Luka 15 - Bible Fulfulde Bénin New Testament

Ballool baala majjuŋa

¹ Jaɓooɓe ceede faada fu, e hakkeeɓe, ɓattii Yeesu e hettinanii mo,

² go *Farisaaɓe e *moodiɓɓe tawreeta kan e dumbitoo dow Yeesu, e wi'a: «Gorko oo e jaɓɓoo hakkeeɓe, oo nyaamda bo e maɓɓe!»

³ Go Yeesu waɗani ɓe ballool ŋol ɗo, wi'i:

⁴ «Moy caka mooɗon, to e woodi baali hewre, ko goota majji, o majja ɗum, o accataa lasooji naay e sappo e jeenay koriiɗi der ladde, o yaha daartoygo majjuŋa ŋan, faa o yiita ŋa?

⁵ To o yiitii ŋa, o yowan ŋa dow balbe makko e seyo,

⁶ o hoora wuro makko, den o noddina igooɓe makko e wondaaɓe makko, o wi'a ɓe: ‟Ceyodee am, gam mi yiitii baala am majjunooŋa.”

⁷ Mii bata on, hande nun bo seyo laatorto dow kammu gam tuubuɗo gooto, ɓura himɓe lasooji nayo e sappo e jeenayo foonnitiiɓe, ɓe bukaaka tuubu.»

Ceede majjuɗe go yiitaa

⁸ «Naa bo, debbo moy nun to e woodi ceede mum, kanje sappo, ko goote mum majji, o huɓɓataa fitilla, o wuuwa suudu, o daarta ɗe e hakkillo faa o yiita na?

⁹ To o yiitii ɗe, o noddan igooɓe makko, e wondaaɓe makko, o wi'a: “Ceyodee am, gam mi yiitii ceede am majjunooɗe!”

¹⁰ Mii bata on, non non nun bo malaykaaɓe Alla seyorto to hakkeejo gooto tuubii.»

Ɓiɗɗo majjuɗo go yiitaa

¹¹ Yeesu wi'i kade: «Gorko gom nun woodi ɓiɓɓe mum ɗiɗo.

¹² Petto on bati baaba mum wi'i: “Baaba, hokkam jawdi am laatantoo ni am!” Go baaba on seennani ɓe jawdi mum.

¹³ Ɓaawo balɗe seɗɗa, suka petto on hawriti jawdi mum fu yawtidi faa genni boɗɗuni. Ton o halki jawdi nin dow baanji baanji.

¹⁴ No o halkidi ni, go rafo manŋo naati der genni nin, den o fuɗɗi naatugo der dullere.

¹⁵ O yahi o takkoy himɓe genni nin, gooto mum, oo ɗon lildi mo deme muuɗum gam o dura afaaji mum.

¹⁶ O wanyay baa o heɓa ɓiɓɓe leɗɗe ɗe afaaji ɗin nyaamata, amma goɗɗo hokkay mo.

¹⁷ Den, o fuɗɗi miijaago o wi'i: “Gollotooɓe baaba am fu, e woodi nyaamdu ɗuunŋol, go min kan, mi nani ɗo, rafo e warammi!

¹⁸ Mi ummoto, mi witta to baaba am, den mi wi'a mo: Baaba, mi waɗii hakke dow Alla e dow maa,

¹⁹ mi fotay kade noddeego ɓiɗɗo maa. Daaram hande gollotooɓe maa gooto mum.”

²⁰ O ummii o witti to baabiiko. Diga oo woɗɗi, baabiiko holliri mo, go ɗum yurminii ɗum, doggi gattii mo, mammilii mo.

²¹ Go ɓiɗɗo on wi'i mo: “Baaba, mi waɗii hakke dow Alla e dow maa, mi fotay kade daaraa am hande ɓiɗɗo maa.”

²² Amma baabiiko bati maccuɓe mum wi'i: “Gaddee toggoore ɓurune wooɗugo law, ɓorninon mo, gattanon mo hootande e honnu, paɗinon mo paɗe.

²³ Gaddee gaari payuni, kiison ni, nyaamen, ceyoɗen,

²⁴ gam ɓiɗɗo am oo ɗo nandu nun hande maayunooɗo, go finti, o majjiino, amma o yiitaama. Ɓe puɗɗi seyaago.”

²⁵ Wakkati mum suka afo e tawanoo deme. No o wartata o faanii wuro, go o nani rimmo jimi e fijo.

²⁶ Go o noddi maccuɓe ɓen, gooto mum, o ƴami ɗum ume nun waɗi.

²⁷ Maccuɗo on toontii mo wi'i: “Minya nun warti, go baaba maa acci gaari ni nebbam hiisaa gam o yiitii ɓiɗɗo makko e jamu.”

²⁸ Ko afo on mone waɗi ɗum, salii ko naati der wuro. Baabiiko wurtii eyti mo, o naata wuro.

²⁹ Amma ɓiɗɗo on toontii baaba mum wi'i: ‟Daaru, ɗum ɓooyii diga ko jagganto maa mi, mi salaaki ɗowtanaago haala maa baa de woore. Amma a meeɗay ko hokkimmi baa ginniyel mi seyoro min e igooɓe am.

³⁰ Amma ɓiɗɗo maa oo ɗo, biisoyɗo jawdi maa e jeenu warti, a hiisanii mo gaari payuni!”

³¹ Baaba on wi'i mo: “Ɓiɗɗo am, aa wondi baadey e am, ko goodumi fu, an nun woodi ɗum.

³² Gam majjum e haani gaɗen juulɗe, ceyoɗen, gam minya oo ɗo, nandu nun hande maayunooɗo ko finti, o majjiino, amma o yiitaama.”»