Luka 10 - Bible Fulfulde Bénin New Testament

Yeesu lilii aahiiɓe mum lasoy tato e sappo e ɗiɗo

¹ Ɓaawo majjum, Joomiraawo suɓi lasoy tato e sappo e ɗiɗo, o lili ɓe ɗiɗɗiɗo yeeso makko der ci'e e nokkuuje ɗe o miili yahugo kanko e hoore makko.

² O wi'i ɓe: «Dugge ɗuuɗii, amma gollotooɓe ɗuuɗaa, eelee Joomiraawo dugge gam o lildaa gollotooɓe gam dugge makko.

³ Jahee, nani mii lila on hande baali caka bu'i.

⁴ To on ettee maalaaru ceede, naa bo bogooru, maa bo paɗe, to on cannee goɗɗo dow laawol.

⁵ Wuro ŋo naatoton fu, bi'ee taw jam wona e wuro ŋon.

⁶ To neɗɗo jam e tawaa der wuro ŋon, jam mooɗon wonoto dow makko, to hinaa non, jam mooɗon wittanaan on.

⁷ Jooɗee der maggo, nyaamon jaron ko kokkaɗon fu, gam golloowo e haani joddi mum. To on jaattitee wurooji.

⁸ To on naatii der wuro gom go jaɓɓaɗon, nyaamee ko gaddanaɗon fu.

⁹ Nyawtee nyawɓe ɓe tawuɗon ɗon fu, baton ɓe bi'on: ‟*Laamaare Alla ɓattake on.”

¹⁰ Amma to on naatii der siire gom ko on jaɓɓaaka, burtee e laabi bi'on:

¹¹ ‟Emen piɗɗana on sollaare genni mon, mootiine koyɗe amen. Amma, e non fu, paamee no Laamaare Alla faanake.”

¹² Mii bata on, nyalaane darŋal, kiita siire nen ɓuran kiita Sodoma sattugo.»

Ci'e caliiɗe ko goonɗini.

¹³ «Bone laatante an Korajin! Bone laatante an Baytisayda! Gam kaayeefiiji gaɗaaɗi to mon, to ɗi gaɗaanoma der Tirus e Sidon, maa diga ɓoyɗum, himɓe maɓɓe tuubanno, mojoo saakiiji, mootoo dooni.

¹⁴ Gam majjum nyalaane darŋal, kiita Tirus e Sidon fotoran e ka mooɗon.

¹⁵ An bo Kafarnahum, aa miiji a ettete faa dow na? Aawo! a leesinte faa der joonne maayɓe.»

¹⁶ O wi'i kade aahiiɓe makko: «Kettinaniiɗo on, min nun joomum hettinanii, caliiɗo on bo, min o salii, caliiɗo am bo salake liloyɗo am.»

Bittool lilaaɓe lasoy tato e sappo e ɗiɗo

¹⁷ Lasoy tato e sappo e ɗiɗo ɓen wittoy, e hebbi welwelo, go ɓe bi'i: «Joomiraawo, baa e ginnaaji ɗowtanake men gam inne maa.»

¹⁸ Yeesu toontii ɓe wi'i: «Mi yi'ii Seyɗan yanoy diga dow kammu hande maaƴƴere.

¹⁹ Nani, mi hokkii on baawɗe jaaɓon bolle e jahe e baawɗe ganyo fu, goɗɗum walaa ko toorata on.

²⁰ Amma to on accee ɓerɗe mooɗon wela gam ginnaaji ɗowtanake on, amma accee ɓerɗe mon wela gam inɗe mon e winnaa dow kammu.»

Ɓerne Yeesu welii

²¹ Der wakkati mum, *Ruuhu Ceniiɗo hebbini Yeesu seyo, o wi'i: «*Baaba, Joomiraawo mo dow e ley, mi yettii maa gam a hollitii sukaaɓe ko cuuɗuɗaa wooduɓe faamu e annal. Oo, Baaba, ɗum laatake gam non non nun ɗum fottiran ma.

²² *Baaba, a hokkii am huune fu. Walaa annuɗo moy Ɓiɗɗo laatii sey Baaba, walaa bo annuɗo moy Baaba laatii to hinaa Ɓiɗɗo, e mo Ɓiɗɗo yiɗi hollitingo ɗum.»

²³ Yeesu wayliti far to aahiiɓe mum, wi'i ɓe kamɓe tan: «Barke laatanii gite ji'ooje ko ji'oton.

²⁴ Gam mii bata on, annabiiɓe e laamiiɓe ɗuuɓɓe yiɗii yi'ugo ko ji'oton ɗo, amma ɓe ji'ay ɗum, ɓe jiɗii nanugo ko nanoton, amma ɓe nanay ɗum.»

Ballool samariyaajo geeto

²⁵ Ɗon *moodibbo tawreeta gom ummii gam jarboo Yeesu, o ƴami mo o wi'i: «Moodibbo, ume haani mi waɗa go mi heɓa yonki tabitiiki?»

²⁶ Yeesu toontii mo wi'i: «Ume winnaa der tawreeta? Ume janŋataa ton?»

²⁷ O toontii o wi'i: «E haani jiɗaa Joomiraawo Alla maaɗa e ɓerne maa fu, e yonki maa fu, e semme maa fu, e miilo maa fu. Kade bo, jiɗaa banniraawo maa, hande no jiɗirɗaa hoore maa.»

²⁸ Go Yeesu wi'i mo: «A toontake no wooɗi, waɗu nun nun, a wuuran.»

²⁹ Amma moodibbo on yiɗi hokkugo hoore mum gooŋa, go o ƴami Yeesu o wi'i: «Moy woni banniraawo am?»

³⁰ Yeesu etti haala toontii mo wi'i: «Goɗɗo gom nun ƴiwoy diga *Urusaliima e foonnii Yeriko, ko wuyɓe taytii mo, teeti gineeji makko, witti fiyi mo faa o faanii maayugo, ko ɓe jawti ɓe acci mo.

³¹ Foti *Limaamiijo gom bo ummoykeno e tokkoy laawol ŋol. No o yi'i neɗɗo on, o fiiltii, o yawti.

³² Leewinkeejo gom bo yottii nokkuure nen, yi'i neɗɗo on, fiiltii yawti kanun bo.

³³ Amma samariyaajo gom e yaha genni, go yottii ley neɗɗo on, yurmii mo.

³⁴ O ɓattii o moomi elanɗe makko nebbam e *innabojam, o haɓɓi ɗe, go o etti mo o ɓili dow ko o waɗɗii. O yaari mo der hoɗorde hoɓɓe, o hiinnii mo.

³⁵ No weeti, o sutti ceede cardi ɗiɗi o hokki mawɗo nokkuure nen o wi'i mo: “Hiinna neɗɗo oo, to a nyaami ceede ɓuri nun, mi yoɓete to mii warta.” »

³⁶ Yeesu ɓeydi wi'i: «Der himɓe tato ɓen moy nun e jiiɗe maa laatii banniraawo gorko mo wuyɓe fiyi on?»

³⁷ Moodibbo tawreeta toontii wi'i: «Gaɗanɗo mo moƴƴere on nun.» Yeesu wi'i mo: «Yahu an bo gaɗaa hande nun.»

Yeesu yahii to Marta e Mariyama

³⁸ No Yeesu e Aahiiɓe mum yanti laawol, o naati der siire gom, go debbo bi'eteeɗo Marta weerni mo wuro mum.

³⁹ Oo woodi miiraawo bi'eteeɗo Mariyama, o wari oo jooɗii ley koyɗe Joomiraawo, oo hettinii haala makko.

⁴⁰ Marta e hiinnii golle wuro sanne, go o wari o wi'i: «Joomiraawo, ɗum ɓillaa maa, no miiraawo am e accidimmi golle wuro min tan na? Wi'u mo o wallammi.»

⁴¹ Joomiraawo toontii mo wi'i: «Hey Marta! Marta! Aa ɓilla hoore maa, aa tooroo gam huune ɗuuɗɗum,

⁴² amma huune gootum tan nun laatii ko haani. Mariyama suɓii ko wooɗi, o teetirtaake ɗum.»