Luka 13 - Bible Fulfulde Bénin New Testament

Noddoore gam tuubu

¹ Wakkati mum, woɓɓe wari e bata Yeesu haala Galilinkeeɓe ɓe Pilaatu acci waraa no ɓe gaɗata kiiseteeɗi .

² Yeesu toontii ɓe wi'i: «Oon miiji Galilinkeeɓe ɓen hakke mum ɓuru wa hakke Galilinkeeɓe horiiɓe fu, gam ɓe toorake hande nun na?

³ Mii wi'a on aawo, amma onon bo to on baylitaaki tuubuɗon, on kalkan on fu, hande no maɓɓe.

⁴ Ciwtoree himɓe sappo e jeetato, maayuɓe no suudu Silowe deenirkol yanti ɓe ɓe maayi, oon miiji kamɓe nun ɓuri himɓe *Urusaliima fu hakke na?

⁵ Mii wi'a on aawo, amma onon bo to on baylitaaki tuubuɗon, on kalkan on fu hande no maɓɓe.»

Ballool ibbi ki rimataa

⁶ Yeesu waɗani ɓe ballool ŋol ɗo wi'i: «Goɗɗo nun woodi ibbi mum der gesa innabooje mum, go o wari daartugo ɓikkol dow makki, amma o heɓay.

⁷ Den o bati deenuɗo gesa makko o wi'i: ‟Daaru, diga duuɓi tati, mii wara daartugo ɓikkol dow ibbi ki, amma mi heɓataa. Feƴƴu ki! Gam ume go ekii etta semme leydi gam baanji?”

⁸ Amma deenuɗo on toontii mo wi'i: ‟Joomam, accu ki hikka kade, yeeso ɗo mi wasan mi fiiltitina ki, mi watta leydi jiddereya.

⁹ Waɗoto naa mawuuri ki riman ɓikkol, amma to ki salake ko rimi, den mum accaa ki feƴƴee.”»

Yeesu nyawtii debbo kunnaareejo gom nyalaane siwteteene

¹⁰ *Nyalaane siwteteene gom, Yeesu e janŋina der suudu waajorde.

¹¹ Foti debbo gom, mo ginnool nyawini diga duuɓi sappo e jeetati, e tawaa ɗon. Ginnool ŋol toorii mo faa o waawataa ko foortii baa seɗɗa.

¹² No Yeesu yi'i mo, noddi mo wi'i: «Debbo, a yoofake e nyaw maa.»

¹³ O yowi mo juuɗe, ɗon maa ɗon debbo on foortii, yanti e teddina Alla.

¹⁴ Amma mone waɗi mawɗo suudu waajorde nen, gam Yeesu nyawtii neɗɗo der nyalaane siwteteene, o wi'i jama'aare: «Balɗe jeego'o nun tawaa kaanuɗe neɗɗo golloo, garee nyawteɗon der nyalaaɗe ɗee ɗon, amma hinaa nyalaane siwtetee!»

¹⁵ Joomiraawo toontii mo wi'i: «Onon munaafitiiɓe! Nyalaane siwteteene moy mon woni yoofataa nagge mum naa bo babba mum, yaara ɗum yardaado?

¹⁶ Debbo oo ɗo bo, mo lenyol Iburahiima nun, Seyɗan haɓɓii mo diga duuɓi sappo e jeetati, haanay o fiirtee der nyalaane siwteteene na?»

¹⁷ No Yeesu toontii ɓe nun nun, senteene nanŋi wayɓe makko fu, amma jama'aare kan e seyoo gam gaɗuuji makko ɗi tedduŋal ɗi o waɗata.

Ballaaji dow Laamaare Alla

¹⁸ Yeesu wi'i: «Ume nun *Laamaare Alla nandi? Ume baawanmi ko nanditiri ne?

¹⁹ Ne nandi hande gitel mutaadihi ŋel goɗɗo etti aawi der kara li'o mum, ŋel fuɗii ŋel laatii leggal manŋal faa pooli dow kammu fu waɗi daɗɗa mum dow licce maggal.»

Ballool ƴuufinirɗum

²⁰ Yeesu wi'i kade: «Ume baawanmi ko nanditiri *Laamaare Alla?

²¹ Ne nandu nun hande *ƴuufinirɗum ɗum debbo etti hawri e conni etorɗe tati, go ni fu ni ƴuufi.»

Dammugel ŋel yaajaa

²² Yeesu e faloo der ci'e mawɗe e ci'on petton, e gureeje, oo janŋina oo foonnorii far *Urusaliima.

²³ Ɗon goɗɗo ƴami mo wi'i: «Joomiraawo, himɓe seɗɗa tan nun hisata na?» Yeesu toontii mo wi'i:

²⁴ «Tinnee, naatiron dammugel ŋel yaajaa, gam mii bata on, himɓe ɗuuɓɓe daartan naatugo, amma ɓe baawataa.

²⁵ To jom wuro ummake maɓɓi dammugal mum feɗi, on gonan yaasi, janton oon piya dammugal, oon bi'a: “Joomiraawo, maɓɓitan men.” O toontoto on o wi'a: ‟Mi annaa to ƴiwuɗon.”

²⁶ Den on bi'an mo: ‟Men nyaami, men jarii yeeso maa, a janŋinii bo der laabi ci'e amen.”

²⁷ O wi'an on kade: ‟E gooŋa mi annaa to ƴiwuɗon. Boɗɗee am on fu, onon waɗooɓe ko halli!”

²⁸ Ɗon nun bulloton, ƴakkontiron nyiiƴe, to on ji'ii Iburahiima e Isiyaaku e Yaakuubu e annabiiɓe fu der *Laamaare Alla, go onon, oon boppaa yaasi!

²⁹ Himɓe waran diga lettugal e gorgal, soɓɓiire e hoore fuɗo, ɓe jooɗoto ɓe nyaama der Laamaare Alla.

³⁰ Den mum, woɓɓe der sakitiiɓe laatoto ardiiɓe, woɓɓe der ardiiɓe bo laatoto sakitiiɓe.»

Yeesu yurmake Urusaliima

³¹ Wakkati mum *Farisaaɓe woɓɓe wari to Yeesu, wi'i mo: «Dillu diga ɗo, yahu nokkun, gam *Eroodu e yiɗi warugo ma.»

³² Yeesu toontii ɓe wi'i: “Jahee batee dondonɗeeru nun, mi na'on riiwa ginnaaji, mii nyawta nyawɓe, hanne e jaaŋo, nyalaane tatawre, mi heennyan golle am.

³³ Amma, sey mi tokka laawol am hanne e jaaŋo e faɓɓi jaaŋo, gam ɗum haanay annabiijo waree yaasi *Urusaliima.”

³⁴ «*Urusaliima, Urusaliima, an baroowo annabiiɓe, e paɗɗoowo ɓe Alla liloy gam maa kaaƴe! De noy jiɗumi hawritingo sukaaɓe maa hande no gertogal hawritirta coppi mum ley biyeeɗe mum, amma on jiɗay ɗum!

³⁵ On accante wuro mon laatoo bille! Mii bata on bo, on ji'ataa am kade faa wakkati de bi'oyton: ‟Barke laatani garoowo e inne joomiraawo!”»