Korintu ɗiɗaɓol 2 - Bible Fulfulde Bénin New Testament

¹ Gam majjum desumi mi wittataa to mooɗon gam to mi biisu ɓerɗe mooɗon.

² Gam to mi biisii ɓerɗe mon, moy welinta ne am, to hinaa onon ɓe biisumi ɓerɗe mum?

³ Mi winnaniino on hande no binnirmi ɗo, gam to mi yottake to mooɗon, to mi heɓu biisere ɓerne diga e onon haanunooɓe seyina ɓerne am. Mii hoolii, seyo am e laatii seyo mooɗon on fu.

⁴ Gam majjum e toora mawka, e ɓerne biisiine, e gonɗi ɗuuɗɗi nun binniranmi on. Mi winnay gam mi biisa ɓerɗe mooɗon, amma gam anningo on yidde mawne ne jiɗumi on.

Pol yaafake boofuɗo

⁵ To goɗɗo mooɗon laatike daliila biisere ɓerne, min bane o biisi ɓerne. Onon nun o biisi ɓerne, naa bo mi wi'a woɓɓe mooɗon, gam to mi batu mi yawtina jaka.

⁶ Kiita ka ɗuuɓɓe mooɗon hiitii joomum, heƴii.

⁷ Jooni, ko ɓuri wooɗugo nun, jaafoɗon mo, deƴƴitinon mo, gam to biisere ɓerne mawne jaaloo mo.

⁸ Gam majjum, mii eela on, kollee mo yidde.

⁹ Mi winnanii on bo, gam mi foonna on, mi daara naa oon ɗowtanii am der huune fu.

¹⁰ Mo jaafiɗon fu, min bo mi yaafake ɗum. Min bo, to emi yaafoo to e woodi ko haani mi yaafoo, mi yaafoto ɗum gam mooɗon, yeeso *Almasiihu,

¹¹ heɓa to *Seyɗan jaaloo en, gam een anni dabareeji makko no wooɗi.

¹² No jottiimi Torowas gam mi waajoo *linjiila *Almasiihu, baa no Joomiraawo maɓɓitanii am laawol,

¹³ hakkillo am fukkaaki, gam mi taway ton Titus banniraawo am. Den bayniimi ɓe, jawtirmi leydi Maseduwaan.

Jaalaago e Almasiihu

¹⁴ Yettoore laatanoo Alla, gam oo hokka en wakkati fu jaalaago, gam kawtal meeɗen e *Almasiihu. Alla e gollira men gam sankitingo habaru Almasiihu nokku fu, hande luunŋol belŋol.

¹⁵ Men laatani nun Alla luunŋol Almasiihu belŋol, caka hisinteeɓe, e caka halkooɓe.

¹⁶ Caka halkooɓe, men laati nun luunŋol maayde, jaaroowol e maayde. Caka hisinteeɓe, men laati nun luunŋol yonki, jaaroowol e yonki. Moy foti waɗugo ɗum?

¹⁷ Men laataaki dartirooɓe batu Alla jawdi hande no ɗuuɓɓe waɗata. Men laati nun lilaaɓe Alla, emen bata e ɓerɗe laaɓuɗe yeeso makko, gam emen kawti e Almasiihu.