Korintu ɗiɗaɓol 3 - Bible Fulfulde Bénin New Testament

Gollantooɓe alkawal kesal

¹ Men puɗɗii hollitingo ko'e amen na? Emen kaajaa yaarango on ɗereeji anninooji ko men laatii, naa bo men jaɓa ɗi to mooɗon, hande no woɓɓe waɗata na?

² Onon laatii ɗerewol amen, binnaaŋol der ɓerɗe amen. Himɓe fu e anni ŋol, e janŋa ŋol.

³ E laaɓi, no on laati nun ɗerewol *Almasiihu ŋol golle amen winni. Ŋol winniraaka e dawa, amma e *Ruuhu Alla yonkinteejo. Ŋol winnaaka bo dow alluwaaje ɗe kaaƴe, amma der ɓerɗe mon.

⁴ Emen bata ka gam emen koolii Alla diga e *Almasiihu.

⁵ Menen e ko'e amen, men goodaa baawɗe waɗugo goɗɗum. Baawɗe amen, to Alla ƴiwi.

⁶ Kanko waɗi men fotuɓe gollanaago alkawal kesal. Alkawal ŋal daraaki dow sariya binnaaka, amma dow *Ruuhu Ceniiɗo. Gam sariya binnaaka e yaara himɓe to maayde, amma Ruuhu e hokka yonki.

⁷ Sariya binnaaka e karfeeje dow alluwaaje kaaƴe yaari to maayde. Wakkati mum tedduŋal Alla hollitii. Den, yeeso Muusa gollantooɗo sariya kan e jalbitoo, faa himɓe Isira'iila waaway ko daari mo, sabbu tedduŋal ŋal, baa no ŋal ɓooyoowal bane. To sariya gaddoowa maayde e woodi tedduŋal hande ni,

⁸ noy golle *Ruuhu ɓurirtaa non tedduŋal!

⁹ To golle doƴƴooje neɗɗo kiita e woodi tedduŋal, noy golle kokkooje himɓe foonnitaare yeeso Alla ɓurirtaa ni tedduŋal?

¹⁰ En baawan ko wi'i, goodunooɗum tedduŋal arande, foonnataake e gooduɗum tedduŋal ŋal jooni.

¹¹ To keennyoojum heɓii tedduŋal, noy tedduŋal ko heennyataa fotata?

¹² Gam men goodi hoolaare acci emen bata e cuusal.

¹³ Men gaɗataa hande Muusa, cudduɗo yeeso mum e suddaare, gam to himɓe Isira'iila yi'a heennyitirde tedduŋal jalboowal ŋal.

¹⁴ Amma, hakkillo maɓɓe waaway faamugo. Gam faa hanne, to ɓee janŋa Alkawal Kiinŋal, suddaare nen e wirni hakkillo maɓɓe, ne sottintaako sey to goɗɗo hawtii e *Almasiihu .

¹⁵ Faa e hanne, to dewte Muusa e janŋee, suddaare nen e wirni hakkillo maɓɓe.

¹⁶ Hande no winniraa, to neɗɗo wittoy to Joomiraawo, den suddaare nen sottintoo.

¹⁷ Noddeteeɗo Joomiraawo ɗo, *Ruuhu non, to Ruuhu Joomiraawo woni fu, ɗon nun jeyde hoore mum woni.

¹⁸ En fu, enen ɓe geese mum suddaaki, een daara tedduŋal Joomiraawo hande der daanorgal. Oo waylita en, faa nanden e makko, tedduŋal makko ɓeydoo dow meeɗen. Kanjum woni golle Joomiraawo, laatiiɗo Ruuhu.