Korintu ɗiɗaɓol 12 - Bible Fulfulde Bénin New Testament

Kayniiɗum ɗum Alla holliti Pol

¹ Doole mi juro baa to ɗum nafataa. Amma e non, mi batanan ko ji'umi e ko Joomiraawo hollitimmi.

² Mii anni goonɗinɗo gom, ɗum waɗii duuɓi sappo e naay, diga ko o eencinaa dow kammu to ɓuri towugo. Mi annaa naa e ɓannu makko nun o eenciniraa, hinaa e ɓannu, Alla tan anni.

³ Mii anni neɗɗo on eencinaama faa aljanna. E ɓannu makko nun o eenciniraa, naa Joomiraawo nun yi'ini mo ɗum, mi annaa, Alla tan anni.

⁴ Ton o nani batu ka neɗɗo waawataa ko bati, ka goɗɗo fotay batugo.

⁵ Mi jurorto iri neɗɗo oo, amma mi jurortaako hoore am, sey tampere am.

⁶ Baa to mii yiɗuno juraago, mi kaaŋaaɗo bane, gam gooŋa nun batanmi. Amma mi haɗii hoore am juraago, gam to goɗɗo miilu mii ɓuri ko o yi'ata mii waɗa, e ko o nanata mii bata.

⁷ Ko ji'umi e mawni. Amma gam to mi mawnito, Alla wattanii am goɗɗum der ɓannu, hande gi'al. Eŋal laatii hande lilaaɗo *Seyɗan. Eŋal fiyammi, gam haɗugo am mawnitaago.

⁸ De tati eelumi Joomiraawo o woɗɗinanammi ŋal.

⁹ Amma o wi'i: «moƴƴere am heƴii maa, gam baawɗe am e hebba der dullere semme.» Gam majjum mi jurorto tampe am, gam baawɗe *Almasiihu wonoo der am.

¹⁰ Kanjum acci mii seyoroo tampe, e jennooje, e caɗeele e tooraaji e ɓillaaje fu, gam Almasiihu. Gam wakkati tampumi, den nun keɓammi semme.

Toora ɓerne Pol gam ɓe Korintu

¹¹ Mii bata hande kaaŋaaɗo, amma onon nun doolimmi. Onon nun haanunoo bata geeta am. Baa to mi laataaki goɗɗum, lilaaɓe ɓe daaruɗon mawɓe, mi jaccay ɓe dow goɗɗum.

¹² Maaneeji kollitooji mi lilaaɗo hollitaama caka mooɗon. Mi munyanii tooraaji, mi waɗii maaneeji kaayniiɗi e golle kollitooje baawɗe.

¹³ Ume woni on gaɗanaaka ko eklesiyaaji goɗɗi waɗanaa ɗum? Boofol nun gaɗumi ɗon no mi laatanaaki on dongal na? Cawranee am ŋol!

¹⁴ Jooni, mii siriyii warugo to mooɗon de tatawre, mi laatantaako on bo dongal. Gam jawdi mooɗon bane dartanmi, onon e ko'e mooɗon dartanmi. Gam sukaaɓe bane hawritanta baabiraaɓe jawdi, baabiraaɓe nun haani hawritana ni sukaaɓe mum.

¹⁵ Min, e seyo kokkanmi ko goodumi fu. Mi hokkan on du baa e hoore am, gam mi walla on. To emii ɓeyda yiɗugo on, onon on ɓuytan yiɗugo am na?

¹⁶ Mi laatanaaki on dongal, amma wi'aama mi ƴoyrii on, jammiimi on.

¹⁷ Mi nyaamii jawdi mooɗon diga e lilaaɓe am gooto mum na?

¹⁸ Mi eelii eelitiimi Titus e banniraawo goɗɗo yaha to mooɗon. Titus nyaamii on na? Miilo amen e laawol amen laataaki gootol na?

¹⁹ Oon miila diga ɗum ɓooyii men laaɓinan nun ko'e amen yeeso mooɗon. Amma yeeso Alla men batata, hande no *Almasiihu yiɗiri. Banniraaɓe yiɗaaɓe, ko men gaɗata fu laati nun gam yaadu mon yeeso.

²⁰ To mi warii to mooɗon, mii hula to mi tawu on nandaa hande no jiɗirmi. Onon bo tawiron am no on jiɗiraa. Mii hula kade to mi tawu on der jeddi e nawniraagu e mone e kaɓe e jennooje e nyoore e mawnitaare e dullere potal.

²¹ To mi yottake to mooɗon, mii hula to Alla am leesinammi caka mooɗon kade, mi wulla dow woɓɓe waɗunooɓe hakke ko ɓe tuubay ɓe acci coɓuɗum, e jeenu e baadiiji baanjaaji ɗi ɓe gaɗi.