Luka 11 - Bible Fulfulde Bénin New Testament

Yeesu e ekkitina no du'ortee

¹ Nyalaane gom, Yeesu e du'oo der nokkuure gom. No o heennyi, aahiiɓe makko gooto mum, wi'i mo: «Joomiraawo, ekkitin men no du'ortee hande no Yuhaana ekkitiniri aahiiɓe mum.»

² Yeesu wi'i ɓe: «To oon du'oo, bi'ee: *Baaba, inne maa seniine teddinee. *Laamaare maa wara.

³ Hokku men de fini fu, ko men nyaamata.

⁴ Sawrana men hakkeeji amen gam minon bo emen cawranoo woofanan ɓe men. Taa accu men poonnee.»

⁵ Yeesu wi'i ɓe kade: «Hande jon to goɗɗo mon e woodi igo mum, go igo on wari tawi mo caka jemma, wi'i mo: “Igo am, nyallam peen tato.

⁶ Gam gooto der igooɓe am ƴiwoy diga jahaaŋal wari weeri wuro am, nani bo mi woodaa ko ciryoto moo mi.”

⁷ Den ko oo ɗon toontoo mo diga der suudu wi'a: “Taa ɓillam min kan, gam dammugal maɓɓaama, feɗaa ko, min e sukaaɓe am bo men pukkake, mi waawataa ko ummii hokku maa peen.”

⁸ Mii bata on, baa to o ummaaki o hokki mo gam oo igo makko, o ummoto o hokka mo gam oo ɗon e ɓilla mo.

⁹ Min, mii bata on: eelee, on kokkete, daartee, on keɓan, piyee dammugal, on maɓɓitante.

¹⁰ Gam eeloowo fu heɓan, daartoowo fu bo yiitan, piyoowo dammugal fu, maɓɓitante.

¹¹ To goɗɗo mon e laatii baaba, go ɓiyum eeli ɗum peen, o hokkan mo hayre na? Naa bo to o eelii mo linŋol, o hokkan mo boddi na?

¹² Naa bo to o eelii mo ɓoccoone, o hokkan mo yaare na?

¹³ To onon laatiiɓe halluɓe, oon baawi hokkugo sukaaɓe mon ko wooɗi. Noy *Baaba mon tawaaɗo dow kammu hokkirtaa eelanɓe ɗum *Ruuhu Ceniiɗo?»

E baawɗe Alla nun Yeesu riiwirta ginnaaji

¹⁴ Yeesu wurtinii ginnool muumiɗinŋol goɗɗo. No ŋol wurtii, muumo on yanti e bata go jama'aare haayɗinii.

¹⁵ Amma woɓɓe wi'i: «E baawɗe Beljebul laamiiɗo ginnaaji nun o riiwirta ɗi.»

¹⁶ Woɓɓe e yiɗi foonnugo mo, go ɓe ƴami mo o waɗa maane ƴiwune dow kammu.

¹⁷ Amma no Yeesu e anni miilooji maɓɓe, o wi'i ɓe: «Laamaare fu, to himɓe mum seenniri e haɓa hakkune mum, ne halkan, wurooji mayre yanan nyoƴƴontira.

¹⁸ To Seyɗan e haɓida hoore mum, noy laamaare makko tabitortoo? Hinaa onon nun wi'i Beljebul nun hokkimmi baawɗe riiwugo ginnaaji.

¹⁹ To e baawɗe Beljebul nun diiwiranmi ginnaaji, den e baawɗe moy ɓiɓɓe mooɗon riiwirta ɗi? Gam majjum, kamɓe e hoore maɓɓe nun laatoytoo hiitotooɓe mon.

²⁰ Amma to e baawɗe Alla nun diiwiranmi ginnaaji, eɗum hollita no *Laamaare Alla yottake on.

²¹ To goɗɗo semmenteejo gooduɗo kaɓirɗum geetum e reeni wuro mum, jawdi makko fu wonoto e jam.

²² Amma to ɓuruɗo mo semme gom warii, go jaalii mo, teetan gineeji makko kaɓirɗi ɗi o hoolinoo, seennana woɓɓe jawdi makko.

²³ Mo wonday e am fu, ganyo am nun, mo wallay am hawritingo fu, sankitan.»

Wittoygo ginnool der wuro mum hiinŋo

²⁴ «To ginnool wurtake diga e goɗɗo, ŋol yiiloyto der nokkuuje joorɗe, eŋol daarta to ŋol siwtotoo. To ŋol heɓay, ŋol wi'a: ‟Mi wittan nun der suudu am to eggunoo mi.”

²⁵ To ŋol wittii ŋol tawa suudu wuuwaama, moƴƴinaa faa wooɗi,

²⁶ den ŋol witta, ŋol waddaa ginnaaji goɗɗi jeeɗiɗi ɓuruɗi ŋol hallugo, ɗi bittidaa ɗi jooɗoo ɗon. Den mum heennyitirde neɗɗo on ɓuran arandeere mum hallugo.»

Barke gooŋakuuje

²⁷ No Yeesu batata ka, debbo gom bati diga caka jama'aare e daane towne wi'i: «Barke laatanii caawuɗo maa, e enɗi ɗi musinɗaa.»

²⁸ Amma Yeesu toontii mo wi'i: «Ko ɓuri ɗum woni, barke laatanii hettiniiɓe haala Alla e gollira ka.»

Himɓe e ƴama Yeesu waɗa kayniiɗum

²⁹ Jama'aare ɗuunne ummoy e hawritoo ley Yeesu, o etti haala, o wi'i ɓe: «Himɓe jaamanuuru hanne laati nun halluɓe, ɓee daarta holleego maane. Amma maane gom ɓe keɓataa ɗum, to hinaa ɗum Yonas.

³⁰ Gam hande no Yonas laatoranii himɓe Niniwe maane, non non bo *Ɓii neɗɗo laatorantoo himɓe jaamanuuru hanne maane.

³¹ Nyalaane darŋal, laamiiɗo debbo mo hoore fuɗo hiitoto himɓe jaamanuuru hanne. Gam o ƴiwii diga nokkuuje ɓuruɗe woɗɗugo, gam o nana haalaaji Suleymaanu ɗi faamu. Nani bo ɓuruɗo Suleymaanu manŋu nun woni ɗo,

³² Nyalaane darŋal, himɓe Niniwe daroyto yeeso himɓe jaamanuuru hanne, doƴƴa ɓe kiita, gam ɓe tuubi no Yonas waajii ɓe haala Alla. Nani bo ɓuruɗo Yonas manŋu nun woni ɗo!»

Ballool fitilla

³³ «Goɗɗo huɓɓataa fitilla gam suuɗa ka, naa bo gam omma ka etorde, amma o yowan ka dow yesirde fitilla, gam naatooɓe fu yi'a jayŋol.

³⁴ Gite maa laatii fitilla ɓannu maa. To gite maa e yanɗi, ɓannu maa fu yaynan, amma to gite maa yanɗaa, ɓannu maa bo wonoto der niwre.

³⁵ Gam majjum, sey kakkilaa gam to jayŋol tawaaŋol der maa laatoo niwre.

³⁶ Den mum, to ɓannu maa fu na'on der jayŋol, nokkun maggol tawaaka der niwre, ŋol fu, ŋol wonoto der jayŋol hande to fitilla yaynanii maa jayŋol mum.»

Yeesu e fela Farisaaɓe e moodiɓɓe tawreeta

³⁷ No Yeesu batata, *Farisaajo gom noddi mo o wara nyaamɗe to mum. O naati der suudu, o jooɗii gam o nyaama.

³⁸ Farisaajo on haayɗinii no o yi'i Yeesu lootay juuɗe mum hande no tawaaŋal maɓɓe ƴami, go e nyaama.

³⁹ Amma Joomiraawo wi'i mo: «Onon Farisaaɓe, oon laaɓina ɓaawo jarirkon e ɓaawo keeɗe, amma der mooɗon, oon kebbi suuno, e guyka, e hallumaru.

⁴⁰ Onon ɓe walaa hakkillo! Taguɗo ɓaawo huune tagay der majjum na?

⁴¹ Kokkee talakaaɓe sadaka ko tawaa der ɓerɗe mooɗon, den ko horii laatanto on laaɓuɗum.

⁴² Amma bone laatanto on onon *Farisaaɓe! Gam oon cutta jakka haakooji bi'eteeɗi maantu, e bi'eteeɗi ru, e kade haakooji nyaameteeɗi fu. Amma oon jeeboo foonnitaare e yidde Alla, kanjum haani gaɗon, amma to on jeebee bo koriiɗum.

⁴³ Bone laatanto on onon *Farisaaɓe! Gam oon jiɗi jooɗaago der joonɗe arandeeje der cuuɗi baajorɗe, oon jiɗi bo sanneego der jayri to himɓe hawritinto.

⁴⁴ Bone laatanto on onon! Gam oon nandi hande caabeeje ɗe goɗɗo yi'ataa, ɗe dow mum yahetee, annanaaka!»

⁴⁵ Go *moodiɓɓe tawreeta ɓen gooto mum wi'i mo: «Moodibbo, to aa batira nii minon nun jennataa fa!»

⁴⁶ Yeesu toontii mo wi'i: «Onon bo, bone laatanto on onon *moodiɓɓe tawreeta! Gam oon doonina himɓe doolle tedduɗe, ɗe onon e ko'e mon on meemataa baa e kollel.

⁴⁷ Bone nyaaman on! Gam oon maha caabeeje annabiiɓe, ɓe kaakiraaɓe mon wari.

⁴⁸ Onon woni seedeeɓe ko kaakiraaɓe mon waɗi, go jerdiɗon ɗum, gam kamɓe ɓe barii annabiiɓe, go onon oon maha caabeeje maɓɓe.

⁴⁹ Kan waɗi Alla wi'i e faamu: ‟Mi lildanan ɓe annabiiɓe e lilaaɓe, ɓe baran woɓɓe, ɓe toora bo woɓɓe.”

⁵⁰ Gam majjum, himɓe jaamanuuru hanne ƴamoyte ƴiiƴam annabiiɓe waraaɓe fu, diga duuniyaaru tagaa.

⁵¹ Diga ƴiiƴam Habiila faa e ɗam Jekariya baraaɗo hakkune hiisirde e suudu Alla. Mii bata on e gooŋa, himɓe jaamanuuru hanne ƴamoyte ɗam ɗam fu.

⁵² Bone laatanto on onon *moodiɓɓe tawreeta! Gam on ettii pettirgel annal. Onon e ko'e mooɗon on naatay, oon kaɗa bo yiɗuɓe naatugo naakki.»

⁵³ No Yeesu wurtii diga nokkuure nen, *moodiɓɓe tawreeta e *Farisaaɓe yanti e ɓilla mo, e ƴama mo ƴanɗe ɗuuɗɗe.

⁵⁴ Ɓee tunnana mo pitti gam ɓe keɓa der haala makko ka ɓe gaccortoo mo.