Korintu ɗiɗaɓol 4 - Bible Fulfulde Bénin New Testament

Jawdi der payanɗe loopeeje

¹ Alla hokkii men golle ɗen sabbu enɗam mum. Gam majjum ɓerɗe amen biisaaki.

² Men calake kujje cuuɗiiɗe e centiniiɗe. Men ƴoyrataa himɓe, men baylitintaa bo batu Alla. Ko men gaɗata woni, emen kollita gooŋa. Neɗɗo liinyoowo ɓerne mum fu yeeso Alla annitan gooŋa nun men batata.

³ To *linjiila ka men baajotoo e suuɗii, halkooɓe nun ka suuɗanii.

⁴ Kamɓe, ɓe goonɗinay, gam Seyɗan wuminii hakkillo maɓɓe. O waɗii ɗum gam to ɓe ji'u jayŋol linjiila kolloowa tedduŋal *Almasiihu, laatiiɗo nandi Alla.

⁵ Haala amen bane men baajotoo, ko men baajotoo woni batu Yeesu Almasiihu, Joomiraawo meeɗen. Menen, men laatake maccuɓe mooɗon sabbu makko.

⁶ Alla bi'uɗo: «Jaayŋol yayna der niwre,» kanko yaynini jayŋol mum der ɓerɗe amen, gam kolliten annal tedduŋal makko ji'eteeŋal dow yeeso Almasiihu.

⁷ Menen wooduɓe jawdi mawni nin, men laati nun hande payanɗe loopeeje. Den annitinte no baawɗe mawɗe ɗen, to Alla ƴiwi, e amen bane.

⁸ Emen ɓillee der laabi fu, amma men kalkay. Emen jiɓii wakkati fu, amma ɓerɗe amen biisaaki.

⁹ Emen tooree, amma Alla accay men, emen doƴƴee, amma men maayay.

¹⁰ Wakkati fu, maayde Yeesu e tawaa der ɓalli amen, gam yonki makko bo yi'ee der majji.

¹¹ Menen wuuruɓe, wakkati fu der hunnuko maayde men gonii gam Yeesu, heɓa yonki makko yi'ee der ɓalli amen maayooji.

¹² To non, maayde e golloo der amen, go yonki e golloo der mon.

¹³ Dewtere batii wi'i: «Mi goonɗinii Joomiraawo, kanjum waɗi batumi ka». Menen bo, iri goonɗinki kin men goodi, kan waɗi emen bata.

¹⁴ Emen anni pintinɗo Yeesu Joomiraawo diga maayde, fintinan men e makko, darna men e mon yeeso makko.

¹⁵ Huune ɗum fu laatake gam mooɗon, gam moƴƴere Alla ɓeydoo sankitaago caka himɓe ɗuuɓɓe. Nun nun jettooje ɗuuɓɓe ɓeydortoo heɓa Alla teddinee.

Tedduŋal tabitiiŋal

¹⁶ Gam daliila majjum acci ɓerɗe amen biisaaki. Baa to ɓalli amen e halka, yonkiiji amen e laatoo kesi nyalaane fu.

¹⁷ Tooraaji amen ɗi jooni e hoyi, jawtooji nun. Eɗii ciryanoo men tedduŋal manŋal, tabitiiŋal, ŋal fonnataako e tooraaji ɗi jooni.

¹⁸ Der ko yi'etee bane hakkillo amen woni, amma der ko yi'ataako. Gam ko yi'etee, yawtan, amma ko yi'ataako, tabitinto faa abada.