Luka 20 - Bible Fulfulde Bénin New Testament

Toy baawɗe Yeesu ƴiwi?

¹ Der balɗe ɗen, Yeesu e janŋina himɓe der suudu Alla, e waajoo *linjiila, den hooreeɓe *limaamiiɓe e *moodiɓɓe tawreeta e *dottiiɓe wari,

² wi'i mo: «Batu men, e baawɗe ɗey nun gaɗirtaa huune ɗum, naa bo, moy nun hokku maa baawɗe majjum?»

³ Yeesu toontii ɓe wi'i: «Min bo mi ƴaman on haala goota, toontee am.

⁴ *Batisi Yuhaana waɗata, to Alla o heɓi ɗum naa to himɓe?»

⁵ Amma ɓe baddi hakkune maɓɓe ɓe bi'i: «To en toontake: ‟Alla nun,” o ƴaman en no waɗi ko en goonɗinay Yuhaana?

⁶ Amma to en toontake: ‟himɓe nun liloy mo,” ɓe paɗɗan en kaaƴe, ɓe bara, gam himɓe fu e anni Yuhaana laati nun annabiijo.»

⁷ Go ɓe toontii ɓe bi'i: «Men annaa diga toy nun o heɓi ɗum.»

⁸ Yeesu wi'i ɓe: «Min bo, mi batataa on e baawɗe ɗey nun gaɗiranmi ɗum.»

Ballool reenuɓe gesa innabooje

⁹ Ɓaawo mum, Yeesu waɗani himɓe ballool ŋol ɗo wi'i: «Goɗɗo nun aawi innabooje mum, o yowani ɗe woɓɓe junŋo, o yawti genni, gam o ɓooyaa ton.

¹⁰ No wakkati ɓorol innabooje yottii, o lili maccuɗo makko to yowanaaɓe gesa ŋan, gam ɓe kokka mo ko haanani mo der ɓiɓɓe gesa makko. Amma yowanaaɓe gesa ŋan fiyi mo, riiwi juuɗe baanji.

¹¹ Jom gesa ŋan lilitii kade maccuɗo mum goɗɗo, amma yowanaaɓe ɓen fiyi oo ɗon bo, yenni mo, tarbi mo juuɗe baanji.

¹² O lili kade maccuɗo tataɓo, oo ɗon bo, ɓe nawni ɗum, ɓe diiwi ɗum.

¹³ Jom gesa wi'i: ‟Noy gaɗanmi? Mi lilan ɓiɗɗo am jiɗaaɗo, tokka oo ɗon kan, ɓe teddinan ɗum.”

¹⁴ Amma no yowanaaɓe gesa ŋan holliri mo, ɓe bi'ontiri hakkune maɓɓe: “On ji'ay ɗo donoowo gesa ŋan, en baree mo, gam donen ŋa.”

¹⁵ Go ɓe bari mo, ɓe etti ɓe boppi yaasi gesa.» Ume nun jom gesa ŋan waɗanta ɓe?

¹⁶ «O waran o halka yowanaaɓe gesa ŋan, o yowana ŋa woɓɓe.» No jama'aare nani haala kan, ɓe bi'i: «To iri majjum laato!»

¹⁷ Amma Yeesu daari ɓe wi'i: «Ume nun haala binni nii ɗo fillitii? Hayre ne mahooɓe woppi, kayre nun laatii jogiine maadi.»

¹⁸ Januɗo dow hayre nen muunyitinto, to ne yantii goɗɗo bo, ne muunyitan mo.

Yoɓugo ceede faada

¹⁹ Hooreeɓe *limaamiiɓe e *moodiɓɓe tawreeta, e daarta no nanŋirta Yeesu der wakkatiire nen, gam ɓee anni kamɓe nun o waɗani ballool ŋol, amma ɓee kula jama'aare.

²⁰ Go ɓee kakkilani mo, ɓe lili himɓe woɓɓe nanditinɓe ko'e mum hande himɓe yeeɓɓe, gam ɓe keɓa ɓe nanŋa mo der haala makko, ɓe gatta der juuɗe hiitotooɓe e mawɓe genni.

²¹ Ɓe ƴami mo haala kaa ɗo ɓe bi'i: «Moodibbo, emen anni ko batataa e ko janŋintaa fu, laati nun deydey, gooŋa nun janŋinirtaa laawol Alla, a ɓurontirtaa bo himɓe.

²² Batu men, sariya hokkii laawol men joɓa laamiiɗo Roma ceede faada naa to men joɓu?»

²³ Amma Yeesu faanti dabare maɓɓe, go toontii ɓe, wi'i:

²⁴ «Kollee am ceede ɗen. Foto moy e inne moy nun winnaa ɗon?» Ɓe toontii: «Laamiiɗo Roma.»

²⁵ Den Yeesu wi'i ɓe: «To non, kokkee laamiiɗo Roma ko laatanii ɗum, kokkon Alla bo ko laatanii ɗum.»

²⁶ Ɓe tampi ko nanŋi mo dow haala makko yeeso jama'aare. Amma toontol makko haaynii ɓe, go ɓe jeeɗii.

Ƴanɗe dow pintol maayɓe

²⁷ Woɓɓe der Sadukiiɓe yeddooɓe pintol maayɓe wari to Yeesu. Ɓe ƴami mo ɓe bi'i:

²⁸ «Moodibbo, nani ɗo ko Muusa umuri men: ‟To goɗɗo ɓaŋii debbo, go maayii rinday e makko, sey minnyiiko naatta debbo on, rinda mo sukaaɓe, gam o darnana mawniiko maayuɗo lenyol.”

²⁹ Non non nun rindaaɓe jeeɗiɗo gom wonno. Arano ɓaŋi debbo, maayi, accay suka.

³⁰ Ɗiɗaɓo naatti debbo on,

³¹ tataɓo bo, nonnon, faa ɓe fu jeeɗiɗo ɓe maayidi, ɓe dinday e debbo on.

³² Ɓaawo maɓɓe ɓe fu, debbo on bo maayi.

³³ Nyalaane maayɓe fintoyta, moy nun e maɓɓe o laatoyto debbo mum? Gam ɓe fu jeeɗiɗo ɓe koowiino mo!»

³⁴ Yeesu toontii ɓe wi'i: «Himɓe duuniyaaru nuu ɗo e hoowa e hoowee bo,

³⁵ amma daaraaɓe fotii fintineego, naata der duuniyaaru nu jaaŋo, hoowataa, hoowataake bo.

³⁶ Ɓe maayataa kade gam ɓe nandan hande malaykaaɓe, ɓe laatoto ɓiɓɓe Alla, gam ɓe pintinaama diga maayde.

³⁷ Der haala huuraare jaɓoore yiite, Muusa e hoore mum hollitii no pintol maayɓe na'on. No o hokki Joomiraawo inne, ‟Alla Iburahiima, Alla Isiyaaku e Alla Yaakuubu.”»

³⁸ Nani Alla laataaki Alla maayuɓe, amma Alla wuuruɓe, gam makko ɓe fu ɓe buuri.

³⁹ Woɓɓe der *moodiɓɓe tawreeta toonti wi'i: «Moodibbo, deydey nun batuɗaa ɗon.»

⁴⁰ Ɓe cuusay kade ko ƴami mo gokka.

Almasiihu Ɓii Dawda nun na?

⁴¹ Yeesu wi'i ɓe: «Noy ɗum waɗi ko *Almasiihu e noddee *Ɓii Dawda?

⁴² Gam Dawda e hoore mum batii der dewtere Jabuura wi'i: ‟Joomiraawo batii Joomiraawo am wi'i: Jooɗa junŋo am nyaamo,

⁴³ faa mi waɗa wayɓe maa laatoo jowirɗum koyɗe maa.”

⁴⁴ To Dawda noddii mo ‟Joomiraawo,” noy o laatortoo ɓiyiiko?»

Yeesu felii moodiɓɓe tawreeta

⁴⁵ Den himɓe fu e hettinanii Yeesu, go o bati aahiiɓe makko o wi'i:

⁴⁶ «Kakkilanee *moodiɓɓe tawreeta, yiɗuɓe woositaago e ɓornori toggooje juuɗɗe, ɓee jiɗi sanneego der jayri to himɓe hawritintoo, ɓee jiɗi bo kittaaje arandeeje der juulirɗe e der nyaamirɗe fu.

⁴⁷ Ɓee teeta ko rewɓe gowniiɓe woodi fu, ɓee gaɗa du'aaje juuɗɗe gam ɓe ji'ee. Ɓe keɓan kiita ɓurka mawnugo.»