkillooji himɓe ummoto faa ɓe annataa ko ɓe gaɗata gam rimmo diyam maayo e galmaaji mum.

²⁶ Kulol waran himɓe, to ɓee miilana ko waranoyta duuniyaaru, gam baawɗeeji gonuɗi dow kammu dimmete.

²⁷ Den mum, on ji'an *Ɓii neɗɗo e wara der duula e baawɗe mawɗe, e tedduŋal.

²⁸ To ɗum ɗon fuɗɗii waɗugo, poortee, ɓanton ko'e, gam kisidam mon faanake.»

Ballool dow ibbi

²⁹ Den Yeesu waɗani ɓe ballool ŋol ɗo, wi'i: «Daaree ibbi e leɗɗe koriiɗe fu.

³⁰ To on ji'ii baafe majje fuɗɗii wilitingo, oon anni onon e ko'e mon no wakkati seetto faanake.

³¹ Hande nun bo, to on ji'ii huune ɗum e waɗa, annee no *Laamaare Alla faanake.

³² E gooŋa batanmi on, himɓe jaamanuuru nuu ɗo maayidintaa, go ɗum fu ɗum waɗa.

³³ Kammu e leydi yawtan, amma haala am yawtataa faa abada.»

Hakkilango hoore mum e miilooji duuniyaaru

³⁴ «Kakkilanee ko'e mon! To on accee nyaamduuji juulɗe, e jaranji, e miilooji duuniyaaru hebba ɓerɗe mon gam to nyalaane nen juhu on.

³⁵ Gam ne waran dow himɓe woniiɓe der duuniyaaru ɗo fu hande pittol.

³⁶ Gam majjum to on ɗaane, du'ee wakkati fu, gam keɓon semme daɗugo huune ko warata fu, keɓon bo daraago yeeso *Ɓii neɗɗo.»

³⁷ Nyalooma, Yeesu e janŋina der suudu Alla, jemma bo, oo yaha oo waala dow waanne wi'eteene ‟waanne Jaytuuje.”

³⁸ Go himɓe fu e dawaa e wara to makko der suudu Alla, e hettinanii mo.