Korintu ɗiɗaɓol 13 - Bible Fulfulde Bénin New Testament

Haalaaji cakitiiɗi e cannooje

¹ Mii wara to mooɗon de tatawre. Den «batu gaɗuka fu, moƴƴinto dow seedaaku himɓe ɗiɗo, ɗum bo tato» hande no Dewtere wi'i.

² Mi baddiino waɗunooɓe hakke no jahunoomi to mooɗon de ɗiɗawre. Jooni bo, baa no mi walaa ɗon, mii bata ɓe ka kade, kamɓe e horiiɓe fu: To mi warii, mi yurmataako goɗɗo maɓɓe.

³ Oon jiɗi yi'ugo ko hollitinta no *Almasiihu nun batata diga e am, on ji'an ɗum bo. Almasiihu laataaki tampuɗo hakkune mooɗon, amma oo hollita baawɗe makko caka mooɗon.

⁴ E gooŋa nun, o tiggaama dow *leggal palaaŋal gam tampere makko, amma oo wuuri sabbu baawɗe Alla. Menen bo, der kawtal amen e makko, men tampuɓe, amma men buurdan e makko gam baawɗe Alla, on ji'an ɗum bo.

⁵ Liinyee ko'e mooɗon, daaron to oon goonɗini. Poonnee ko'e mooɗon. On annitay no Yeesu *Almasiihu na'on der mon na? To o walaa der mon, den on janii.

⁶ Amma mii miili on annitan men tampay poonnol ŋol.

⁷ Emen eela Alla to on gaɗee kalluɗum baa seɗɗa. Hinaa gam hollitingo emen goodi gooŋa. Amma emen jiɗi gaɗon ko wooɗi, baa to e nandi hande men galaa gooŋa.

⁸ Gam men galaa baawɗe haɓidingo e gooŋa. Ko men baawata woni, gollanaago ka.

⁹ Emen goodi seyo to emen laatii tampuɓe, go onon oon cemmiɗi. Ko men eelata Alla der du'aaje amen woni, laatoɗon hebbuɓe.

¹⁰ Gam majjum mii winnana on ɗum diga mi waray taw, gam to mi warii, to mi sattana on e baawɗe ɗe Joomiraawo hokkimmi. O hokkii am ɗe gam mawningo on, hinaa gam doƴƴugo on.

¹¹ Banniraaɓe, ko horii wi'ugo on woni jooɗodee e seyo. Laatee hebbuɓe, cemmiɗinontiree, goodee miilo wooto, jooɗodee e jam. Den Alla mo yidde e jam wondan e mooɗon.

¹² Cannontiree e yidde. Himɓe Alla fu e sanna on.

¹³ Moƴƴere Joomiraawo Yeesu *Almasiihu, e yidde Alla, e kawtal *Ruuhu Ceniiɗo, wonda e mooɗon, on fu!