Korintu ɗiɗaɓol 9 - Bible Fulfulde Bénin New Testament

Alla e yiɗi kokkoowo e ɓerne woore

¹ Doole bane mi winnana on dow batu wallugo himɓe Alla wonɓe *Urusaliima.

² Gam mii anni oon jiɗi wallugo ɓe sanne. Mi jurorake on yeeso himɓe Maseduwaan, bi'umi: «Himɓe Akaya siriyake wallugo diga rowani.» Tinnaare mooɗon finninii ɗuuɓɓe maɓɓe.

³ Mii lila e mooɗon banniraaɓe, gam ko men jurorii on dow batu ka, to laatoo baanji, laatoɗon siriyiiɓe hande no batumi.

⁴ To ɓe Maseduwaan waridii e amen, tawi on ciriyaaki, den hoolaare ne men goodunoo dow mooɗon laatanto men senteene, amma ne mooɗon ɓurata.

⁵ Gam majjum, tawumi e haani mi eela banniraaɓe ɓen ardoo am, yaha to mooɗon, ɓe kawrita ballal ŋal kaɓɓuɗon alkawal on kokkan. Den to mi warii, mi tawan eŋal resii, ŋal laatoo ballal kokkaaŋal e ɓerɗe goote, doole walaa der majjum.

⁶ Annitee kaa ɗo: Aawuɗo seɗɗa, seɗɗa nun ruggata, aawuɗo puy, puy nun ruggata.

⁷ Moy fu hokka jaka no ɓerne mum resiri, hinaa e biisere ɓerne, hinaa e doole, gam Alla e yiɗi kokkoowo e seyo.

⁸ Alla e woodi baawɗe ɗuuɗinango on moƴƴe feere feere, gam goodon wakkati fu ko bukaɗon faa horoo, gaɗiron golle geete fu,

⁹ hande no winnaa : «Emo seennana talakaaɓe huune ko wooɗi, geetaaku makko e tabitii faa abada.»

¹⁰ Alla kokkoowo aawoowo awdiiri, e nyaamdu, o hokkan on onon bo awdiiri. O ɗuuɗinan ni, o ɓeyda ɓikkon geetaaku mooɗon.

¹¹ O laatinan on jom jawdiiɓe der huune fu, gam baawon waɗugo geetum feere feere. Ɗum accan ɗuuɓɓe yetta Alla gam ballal mon ŋal men jaaranta ɓe.

¹² Ballal mon, hinaa himɓe Alla tan ŋal nafata, amma eŋal ɗuuɗinana bo Alla jettooje.

¹³ To ɓe daarii no ballal mooɗon teddiri, ɓe teddinan Alla gam on kollii oon ɗowtanii *linjiila *Almasiihu. Ɓe teddinan mo bo, gam oon ceenna jawdi mooɗon e maɓɓe, e woɓɓe bo.

¹⁴ Ɓe du'anto on, ɓe kollitira yidde maɓɓe gam moƴƴere mawne ne Alla waɗani on.

¹⁵ Yettoore laatanoo Alla gam dokkal makko ɓuruŋal bataneego!