Luka 17 - Bible Fulfulde Bénin New Testament

Laabi doƴƴere

¹ Yeesu batii aahiiɓe mum wi'i: «Ɗum waɗataako laabi doƴƴere waray, amma bone laatanto laatiiɗo daliila majjum.

² Ɗum ɓurananno mo, o haɓɓanee hayre namarde e daane o faɗɗee der maayo, e no o laatorantoo faanɗuɓe ɓen gooto mum laawol doƴƴere.

³ Kakkilanee ko'e mon! To banniraawo maa e waɗa hakke, wooltan mo. To o waylitake, sawrana mo.

⁴ To o woofanii maa de jeeɗiɗi der nyalaane woore, go de jeeɗiɗi ɗen fu, oo wittaa o wi'ee: ‟Sawranam,” sawrana mo.»

Goonɗinki semmentehi

⁵ Lilaaɓe batii Joomiraawo wi'i: «Ɓeydan men goonɗinki.»

⁶ Joomiraawo toontii ɓe wi'i: «To oon goodunoo goonɗinki hande ɓinŋel mutaadihi, on baawan ko wi'i leggal ŋal ɗo: ‟Ɗoppita, tiggoɗaa der maayo!” ŋal ɗowtanto on.»

Gollotooɓe ɓe laataaki goɗɗum

⁷ «Hande jooni to goɗɗo mon e woodi gollotooɗo, demoowo naa bo duroowo, to o yi'ii mo oo warta diga deme, o wi'an mo: ‟War law nyaamu na?”

⁸ Aawo, amma o wi'an mo: ‟Waylitin gineeji maa, gaɗanaa am nafa, desaa mi nyaama mi yara. Ɓaawo mum an bo, nyaamaa jaraa.”

⁹ O yettan gollotooɗo on to o waɗii ko o wi'aa na?

¹⁰ Hande nun onon bo. To on gaɗii ko bi'aɗon gaɗon fu, bi'ee: ‟Men laati nun gollotooɓe tan, golle kaanuɗe men gaɗa nun men gaɗi.”»

Yeesu nyawti sesseɓɓe sappo

¹¹ No Yeesu yahata *Urusaliima, o tokki e Samariya e *Galili.

¹² No o naatata ci'el gom, sesseɓɓe sappo fotti e makko, ɓe darii woɗɗi.

¹³ Ɓe janti ɓee kuuɓa, ɓee bi'a: «Yeesu moodibbo, yurma men!»

¹⁴ Yeesu yi'i ɓe go wi'i: «Jahee kollee ko'e mon *limaamiiɓe.» No ɓe jahata ton, ɓe joofii.

¹⁵ Gooto der maɓɓe no yi'i yoofake, wittoy e maanta Alla e daane towne.

¹⁶ O jicci ley koyɗe Yeesu, oo yetta mo. Neɗɗo on laati nun samariyaajo.

¹⁷ Go Yeesu wi'i: «Ɓe fu sappo bane yoofii na? Toy jeenayo horiiɓe woni?

¹⁸ Goɗɗo maɓɓe miijaaki wittaa yetta Alla sey koɗo oo ɗo?»

¹⁹ Den Yeesu wi'i mo: «Umma yahu, hoolaare maa hisinii maa.»

Maaneeji Laamaare Alla

²⁰ *Farisaaɓe ƴami Yeesu dey nun *Laamaare Alla warata? O toontii ɓe o wi'i: «Laamaare Alla warirtaa hande no baawirten ko yi'iri ne.»

²¹ Wi'ataake: ‟Daaree, nani ne ɗo, naa bo ne nani to!” Gam paamee Laamaare Alla e tawaa hakkune mon.

²² Go o bati aahiiɓe o wi'i: «Wakkati waraan de jiɗoton yi'ugo *Ɓii neɗɗo baa nyalaane woore, amma on ji'ataa mo bo.

²³ On bi'oyte: ‟O nani ɗo, naa bo o nani to!” To on jahee ton, to on doggee ton bo.

²⁴ Hande no maaƴƴere maaƴƴirta weccoore kammu nee ɗo faa nee to, nonnon nun *Ɓii neɗɗo laatoytoo der nyalaane o wittoyta.

²⁵ Amma sey o tooroo taw puy, himɓe jaamanuuru nu saloo mo.

²⁶ Ko waɗuno der wakkati Nuuhu, ɗum waɗitinto bo kade der nyalaane Ɓii neɗɗo.

²⁷ Himɓe e nyaamanno e yara, ɓee koowa, ɓee koowee faa nyaanne Nuuhu naati der laana diyam. Toɓo manŋo wari halki ɓe ɓe fu.

²⁸ Ko laatino der wakkati Luudu, ɗum laatoto bo kade. Himɓe e nyaama e yara, ɓee cooda, ɓee cippa, ɓee aawa ɓee maha cuuɗi.

²⁹ Amma nyalaane Luudu wurtii diga Sodoma, yiite e kibiriita toɓii diga dow kammu halki ɓe ɓe fu.

³⁰ Non non nun ɗum laatortoo der nyalaane ne Ɓii neɗɗo suppitoytoo.

³¹ Nyalaane mum tawaaɗo dow doomoode suudu, go gineeji mum e tawaa der maggol, to jippoo wi'a ettan ɗi. Non non nun bo tawaaɗo deme to kade wittu wuro mum.

³² Ciwtoree debbo Luudu.

³³ Daartoowo hisingo yonki mum dullan ki, amma majjinɗo yonki mum heɓan ki.

³⁴ Mii bata on, jemmaare majjum, himɓe ɗiɗo tawete dow banni goori, gooto ettee gooto accee.

³⁵ Rewɓe ɗiɗo namidan dow namarde woore, gooto ettee gooto accee. [

³⁶ Worɓe ɗiɗo wondan der gesa, gooto hoccee, gooto accee.]»

³⁷ Aahiiɓe makko ƴami mo, wi'i: «Toy ɗum waɗoyta Joomiraawo?» O toontii ɓe o wi'i: «To baatuɗum woni, ɗon nun digaareeje hawritinto.»