Korintu ɗiɗaɓol 5 - Bible Fulfulde Bénin New Testament

¹ Een anni ɓalli men leydiiji, nanduɗi e cuuɗi, pusete. To ɗi pusaama, Alla e siriyanii en cuuɗi goɗɗi dow kammu, ɗi junŋo neɗɗo mahay, tabitintooɗi faa abada.

² Jooni, een uuma der ɓalli ɗii ɗo. Een kaaɓi naatugo suudu men ŋol dow kammu.

³ To en naatii ŋol, en tawataake funtu.

⁴ Gam de gonuɗen der suudu ŋol ɗo, een uuma, een ɓillii. En jiɗaa accugo ŋol, amma heɓugo gonŋol dow maggol, gam yonki moɗa ko maayata.

⁵ Alla nun siriyanii en ɗum. O hokkii en *Ruuhu makko gam tabbitingo ko keɓoyten jaaŋo.

⁶ Gam majjum gooduɗen tinnaare wakkati fu, een anni to en na'on der ɓannu ŋol ɗo, een boɗɗidi e Joomiraawo.

⁷ Gam e goonɗinki jahirten, en jahataa dow ko yi'etee.

⁸ Een goodii tinnaare, amma ko jiɗuɗen ɓuri woni, eggugo ɓannu ŋol ɗo, gonden e Joomiraawo.

⁹ Gam majjum tinniɗen fottango mo, baa to een goni der ɓalli ɗii ɗo, ɗum bo to en accii ɗi.

¹⁰ Doole en fu daroɗen yeeso hiitorde *Almasiihu, moy fu heɓa riiba ko waɗunoo der duuniyaaru, geetum naa bo kalluɗum.

Yeesu weldinii en e Alla

¹¹ Emen anni ume woni ɗowtanaago Joomiraawo. Gam majjum men dartata faamingo ɗum himɓe. Alla e anni men. Mii miili onon bo, oon anni men der cuuɗiiɗum ɓerɗe mooɗon.

¹² Men jiɗaa hollitingo on, e ko'e amen ko men laatii, amma hokkugo on daliila juroraago men. Den on keɓan no toontortoɗon jurortooɓe kujje yaasiije, ɓe jurortaako gonɗe der ɓerɗe.

¹³ To men laatike ɓe walaa hakkillo, gam Alla nun. To men laatike wooduɓe hakkillo bo, gam mooɗon nun.

¹⁴ Yidde *Almasiihu nun jogii men, menen annitinɓe no gooto maayanii himɓe fu, den himɓe fu nun maayi ɗon.

¹⁵ O maayanii himɓe fu, gam wuuruɓe acca wuurango ko'e mum, amma ɓe buurana maayanɗo ɓe, go finti gam maɓɓe.

¹⁶ Gam majjum, diga jooni, men annaa kade goɗɗo dow laawol ɓannu. Baa to men anniino *Almasiihu dow laawol ɓannu, jooni, nun nun bane men anniri mo.

¹⁷ To neɗɗo hawtii e Almasiihu, o laatake tagudi keyri. Kujje kiiɗɗe yawtii, jooni huune fu laatake kesum.

¹⁸ Ɗum fu diga Alla ɗum ƴiwi. Kanko weldini en e makko, diga e Almasiihu, o yowanii men golle weldingo himɓe e makko.

¹⁹ Alla wonunoo der Almasiihu e weldina duuniyaaru e makko. O limanay ɓe boofi maɓɓe, o yowani men batu weldingo himɓe e makko.

²⁰ To non, lilaaɓe gollantooɓe *Almasiihu men laatii. Alla nun waajotoo on diga e kunnuɗe amen. Emen eela on e inne Almasiihu: Jaɓee Alla weldina on e mum!

²¹ Almasiihu meeɗay waɗugo hakke. Amma Alla yowii hakkeeji meeɗen fu dow makko, gam laatoɗen, foonnitiiɓe yeeso Alla diga e kawtal men e makko.