Luka 2 - Bible Fulfulde Bénin New Testament

Dingol Yeesu

¹ Der wakkati mum, Agustus laamiiɗo umuri himɓe jeyde leydi mum fu limee.

² Limgal artirgal ŋal waɗay maa der wakkati Kiriniyus laamanii leydi Siriya.

³ Himɓe yahi gam limee, moy fu der genni to jeyaa.

⁴ Yusufu bo ummii diga Nasaratu der leydi *Galili, yahi leydi Yahudiya faa Baytilaama, der genni Dawda laamiiɗo, gam der wuro Dawda e lenyol muuɗum nun o jeyaa.

⁵ Yusufu yahi, yaari ɗaɓɓaaɗo mum Mariyama gooduɗo reedu.

⁶ No ɓe jottii ton, wakkati dingol Mariyama yotti.

⁷ O rimi suka gorko, afo makko, o soomi mo wudere, o fukkini dow fuɗo ko baali nyaamata, gam ɓe keɓay jaayri der werdude hoɓɓe.

Malaykaajo hollitanake durooɓe der ladde

⁸ Foti der leydi nin, e woodi durooɓe, reenuɓe baali mum jemma der ladde.

⁹ Malaykaajo Joomiraawo hollitanii ɓe, tedduŋal Joomiraawo yayni fiiltitini ɓe, go kulol manŋol nanŋi ɓe.

¹⁰ Malaykaajo wi'i ɓe: «To on kulee, gam mi waddanii on habaru belɗo, kokkoowo himɓe fu seyo manŋo.

¹¹ Hanne on dimanaama Kisinoowo der genni Dawda. Kanko woni *Almasiihu Joomiraawo.

¹² Maane annitirton mo woni: on tawan sukeel keccel e sooma wudere, e fukkinaa dow fuɗo ko baali nyaamata.»

¹³ Ɗon maa ɗon, malaykaaɓe konunkeeɓe dow kammu ɗuuɓɓe suppitoy, wari hawti e malaykaajo on, ɓee jetta Alla ɓee bi'a:

¹⁴ «Tedduŋal wonanii Alla towuɗo, jam dow leydi wonanoo himɓe ɓe o yiɗi.»

Durooɓe yahii Baytilaama

¹⁵ No malaykaaɓe acci ɓe, witti dow, go durooɓe ɓen batontiri hakkune mum wi'i: «En jahu Baytilaama daaren ko waɗi, ko Joomiraawo annini en.»

¹⁶ Ɓe jawɗii ɓe jahi ton, no ɓe jottii, ɓe tawi Mariyama e Yusufu, sukeel bo e fukkinaa dow fuɗo ko baali nyaamata.

¹⁷ No ɓe ji'i sukeel ŋel, ɓe bati ko malaykaajo batunoo ɓe dow maggel.

¹⁸ Nanuɓe haala ka durooɓe ɓen bati fu, haaynaare nanŋi ɗum.

¹⁹ Mariyama kan e jogoo ka nani fu der ɓerne mum, e miijoo ka.

²⁰ Go durooɓe ɓen hogitii witti. Ɓee teddina Alla, ɓee maanta mo gam ko ɓe nani e ko ɓe ji'i deydey hande no malaykaajo batirnoo ɓe.

Yeesu juulnaama yaaraa suudu Alla

²¹ No balɗe jeetati waɗi, suka on juulnaa, hokkaa inne Yeesu. Inne nen nun malaykaajo wi'uno o hokkee diga reedu makko heɓaakano.

Yeesu yaaraama der suudu Alla

²² No nyalaane laaɓineego maɓɓe foti, hande no winniraa der tawreeta Muusa, saareeji makko etti mo yaari *Urusaliima gam ɓe kollaa mo Joomiraawo,

²³ gam nun Joomiraawo wi'i der tawreeta: «Suka gorko afo fu, laatanto nun Joomiraawo .»

²⁴ Ɓe jahii bo sakkanoygo Alla hande no tawreeta Joomiraawo bati waɗee: tantabaraaji petti ɗiɗi naa bo, pooli ɗiɗi goɗɗi .

²⁵ Gorko gom e tawano *Urusaliima, inne makko nun Simeyon. Gorko poonnitiiɗo nun, kulɗo Alla. Oo hettiniino garoowo moyta gonɗi Isira'iilaaɓe. *Ruuhu Ceniiɗo e woni dow makko.

²⁶ Ruuhu Ceniiɗo holli mo o maayataa to o yi'ay *Almasiihu mo Joomiraawo.

²⁷ Ruuhu ɗowi mo, o yahi suudu Alla. Foti den Yeesu, saareeji mum yaarii ɗum ton gam ɓe gaɗanaa mo ko tawreeta wi'i waɗee.

²⁸ Go Simeyon jaɓi mo e juuɗe mum, maanti Alla wi'i:

²⁹ «Joomiraawo, jooni, accu maccuɗo maaɗa maaya e jam hande no batirɗaa.

³⁰ Gam mi yi'ii kisidam maa e gite am,

³¹ ɗam ciryaniɗaa himɓe duuniyaaru fu.

³² Kanjam laatii jayŋol jaynanoowol himɓe ɓe lenyi janani. Ɗam teddinan bo himɓe Isira'iila.»

Annabaaku Simeyon e Haana

³³ Haynaare waɗi baaba e inna dow bateteeka dow suka on.

³⁴ Go Simeyon barkiɗini ɓe, bati Mariyama inna suka on wi'i: «Suka oo suɓa nun gam Isira'iilaaɓe ɗuuɓɓe yana, ɗuuɓɓe bo ummoo, o laatoto alaama ka himɓe jaɓataa.

³⁵ O sumpitan miilooji himɓe cuuɗiiɗi, an bo biisere ɓerne yuwete hande kaafahi.»

Ana annabiijo debbo

³⁶ Annabiijo debbo gom bi'eteeɗo Ana e tawaa ɗon, ɓii Fanuyel nun, mo lenyol Aser, o naywii booɗum. Der gataanaaku makko o ɓaŋaanomaa waɗi duuɓi jeeɗiɗi.

³⁷ Go goriiko maayi, o jooɗi nun o hoowaaka faa o waɗi duuɓi lasooji naay e naay. O wurtataako diga e suudu Alla. Ɗon o woni oo sujidana Alla jemma e nyalooma, oo suumoo, oo du'oo.

³⁸ Wakkati mum debbo on bo wurtoy wari e maanta Alla, e bata heɗiiɓe Alla faaboo *Urusaliima haala suka on.

Wittugo faa Nasaratu

³⁹ No ɓe gaɗi ko tawreeta Joomiraawo wi'i fu, ɓe bitti siire maɓɓe Nasaratu, der leydi *Galili.

⁴⁰ Go suka on e mawna e semmiɗa, oo hebbi hakkillo. Moƴƴere Alla bo e woni dow makko.

Yeesu yahii suudu Alla de o woodi duuɓi sappo e ɗiɗi

⁴¹ Der duuɓol fu, saareeji Yeesu e yaha *Urusaliima gam nyaamoygo juulɗe *Paska.

⁴² No Yeesu waɗi duuɓi sappo e ɗiɗi, saareeji makko yahi *Urusaliima hande no ɓe boowi waɗugo der tawaaŋal juulɗe ɗen.

⁴³ No ɓe keennyi juulɗe ɓee koota, Yeesu, jooɗii *Urusaliima, saareeji makko annaa.

⁴⁴ Ɓee miili o tawa nun der wuuraare yaadiiɓe maɓɓe, den ɓe jahi jahaaŋal nyalaane woore, go ɓe jahi to getti maɓɓe e banniraaɓe maɓɓe, ɓee daarta mo.

⁴⁵ Amma ɓe ji'ay mo, go ɓe bitti Urusaliima ɓee daarta mo.

⁴⁶ Ɓaawo balɗe tati, ɓe tawi mo der suudu Alla oo jooɗii hakkune *moodiɓɓe tawreeta e mawɓe. Oo hettinii ka ɓe batata, oo ƴama ɓe ƴanɗe.

⁴⁷ Hettinaniiɓe mo fu haaynaare nanŋi ɗum, gam annal e toonti makko.

⁴⁸ No ɓe ji'i mo, go ɗum haaynii ɓe, go inniiko wi'i mo: «Ɓiyam, gam ume gaɗanɗaa men nun, a yi'ay no min e baaba maa fu e men daartee, faa ɓerɗe amen biisii na?»

⁴⁹ O toontii ɓe o wi'i: «Ume daartirton am? On annaa no haanu nun mi hiinnoo golle baaba am na?»

⁵⁰ Amma ɓe paamay haala ka o bati ɓe.

⁵¹ O hootidi e maɓɓe faa Nasaratu, oo ɗowtanii ɓe. Inniiko e jogoo kujje ɗen fu der ɓerne mum.

⁵² Go Yeesu e mawna der faamu e ɓannu, oo fottani Alla e himɓe.