Korintu ɗiɗaɓol 7 - Bible Fulfulde Bénin New Testament

¹ Banniraaɓe am yiɗaaɓe, enen nun alkawalji ɗii fu laatanii. Gam majjum en laaɓinee ko'e meeɗen e tuuni ɓannu, e jiɗaaɗe yonki fu. En kebbinee senaare men een ɗowtoranii Alla.

Ɓerne Pol seyake gam ɓe Korintu tuubii

² Jaɓee men! Men parkanay goɗɗo, men talakiɗinay goɗɗo, men nyaamay goɗɗo amaana.

³ Mi batay ka gam gaccaago on. Gam mi batiino diga naane, bi'umi: emen jiɗi on, walaa ko seennata en, baa guurnam, baa maayde.

⁴ Mii hoolii on puy, mii juroro on bo. Ɓerne am e hebbi jam, mii seyii bo sanne der tooraaji amen fu.

⁵ Diga men jottii leydi Maseduwaan, men ciwtaaki baa seɗɗa. Men keɓii tooraaji diga toy fu, woɓɓe e haɓida men, kulol bo na'on der ɓerɗe amen.

⁶ Amma Alla deƴƴitinoowo ɓe ɓerɗe mum biisii, deƴƴitinii ɓerɗe amen e garki Titus.

⁷ Garki makko tan bane waɗi ɗum, amma no deƴƴitinirɗon ɓerne makko, fukkinii hakkillo amen. O batii men jaka no jiɗirɗon yi'ugo am. O batii men bo no bullirɗon, e no tinnoriɗon gam am. Ɗum ɗon fu hebbinii seyo am.

⁸ To ɗerewol am biisiino ɓerɗe mon, ɗum ɓillay am kade. Ɗum ɓilliino am, gam mi yi'ii ɗerewol ŋol biisiino ɓerɗe mooɗon, wakkati seɗɗa.

⁹ Ɓerne am welii jooni, hinaa gam ɓerɗe mooɗon biisii acci ne am weli. Amma biisere ɓerne mon accii tuubuɗon, baylitiɗon. Gam biisere ɓerɗe mon laatake no Alla yiɗiri. To non, walaa ko men biisani on.

¹⁰ Biisere ɓerne hande no Alla yiɗiri e wadda tuubu, tuubu bo wadda kisidam. Biisere ɓerne hande nee ɗon woodaa to mii annunoo. Amma biisere ɓerne ƴiwune e duuniyaaru, maayde nun waddata.

¹¹ Daaree ko biisere ɓerne hande no Alla yiɗiri waddani on: Ne waddanii on gaɗuɗon law ko haani gaɗon, eeluɗon yaafuye. Ɗum ellinake on, ɗum hunnii on, on kaaɓii yi'ugo am. Ɗum waddanii on anniya hiitaago boofuɗo on. Der huune fu, on kollii oon laaɓi dow batu kan.

¹² To mi winnanii on, hinaa gam boofuɗo, hinaa bo gam boofanaaɗo. Amma, heɓa tinnaare mon gam amen hollitoo caka mooɗon yeeso Alla.

¹³ Gam majjum ɓerɗe amen deƴƴitii. Amma ɓaawo deƴƴitinki ɓerɗe amen, men ceyake sanne gam seyo Titus, mo pukkinɗon hakkillo muuɗum, on fu.

¹⁴ Mi jurorake on yeeso makko, amma on centinay am. Wakkati fu, gooŋa men batata on, hande nun bo juro amen dow mooɗon yeeso Titus laati nun gooŋa.

¹⁵ Ɓerne makko ɓeydake yiɗugo on, de o miilata no ɗowtoraniɗon am, on fu, e no jaɓɓoriiɗon mo e kulol e diwnugo.

¹⁶ Mii seyii gam mi waawan hoolaago on dow huune fu.