Luka 19 - Bible Fulfulde Bénin New Testament

Yeesu e Jakee

¹ Yeesu naati Yeriko, go oo falta der siire nen.

² E wooduno gorko jom ceedeejo gom bi'eteeɗo Jakee, o laati nun mawɗo jaɓooɓe ceede faada.

³ Oo daarta yi'ugo moy nun woni Yeesu, amma o waaway gam sabbu jama'aare, o laati nun bo neɗɗo daɓɓo.

⁴ Go o doggi o ardii yeeso, o yahi o eencoy dow dundehi, gam heɓa o yi'a Yeesu, gam ɗon nun o yawtirta.

⁵ No Yeesu yottii nokkuure nen, tiggitii wi'i: «Jakee, jippa law, gam hanne wuro maa nun beeranmi.»

⁶ Jakee yawɗii jippii, jaɓɓii mo e seyo.

⁷ Yi'uɓe ɗum fu e dumbitoo e wi'a: «Neɗɗo on yahii weeroygo wuro hakkeejo!»

⁸ Jakee ummii darii yeeso Joomiraawo, wi'i: «Daa Joomiraawo, mi hokkan feccere jawdi am talakaaɓe, to mi ƴoyriino goɗɗo jaɓumi ceede mum, mi yoɓan ɗe joomum de naay.»

⁹ Yeesu wi'i mo: «Kisidam naatii der wuro ŋo hanne, gam neɗɗo oo laati nun bo mo lenyol Iburahiima.

¹⁰ Gam *Ɓii neɗɗo wari daartugo, hisina ko majji.»

Ballool ceede

¹¹ Himɓe e hettinii ballaaji Yeesu, go ɓee miila *Laamaare Alla suppitinto nun ɗon maa ɗon, gam o faanake *Urusaliima.

¹² Gam majjum o waɗani ɓe ballool ŋol ɗo o wi'i: «Neɗɗo gom mo lenyol tedduŋol nun yahi genni boɗɗuni gam o laamo, ɓaawo mum, o warta.

¹³ No o yawtata, o noddi gollotooɓe makko sappo, o hokki ɓe ceede kanŋeeri sappo, o wi'i ɓe: Baylitee ɗe hakko gartanmi.”

¹⁴ Amma himɓe genni makko e wanyi mo. Ɓe lili lilaaɓe bataa no ɓe jiɗaa neɗɗo on laamanoo ɓe.

¹⁵ No o laaminaa, o hooti wuro makko. O waɗi gollotooɓe makko ɓe o hokkunoo ceede ɓen noddee, gam o anna no moy maɓɓe fu waylitiri ɗe.

¹⁶ Arano wari, wi'i: ‟Joomiraawo, ceede maaɗa ɗen riibake ceede goɗɗe sappo.”

¹⁷ O wi'i mo: ‟Wooɗii, gollotooɗo geeto, gam a laatake koolaaɗo der huune pettum, laamana ci'e sappo.”

¹⁸ Gollotooɗo ɗiɗaɓo wari kanun bo, wi'i: “Joomiraawo, ceede maaɗa ɗen riibake ceede goɗɗe kanje joy.”

¹⁹ O bati mo o wi'i: “An bo, mi waɗii maa hooreejo dow ci'e joy.”

²⁰ Gollotooɗo goɗɗo wari, wi'i: “Joomiraawo, ceede maaɗa nani ɗo, mi suuɗu ɗe nun der lincel,

²¹ e gooŋa mi hulii, gam a laati nun neɗɗo caɗuɗo. Aa etta ko a resay, aa rugga bo ko a aaway!”

²² Joomiraawo on wi'i mo: ‟Mi hiitorte e haala maa, an gollotooɗo kalluɗo, aa annunoo mi tagaaɗo caɗuɗo nun, mii etta ko mi resayno, mii rugga bo ko mi aawayno.

²³ Too, noy waɗi go a wattay ceede am der banki? To mi wartiino mi jaɓanno ɗe e riiba!”

²⁴ Go o bati tawaaɓe ɗon o wi'i: “Teetee ceede makko ɗen, kokkon ɗe mo ceede sappo.”

²⁵ Ɓe bi'i mo: ‟Joomiraawo, oo woodi ko ceede sappo!”

²⁶ O wi'i ɓe: ‟Gooduɗo nun hokketee, amma mo woodaa, baa ko woodi, teetete.

²⁷ Wayɓe am ɓe jiɗaa mi laamanoo ɗum, gaddee ɓe ɗo yeeso am, kiison ɓe.”»

Yeesu naati Urusaliima

²⁸ No Yeesu bati haalaaji ɗin heennyi, o ardii ɓe o yahi *Urusaliima.

²⁹ No o faanii Baytifaaji e Baytaniya takkol waanne wi'eteene, waanne Jaytuuje, o lili aahiiɓe makko ɗiɗo.

³⁰ O wi'i ɓe: «Jahee siire tawaane yeeso, to on jottake ton, on tawan babbel gom e haɓɓii, ŋel goɗɗo meeɗay ko waɗɗii. Pittee ŋel gaddon.

³¹ To goɗɗo ƴamii on: “Gam ume ko oon pitta ŋel,” bi'ee mo: “Joomiraawo nun bukaa ŋel.”»

³² Lilaaɓe ɓen yahi tawoy huune fu hande no Yeesu batirnoo ɓe.

³³ No ɓe pittata babbel ŋel, joomiraaɓe maggel wi'i ɓe: «Gam ume ko oon pitta ŋel?»

³⁴ Ɓe toontii: «Joomiraawo nun bukaa ŋel.»

³⁵ Go ɓe jaarani ŋel Yeesu, ɓe jowi toggooje maɓɓe dow maggel, ɓe baɗɗini Yeesu.

³⁶ Oo yaha, go himɓe e weƴƴita toggooje mum dow laawol.

³⁷ No o faanii *Urusaliima, oo jippoo diga waanne Jaytuuje, aahiiɓe makko tokkinɓe mo fu, maati belɗum ɓerɗe, yanti e maanta Alla e daaɗe towɗe, gam haaynaareeji ɗi ɓe ji'i.

³⁸ Ɓee bi'a: «Barke laatanoo laamiiɗo garoowo e inne Joomiraawo! Jam tawee dow kammu, tedduŋal laatanoo Alla towuɗo.»

³⁹ *Farisaaɓe woɓɓe, tawaaɓe der jama'aare nen bati Yeesu wi'i: «Moodibbo, wi'u aahiiɓe maa jeeɗoo.»

⁴⁰ Yeesu toontii ɓe wi'i: «To ɓe jeeɗake, kaaƴe batan!»

Yeesu wullii gam Urusaliima

⁴¹ No Yeesu faanii *Urusaliima, holliri ni, o wulli gam mayri,

⁴² o wi'i: «To aa annuno an bo hanne ko hokketee jam? Amma jooni eɗum suuɗanii gite maaɗa!

⁴³ Gam nyalaaɗe gom waranoyte, wayɓe maa mahan birniwol fiiltitinee, ɓe tummiree, ɓe ɓiɗɗee becce fu.

⁴⁴ Ɓe pusete an e himɓe maa wonɓe caka maa, ɓe accantaa maa hayre dow hayre, gam a annitay wakkati Alla wari faabaago maa!»

Yeesu riiwii sippooɓe der suudu Alla

⁴⁵ Yeesu naatii der suudu Alla, go o yanti oo riiwa sippooɓe tawaaɓe ɗon,

⁴⁶ oo wi'a ɓe: «Suudu am laati nun suudu du'aare. Amma onon, on gartirii ŋol suuɗorde wuyɓe!»

⁴⁷ Yeesu e janŋina nyalaaɗe fu der suudu Alla. *Hooreeɓe limaamiiɓe e *moodiɓɓe tawreeta e dottiiɓe e daarta warugo mo.

⁴⁸ Amma ɓe annaa no ɓe gaɗirta ɗum, gam himɓe fu e hettinanii mo e hakkillo.