Korintu ɗiɗaɓol 6 - Bible Fulfulde Bénin New Testament

¹ Menen, men gollidooɓe e Alla. Gam majjum emen eela on, to on accee moƴƴere Alla ne jaɓuɗon laatoo baanji.

² Gam Alla wi'i: «Mi jaɓii du'aare maa der wakkati pottuki. Nyalaane kisidam, mi faabake maa.» Jooni woni wakkati pottuki, hanne woni nyalaane kisidam.

³ Men jiɗaa doƴƴugo goɗɗo baa der noy, gam to goɗɗo heɓu laawol felugo golle amen.

⁴ Amma der huune fu, emen kolla no men laati nun gollantooɓe Alla. Kan acci emen tinnii, emen munyani tooraaji e caɗeele e jiɓayeere.

⁵ Men piyaama, men gattaa der kasu. Ɓe umminii fitinaaji dow amen, men gollike men comi, men ɗaanaaki, men nyaamay.

⁶ Emen kolla men laati nun gollantooɓe Alla diga e *laaɓal amen, e annal, e munyal, e neɗɗaaku, e ballal *Ruuhu Ceniiɗo, e yidde ne walaa munaafitaare.

⁷ Emen baajoo batu gooŋaha, e baawɗe Alla. Kaɓirɗum amen ɗum men diiwirta wayɓe, e ɗum men paddortoo ko'e amen woni foonnitaare.

⁸ Woɓɓe e teddina men, woɓɓe e yawoo men. Woɓɓe e batana men geeta, woɓɓe e batana men kalluka. Emen daaree fewooɓe, baa no gooŋa men batata.

⁹ Ɓee daari men hande men annaaka, amma men annaaɓe. Ɓee daari men hande maayooɓe, amma emen poofa. Ɓee piya men, amma ɓe baray men.

¹⁰ Ɓee biisa ɓerɗe amen, amma emen ceyii. Emen nandi hande talakaaɓe, amma emen laatina ɗuuɓɓe jom jawdiiɓe. Emen daaree hande ɓe walaa goɗɗum, amma menen woodi huune fu.

¹¹ Onon Korintuuɓe, men laaɓinanii on batu, men maɓɓitanii on ɓerɗe amen jaajuɗum.

¹² Men cuuɗanay on ɓerɗe amen, amma onon on maɓɓanii men ɓerɗe mooɗon.

¹³ Jooni mii badda on hande sukaaɓe am: Onon bo, gaɗanee men hande no men gaɗani on. Maɓɓitanee men ɓerɗe mooɗon jaajuɗum.

Enen woni suudu Alla yonkinteejo

¹⁴ To on piɓontiree e ɓe goonɗinay, gam ɗum nandi hande on kawtii dabbaaji ɗiɗi ɗi nandaa der demal. Ume hawti foonnitaare e hallande? Naa bo ume hawti jayŋol e niwre?

¹⁵ Ume hawti *Almasiihu e *Seyɗan? Ume hawti goonɗinɗo e mo goonɗinay?

¹⁶ Kawtal ŋale woni hakkune suudu Alla e tooruuje? Enen nun laatii suudu Alla yonkinteejo, hande no o wi'i: «Mi jooɗoto caka maɓɓe, mi yahan caka maɓɓe, mi laatoo Alla maɓɓe, ɓe laatoo himɓe am.»

¹⁷ Gam majjum Joomiraawo wi'i kade: «Burtee caka maɓɓe! Ceenniree e maɓɓe! To on meemee ko soɓi! Den, mi jaɓan on.

¹⁸ Mi laatanto on *Baaba, Onon bo on laatanto am ɓiɓɓe worɓe e rewɓe.» Joomiraawo Jom baawɗe bati ka .