Luka 14 - Bible Fulfulde Bénin New Testament

Yeesu e nyawta uppuɗo gom

¹ *Nyalaane siwteteene gom, Yeesu e tawaa wuro mawɓe *Farisaaɓe gom gooto mum, gam o nyaama. Tawaaɓe ɗon e hakkilani mo.

² Ɗon goɗɗo uppuɗo wari e woni yeeso makko.

³ Yeesu etti haala, ƴami *moodiɓɓe tawreeta e Farisaaɓe wi'i: «E dagii nyawtugo goɗɗo nyalaane siwteteene naa ɗum dagaaki?»

⁴ Amma ɓee jeeɗi, ko Yeesu etti nyawɗo on, nyawti mo, wi'i: «Hootu wuro maa.»

⁵ Go o wi'i ɓe: «To goɗɗo mon suka muuɗum, naa bo nagge mum yantii ɓunnu, o suttataa ŋe ɗon maa ɗon baa to *nyalaane siwteteene nun na?»

⁶ Ɓe baaway ko toontii mo dow haala kan.

Suɓugo joonɗe

⁷ Yeesu waɗani noddinaaɓe nyaamɗe ballool gam o yi'ii no ɓe cuɓirta joonɗe arandeeje, o wi'i ɓe:

⁸ «To goɗɗo noddinii maa ɓangal mum, to a yahii, taa jooɗaa joonne arandeere, gam waɗoto ɓuruɗo maa tedduŋal gom bo noddinaanomaa,

⁹ den noddinɗo on on fu wara wi'ee: ‟Accan oya jonne nee ɗo!” A tawan senteene jooɗaago joonne ɓaawoore waɗete.

¹⁰ Amma to a noddinaama, to a yahii, jooɗa to joonne ɓaawoore, gam to noddinɗo maa warii, o wi'ee: “Igo am, eencu jooɗoɗaa dow ɗo.” Den mum, ɗum laatante tedduŋal yeeso jooɗodiiɓe e maa fu.

¹¹ Gam mawninɗo hoore mum fu leesinte, leesinɗo hoore mum bo, mawninte.»

¹² Den Yeesu bati noddinɗo ɗum wi'i: «To a waɗii nyaloomaari maa, naa bo hiraane, taa noddin igooɓe maa, maa bo banniraaɓe maa, naa bo getti maa, naa bo wondaaɓe maa jom jawdiiɓe, gam kamɓe bo to ɓe noddinee, ɓe joɓee.

¹³ Amma to a waɗii nyaamdu juulɗe, noddin talakaaɓe e moofiɗinɓe, e laƴooɓe e wumuɓe.

¹⁴ Barke laatante, gam ɓe baawataa ko yoɓu maa ɗum. A yoɓoyte ɗum wakkati foonnitiiɓe fintinoytee.»

Ballool dow noddinaaɓe nyaamɗe

¹⁵ Gooto der jooɗodiiɓe e Yeesu gam ɓe nyaama, no nani haalaaji ɗin wi'i: «Barke laatanii nyaamoowo nyaamdu mum der *Laamaare Alla!»

¹⁶ Yeesu toontii mo wi'i: «Goɗɗo nun waɗii nyaamdu ɗuunŋol, go noddini himɓe ɗuuɓɓe.

¹⁷ No wakkati nyaamɗe foti, o lili maccuɗo makko yaha bataa noddinaaɓe, wi'a ɓe: ‟Garee, gam huune fu gasi.”

¹⁸ Amma ɓe fu, gooto gooto, ɓe janti eelugo accaneego hakku. Arano wi'i: “Mi soodii gesa gom, e haani mi yaha mi yi'aa ŋa, gam majjum mi eelii maa accanaa am hakku.”

¹⁹ Gooto bo wi'i: “Mi soodii ga'i demooji ɗiɗi ɗiɗi ukke joy, sey mi yaha mi daaraa no ɗi gollirta, mi eelii maa accanaa am hakku.”

²⁰ Gooto kade wi'i: “Jooni nun ɓaŋumi, gam majjum mi waawataa ko yahi.”

²¹ Maccuɗo on witti, batoy joomiraawo mum huune ɗum fu. Jom wuro on, mone mum ummii, go o wi'i maccuɗo makko on: “Yahu law der jayri genni e der laabi mum, gaddanaa am ɗo talakaaɓe, e moofiɗinɓe, e wumuɓe, e laƴooɓe.”

²² Maccuɗo on wittoy wi'i joomiraawo mum: ‟Mi waɗii ko bi'uɗaa, amma jayri e horii kade.”

²³ Joomiraawo on bati maccuɗo mum wi'i: ‟Yahu der laabi e dammuɗe wurooji, doola himɓe, heɓa wuro am hebba.

²⁴ Gam majjum mii bata on, noddinanooɓe arande ɓen, baa gooto mum mettataa nyaamdu am.”»

No neɗɗo laatorto aahiijo Yeesu

²⁵ Jama'aare ɗuunne e tokkontiri e Yeesu, go o yeeƴitii, o wi'i ɓe:

²⁶ «Garuɗo to am ko wanyay baaba mum, e inna mum, e debbo mum, e sukaaɓe mum, e miiraaɓe mum, e sakikiraaɓe mum, e kanun e hoore mum, o waawataa ko laatii aahiijo am.

²⁷ Mo roonaaki palaaŋal mum tokkimmi, waawataa ko laatii aahiijo am.

²⁸ Naa moy e mooɗon to e yiɗi mahugo suudu deenirkol, jooɗataako taw liiso noy ɗum nyaamata mo gam o yi'a, naa oo woodi ko heƴata o gaynira ŋol.

²⁹ To hinaa non, to o daɗɗi suudu ŋol, go o tampi ko gayni ŋol, yi'unooɓe no o fuɗɗiri ŋol jalan mo,

³⁰ wi'a: ‟Gorko oo fuɗɗii maadi, amma o tampii ko heennyi ni!”

³¹ Naa laamiiɗo moy nun to e yiɗi haɓidingo e laamiiɗo goɗɗo, o jooɗataako taw o daara, naa oo woodi baawɗe e himɓe ujune sappo ɓe o woodi haɓidingo e oya, garoowo haɓidingo mo, e himɓe ujune laso?

³² To o tawii o waawataa fu, o lildana laamiiɗo oya lilaaɓe diga oo woɗɗi, o ƴama mo ɓe nannantira.»

³³ Hande nun bo, goɗɗo mon waawataa ko laatii aahiijo am, to joomum wanyay ko woodi fu.

Lamɗam ɗam welaa

³⁴ «Lamɗam laati nun huune geetum, amma to dakam majjam heennyii, ume ɗam welinirtee kade?

³⁵ Ɗam nafataa leydi, ɗam nafataa gam jiddereya, sey ɗam woppee yaasi. Gooduɗo noppi gam nanugo fu nana!»