Korintu ɗiɗaɓol 8 - Bible Fulfulde Bénin New Testament

Wallugo goonɗinɓe Urusaliima

¹ Banniraaɓe, emen jiɗi anningo on no moƴƴere Alla hollitorii der eklesiyaaji leydi Maseduwaan.

² Ɓe poonnaama e ɓillaaje ɗuuɗɗe. Amma seyo maɓɓe e mawni puy. Gam majjum ɓe kokki dokke ɗuuɗɗe e ɓerɗe goote baa no ɓee talakiɗi puy.

³ Mii seedanoo ɓe ɗum, ɓe kokkii jaka no ɓe baawi, ɗum ɓurii du baawɗe maɓɓe, e yidde ɓerɗe maɓɓe ɓe kokkiri.

⁴ Ɓe eelii men sanne gam ɓe gatta juuɗe maɓɓe der wallugo goonɗinɓe *Urusaliima.

⁵ Ɓe gaɗii ɓuri ko men miili. Ɓe kokkii aran Joomiraawo ko'e maɓɓe, den e sago Alla, ɓe kokkii men ko'e maɓɓe, menen bo.

⁶ Gam majjum men eeli Titus, o heennyita gollal moƴƴere ŋal to mooɗon hande no o fuɗɗirnoo ŋal.

⁷ On keɓii huune fu faa faanti: Goonɗinki e baawal batu, e annal, e tinnaare dow huune fu, e yidde gam amen. Gam majjum, tinnee bo der golle moƴƴere ɗen.

⁸ Mi batay ka gam mi hokka on umuroore, amma, mii holla on tinnaare woɓɓe, gam gooŋaaku yidde mon hollitoo.

⁹ Oon anni moƴƴere Joomiraawo meeɗen Yeesu *Almasiihu. Kanko jom jawdiijo, o laatinii hoore makko talakaajo gam mooɗon, gam laatoɗon jom jawdiiɓe diga e talakaaku makko.

¹⁰ Miilo am kollumi dow majjum. Kanjum haanani on: Rowani, onon arti yiɗi wallugo ɓe, onon bo arti fuɗɗi golle ɗen.

¹¹ Jooni keennyitee ɗe, hande no jiɗirnoɗon ko puɗɗuɗon ɗe, keennyitiree ɗe hande non, jaka no baawɗe mon foti.

¹² To neɗɗo e yiɗi waɗugo geetum, Alla jaɓanan mo dow ko o woodi, hinaa dow ko o woodaa.

¹³ Mi wi'ay naaton der ɓillaare gam woɓɓe fowta, mi yiɗu nun himɓe fu e foti.

¹⁴ Jooni, no oon goodi ko ɗuuɗi, e wooɗi balliton ɓe woodaa. Ɓaawo ni, to onon bo on dulloy, ɓe balla on e ko ɓe goodi. Nun nun himɓe fotirta.

¹⁵ Dewtere wi'ii: «Kawritinnooɗo puy, ɓurinay, kawritinnooɗo seɗɗa bo, jaccinay .»

Titus e yaadiiɓe mum

¹⁶ Yettoore laatanoo Alla gattuɗo der ɓerne Titus iri anniya ka men goodi gam mon.

¹⁷ Titus nootake ka men bi'i ɗum, o tinnake, o waɗi anniya e sago makko, o yahi to mooɗon.

¹⁸ Men lilii mo, kanko e banniraawo mo eklesiyaaji fu seedantoo geeta, sabbu golle ɗe o waɗi gam *linjiila.

¹⁹ Kanjum tan bane. Eklesiyaaji bo suɓii mo gam o yahida e amen der golle moƴƴere ɗe men jowanaa. Emen gaɗa golle ɗen gam teddingo Joomiraawo e gam hebbingo miilooji amen geeti.

²⁰ Emen kakkili to goɗɗo nyo'u men der jogaago jawdi ɗuunni ni men jowanaa.

²¹ Gam hinaa yeeso Joomiraawo tan men dartata ko wooɗi, amma yeeso himɓe bo.

²² Emen lilida banniraawo meeɗen e maɓɓe. Men poonni tinnaare makko de ɗuuɗɗum, der laabi ɗuuɗɗi. Faa jooni bo oo tinnii gam oo hoolii on puy.

²³ Titus kan laati nun gonduɗo e am, gollodintooɗo e am caka mooɗon. Banniraaɓe meeɗen wonduɓe e makko bo e laatii lilaaɓe eklesiyaaji, ɓee teddina *Almasiihu.

²⁴ To non, kollee ɓe yidde. Den eklesiyaaji annitan no emen goodi daliila juroraago on.