Luka 18 - Bible Fulfulde Bénin New Testament

Debbo gowniijo e kiitotooɗo kalluɗo

¹ Yeesu waɗani ɓe ballool ŋol ɗo gam o holla ɓe no haani ɓee du'o wakkati fu, to ɓe comu.

² O wi'i ɓe: «Kiitotooɗo nun tawanoo der siire gom, o hulataa Alla, o faalaaka bo e goɗɗo.

³ Debbo gowniijo gom bo e tawaa der siire nen, wakkati fu, oo yaha oo tawaa kiitotooɗo on, oo wi'a: ‟Hiitanam hakkune am e ganyo am!”

⁴ Kiitotooɗo on yiɗay ka, faa ɗum ɓooyi, den o miiji der ɓerne makko o wi'i: “Baa to mi hulataa Alla, mi faaltaaka bo e goɗɗo,

⁵ no gowniijo oo ɗo e ɓillammi, sey mi waɗana mo sariya makko, gam to o waru oo ɓillammi wakkati fu.”»

⁶ Joomiraawo ɓeydi wi'i: «Kettinee ko kiitotooɗo kalluɗo on wi'i.

⁷ Alla hiitantaako ɓe o suɓi, wullanooɓe mo jemma e nyalooma na? O ɓooyan go o walla ɓe na?

⁸ Mii bata on o hiitanto ɓe law. Amma to *Ɓii neɗɗo waroy, o tawan goonɗinki der duuniyaaru na?»

Ballool Farisaajo e jaɓoowo ceede faada

⁹ Yeesu waɗi ballool ŋol ɗo kade gam miijuɓe e laatii foonnitiiɓe yeeso Alla, go ɓee jawoo woɓɓe.

¹⁰ Himɓe ɗiɗo nun naati der suudu Alla gam du'oo, oo ɗo *Farisaajo, oo to jaɓoowo ceede faada.

¹¹ Farisaajo on darii e du'oo der ɓerne mum e wi'a: ‟Yaa Alla, mi yettii maa gam mi laataaki hande no himɓe horiiɓe, laatiiɓe wuyɓe, ɓe laataaki foonnitiiɓe, waɗooɓe jeenu, mi yettii maa gam mi laataaki hande jaɓoowo ceede faada oo ɗo.

¹² Der asaweere fu, mii suumoo de ɗiɗi. Mii sutta jakka am der ko keɓumi fu.”

¹³ Jaɓoowo ceede faada on bo darii woɗɗi, o yiɗay baa ɓantugo gite o daara dow, amma o leesini hoore makko, o wi'i: «Yaa Alla, yurmam min laatiiɗo hakkeejo.»

¹⁴ Mii wi'a on, kanko, o laatinaama poonnitiiɗo o hootiri wuro makko, amma Farisaajo on heɓay. Gam mawninɗo hoore mum fu leesinte, leesinɗo hoore mum bo mawninte.

Yeesu e yowa sukahon petton juuɗe

¹⁵ Himɓe waddani Yeesu sukahon petton gam o meema kon, amma no aahiiɓe makko yi'i ɓe, yanti e nyaasitoo ɓe.

¹⁶ Go Yeesu noddi ɓe wi'i: «Accee sukahon kon wara to am! To on kaɗee kon, gam iri maɓɓe *Laamaare Alla wonani.

¹⁷ E gooŋa batanmi on: mo jaɓay Laamaare Alla hande sukeel deenanel fu, waawataa ko naati der mayre pay.»

Jom ceedeejo gom

¹⁸ Hooreejo *Yahuduuɓe gom ƴami Yeesu wi'i: «Moodibbo geeto, ume haani mi waɗa go mi heɓa yonki tabitiiki?»

¹⁹ Yeesu toontii mo wi'i: «Gam ume ko aa noddammi geeto? Goɗɗo laataaki geeto to hinaa Alla tan.

²⁰ Aa anni sariyaaji ɗii ɗo: Taa waɗu jeenu, taa waru neɗɗo, taa wujju, taa seeda fewre dow goɗɗo, teddin baaba maa e inna maa.»

²¹ Gorko on toontii mo wi'i: «Sariyaaji ɗii ɗon fu, mii jogii ɗum diga sukaaku am.»

²² No Yeesu nani ka wi'i mo: «Gootum tan jaccu maa, sippu jawdi maa fu, ceennanaa talakaaɓe ceede mum, den mum, a heɓan jawdi gonni der kammu, ɓaawo mum garaa tokkaa am.»

²³ Amma no o nani boliiɗe ɗen, ɓerne makko biisi, gam o laati nun jom jawdiijo sanne.

²⁴ No Yeesu yi'i no ɓerne makko biisorii, wi'i: «Eɗum saɗani jom jawdiiɓe naata der *Laamaare Alla.

²⁵ Eɗum ɓuri hoyugo jeelooba wurtoroo der hinere baatal, dow naatugo jom jawdiijo der Laamaare Alla.»

²⁶ Hettinaniiɓe mo wi'i: «Den mum, moy nun waawata ko hisi?»

²⁷ Yeesu toontii wi'i: «Ko waɗataako e himɓe, waɗoto to Alla.»

²⁸ Den Piyer wi'i: «Daa minon men acci ko men goodi fu, men tokkii maa.»

²⁹ Yeesu wi'i ɓe: «E gooŋa batanmi on: To goɗɗo accii wuro mum, naa bo debbo mum, e miiraaɓe mum, e getti mum, e sukaaɓe mum, gam *Laamaare Alla,

³⁰ o heɓan ko ɓuri ɗum ɗuuɗugo der wakkati kii ɗo, der wakkati garoowi bo, o heɓan yonki tabitiiki.»

Yeesu batani maayde e pintol mum de tatawre.

³¹ Yeesu noddii aahiiɓe mum sappo e ɗiɗo wi'i ɓe: «Nani, en na'on yaha *Urusaliima, ton nun ko *annabiiɓe winnuno dow *Ɓii neɗɗo hebboyta.

³² Gam o wattete der juuɗe ɓe lenyi janani, ɓe jalan mo, ɓe toora mo, ɓe tuuta mo joode.

³³ To ɓe piyidii mo ɓocci, ɓe bara mo. Den nyalaane tatawre, o fintan.»

³⁴ Amma aahiiɓe makko faamay goɗɗum der ka o bati, haalaaji ɗi o fillanii ɓe fu suuɗani ɓe nun, ɓe annaa ko o yiɗi batango.

Yeesu nyawti bunɗo

³⁵ No Yeesu faanii Yeriko, bunɗo gom e jooɗii sera laawol e fiya bara.

³⁶ O nani jama'aare e faloo, go o ƴami ɓe: «Ume nun waɗi?»

³⁷ Go o bataa no Yeesu Nasaratuujo nun yawtata ɗon.

³⁸ O bati e daane towne o wi'i: «*Ɓii Dawda, yurmam!»

³⁹ Ardiiɓe mo e nyaasitoo mo e wi'a o jeeɗoo, amma o ɓeydi batugo dow o wi'i: «Ɓii Dawda, yurmam!»

⁴⁰ Yeesu darii, wi'i ɓe gaddana mo ɗum. No bunɗo on faanii, Yeesu ƴami mo wi'i:

⁴¹ «Ume jiɗuɗaa mi waɗanee?» O toontii o wi'i: «Moodibbo, accu mi wunta.»

⁴² Go Yeesu wi'i mo: «Wuntu, goonɗinki maa faabake maa.»

⁴³ Ɗon maa ɗon, o wunti, o tokkini Yeesu oo yetta Alla. No jama'aare yi'i ɗum, yanti e maanta Alla.